ბრიგატინიბი NF2-თან ასოცირებული შვანომატოზის მკურნალობაში

შვანომატოზი იშვიათი გენეტიკური დარღვევაა, რომელიც ნერვული სისტემის სიმსივნეებს იწვევს. ამ დაავადებისას სხეულის სხვადასხვა ნაწილში შეიძლება გაჩნდეს შვანის უჯრედებიდან წარმოქმნილი კეთილთვისებიანი სიმსივნეები — შვანომები. შვანომატოზმა ხშირად შეიძლება ტკივილი, ნევროლოგიური ფუნქციის დაკარგვა და სხვა გართულებები გამოიწვიოს.

NF2 (ნეიროფიბრომატოზი ტიპი 2) შვანომატოზის ქვეტიპია და NF2 გენის მუტაციების შედეგად ვითარდება.

NF2 მთელი სიცოცხლის განმავლობაში პროგრესირებადი დაავადებაა, რომელიც ჩვეულებრივ ახალგაზრდა ასაკში იწყება და სმენის დაკარგვით, წონასწორობის პრობლემებითა და სხვა მძიმე ნევროლოგიური ნიშნებით ხასიათდება.

NF2-თან ასოცირებული შვანომატოზი (NF2-SWN, ადრე ცნობილი, როგორც ნეიროფიბრომატოზი ტიპი 2) სიმსივნური სინდრომია, რომელსაც ახასიათებს მრავლობითი ვესტიბულური შვანომები (სმენის ნერვების სიმსივნეები), არავესტიბულური შვანომები (სხვა ნერვების სიმსივნეები), მენინგიომები (თავის ტვინის გარსის სიმსივნეები) და ეპენდიმომები (ზურგის ტვინის სიმსივნეები).

დაავადება მუდმივად პროგრესირებს და ჯერ დამტკიცებული მკურნალობა არ აქვს.

NF2-ით გამოწვეულ არავესტიბულურ შვანომებსა და მენინგიომებში ბრიგატინიბის პრეკლინიკურ კვლევებში მიღებულ დადებით შედეგებზე დაყრდნობით INTUITT-NF2 კვლევაში პროგრესირებადი NF2-SWN სიმსივნეების მქონე პაციენტებში ბრიგატინიბის გამოყენების ეფექტები შეისწავლეს.

ბრიგატინიბი მრავალი თიროზინკინაზის ინჰიბიტორი წამალია და განსაკუთრებით კიბოს მკურნალობაში გამოიყენება. FDA-მ ბრიგატინიბი პირველად ALK-დადებითი მეტასტაზური წვრილუჯრედოვანი ფილტვის კიბოს სამკურნალოდ დაამტკიცა.

INTUITT-NF2 კვლევა

ფაზა 2 პლატფორმულ INTUITT-NF2 კვლევაში 12 წლისა და უფროსი, NF2-SWN-ისა და პროგრესირებადი სიმსივნეების მქონე პაციენტები პერორალური ბრიგატინიბით ყოველდღე 180 mg დოზით მკურნალობდნენ. ცენტრალური შეფასების კომიტეტი თითოეული პაციენტის ერთ სამიზნე და მაქსიმუმ ხუთ არასამიზნე სიმსივნეს აფასებდა. პირველადი შედეგი სამიზნე სიმსივნეების რადიოგრაფიული პასუხის მაჩვენებელი იყო. მნიშვნელოვანი მეორეული შედეგები მოიცავდა უსაფრთხოებას, ყველა სიმსივნის პასუხის მაჩვენებელს, სმენის პასუხსა და პაციენტის მიერ აღწერილ შედეგებს.

მიგნებები

• ბრიგატინიბით იმკურნალა პროგრესირებადი სამიზნე სიმსივნეების მქონე 40 პაციენტმა (მედიანური ასაკი 26 წელი): 10 ვესტიბულური შვანომა, 8 არავესტიბულური შვანომა, 20 მენინგიომა და 2 ეპენდიმომა.
• 10,4 თვის მედიანური დაკვირვების შემდეგ რადიოგრაფიული პასუხის მაჩვენებელი სამიზნე სიმსივნეებში 10% იყო (95% სანდოობის ინტერვალი [GA], 3-24%), ხოლო ყველა სიმსივნეში — 23% (95% GA, 16-30%).
• ყველაზე დიდი სარგებელი მენინგიომებსა და არავესტიბულურ შვანომებში დაფიქსირდა.
• მკურნალობისას ყველა ტიპის სიმსივნის წლიური ზრდის მაჩვენებელი შემცირდა.
• სმენის გაუმჯობესება 35%-ში დაფიქსირდა (95% GA, 20-53%).
• საძიებო ანალიზებმა მკურნალობისას პაციენტის მიერ აღწერილი ტკივილის სიმძიმის შემცირება აჩვენა (თვეში -0,013 ერთეული; 95% GA, -0,002-დან -0,029-მდე).
• მკურნალობასთან დაკავშირებული ხარისხი 4 ან 5 გვერდითი მოვლენები არ აღწერილა.

ამრიგად, ბრიგატინიბით მკურნალობამ სხვადასხვა ტიპის სიმსივნეში რადიოგრაფიული პასუხები და ინტენსიურად ნამკურნალებ NF2-SWN პაციენტთა კოჰორტაში კლინიკური სარგებელი უზრუნველყო.

კვლევის მნიშვნელობა

NF2-თან ასოცირებული შვანომატოზის მკურნალობაში მნიშვნელოვანი წინსვლის მომტანი ეს კვლევა სხვადასხვა ტიპის სიმსივნეში ბრიგატინიბის ეფექტიანობასა და უსაფრთხოებას აჩვენებს. ის შეზღუდული შესაძლებლობების მქონე NF2-SWN პაციენტებს იმედისმომცემ ალტერნატივას სთავაზობს და სიმსივნის ზრდის შენელებისა და ცხოვრების ხარისხის გაუმჯობესების პოტენციალი აქვს. ამიტომ კლინიკური გამოყენებისთვის შემდგომი კვლევა და დამტკიცების პროცესებია საჭირო.