ბოჭკოვანი დიეტა თავისა და კისრის კიბოს რისკს შეიძლება ამცირებდეს

International Journal of Cancer-ში გამოქვეყნებული მეცნიერული კვლევით, ბოჭკოთი მდიდარმა კვებამ თავისა და კისრის კიბოს განვითარების რისკი შეიძლება შეამციროს.

პირის ღრუს ორგანოებისა და რბილი სასის, ნაზოფარინქსის (ცხვირ-ხახის), ლარინქსის (ხორხის), პარანაზალური წიაღებისა და სანერწყვე ჯირკვლების კიბოები თავისა და კისრის კიბოებს ქმნის. მათი მთავარი გამომწვევი მიზეზები, ანუ რისკფაქტორები, თამბაქოსა და ალკოჰოლის მოხმარებაა.

ადრეც ფიქრობდნენ, რომ ბოჭკოთი მდიდარი საკვები თავისა და კისრის კიბოს რისკს ამცირებდა, მაგრამ ამ სტატიის თემად ქცეულ კვლევამდე ეს კავშირი აღწერილი არ იყო.

კვლევისთვის შეაჯამეს თავისა და კისრის კიბოს მქონე 5959 პაციენტის შემცველი 10 შემთხვევა-კონტროლის კვლევა. საკონტროლო ჯგუფში 12.248 ადამიანი განისაზღვრა.

ადამიანები გააანალიზეს დღიური საერთო ენერგომიღების, თამბაქოსა და ალკოჰოლის მოხმარების, ასაკის, სქესის, განათლებისა და კვების მიხედვით.

კვლევის ყველაზე გამორჩეული შედეგის მიხედვით, ბოჭკოთი მდიდარი კვება პირის ღრუსა და ხახის კიბოს რისკს %51-ით, ხორხის კიბოს რისკს კი %34-ით ამცირებდა. თუმცა მკვლევრებმა ხაზი გაუსვეს, რომ შეფასებული 10 კვლევა საკმაოდ ჰეტეროგენული (შერეული) იყო.

როგორ შეიძლება ბოჭკოთი მდიდარი საკვები თავისა და კისრის კიბოს რისკს ამცირებდეს?

ამ კავშირის შესახებ თავდაპირველად 3 პასუხი გვახსენდება:

• პირველი — ბოჭკოთი მდიდარი საკვები გლიკემიურ დატვირთვას და, შესაბამისად, კიბოში მნიშვნელოვან ანთებას ამცირებს.
• მეორე — ბოჭკოვანი საკვები ამცირებს თამბაქოსა და ალკოჰოლში არსებული კანცეროგენების შეხებას თავისა და კისრის ამომფენ ეპითელურ უჯრედებთან.
• მესამე — ბოჭკოთი მდიდარი კვების მქონე ადამიანებს ზოგადად უფრო ჯანსაღი ცხოვრების წესი აქვთ.

შედეგად, როგორც წლებია მრავალ მეცნიერულ კვლევაში აღინიშნება, ახალი ბოსტნეული, ხილი და მარცვლეული ბოჭკოს მაღალი შემცველობით ჯანსაღი კვების განუყოფელი ნაწილია. მომავალი კვლევები გამოავლენს, რომელი უჯრედული მექანიზმებით ამცირებს ბოჭკოთი მდიდარი საკვები თავისა და კისრის კიბოს რისკს.