NF2 ilə əlaqəli şvannomatozun müalicəsində brigatinib

Şvannomatoz sinir sistemi şişlərinin yaranmasına səbəb olan nadir genetik pozuntudur. Bu xəstəlikdə Şvann hüceyrələrindən yaranan, şvannoma adlanan xoşxassəli şişlər bədənin müxtəlif nahiyələrində əmələ gələ bilər. Şvannomatoz adətən ağrıya, nevroloji funksiya itkisinə və digər ağırlaşmalara səbəb ola bilər.

NF2 (neyrofibromatoz tip 2) şvannomatozun alt növüdür və NF2 genindəki mutasiyalar nəticəsində yaranır.

NF2 həyat boyu irəliləyən xəstəlikdir; adətən gənc yaşlarda başlayır və eşitmə itkisi, tarazlıq problemləri və digər ciddi nevroloji əlamətlərlə səciyyələnir.

NF2 ilə əlaqəli şvannomatoz (NF2-SWN, əvvəl neyrofibromatoz tip 2 adlandırılırdı) çoxsaylı vestibulyar şvannomalar (eşitmə sinirlərində şişlər), qeyri-vestibulyar şvannomalar (digər sinirlərdə şişlər), meningiomalar (beyin qişasında şişlər) və ependimomalar (onurğa beyni şişləri) ilə səciyyələnən şiş sindromudur.

Bu xəstəlik daim irəliləyir və hələ təsdiqlənmiş müalicəsi yoxdur.

NF2 mənşəli qeyri-vestibulyar şvannoma və meningiomalarda brigatinibin preklinik işlərdə göstərdiyi müsbət nəticələrə əsasən proqressiv NF2-SWN şişləri olan xəstələrdə INTUITT-NF2 tədqiqatında brigatinib istifadəsinin təsirləri araşdırılıb.

Brigatinib bir çox tirozin kinazanı inhibə edən və xüsusilə xərçəng müalicəsində istifadə olunan dərmandır. FDA brigatinibi ilk dəfə ALK-müsbət metastatik kiçik hüceyrəli ağciyər xərçənginin müalicəsi üçün təsdiqləyib.

INTUITT-NF2 tədqiqatı

Faza 2 platformalı INTUITT-NF2 sınağında 12 yaş və daha yuxarı, NF2-SWN və proqressiv şişləri olan xəstələr gündəlik 180 mg oral brigatinib ilə müalicə edilib. Mərkəzi qiymətləndirmə komitəsi hər xəstədə bir hədəf şişi və beşədək hədəfdənkənar şişi qiymətləndirib. Əsas nəticə göstəricisi hədəf şişlərdə rentgenoloji cavab olub. Mühüm ikinci dərəcəli nəticələr təhlükəsizlik, bütün şişlərdə cavab göstəricisi, eşitmə cavabı və xəstənin bildirdiyi nəticələr olub.

Nəticələr

• Proqressiv hədəf şişləri (10 vestibulyar şvannoma, 8 qeyri-vestibulyar şvannoma, 20 meningioma və 2 ependimoma) olan 40 xəstə (median yaş 26 il) brigatiniblə müalicə edilib.
• Median 10,4 aylıq izləmədən sonra hədəf şişlərdə rentgenoloji cavab 10% (95% etibar intervalı [GA], 3-24%), bütün şişlərdə isə 23% (95% GA, 16-30%) olub.
• Ən böyük fayda meningiomalarda və qeyri-vestibulyar şvannomalarda müşahidə edilib.
• Müalicə zamanı bütün şiş növlərində illik böyümə göstəriciləri azalıb.
• Eşitmənin yaxşılaşması 35% (95% GA, 20-53%) göstəricisində görülüb.
• Kəşfiyyat təhlilləri müalicə zamanı xəstələrin bildirdiyi ağrı şiddətinin azaldığını göstərib (ayda -0,013 vahid; 95% GA, -0,002 ilə -0,029).
• Müalicə ilə əlaqəli 4-cü və ya 5-ci dərəcəli yan təsir bildirilməyib.

Nəticə etibarilə, brigatinib müalicəsi müxtəlif şiş növlərində rentgenoloji cavab və çoxsaylı müalicə almış NF2-SWN xəstə kohortunda klinik fayda təmin edib.

Tədqiqatın əhəmiyyəti

NF2 ilə əlaqəli şvannomatozun müalicəsində böyük irəliləyiş təmin edən bu tədqiqat müxtəlif şiş növlərində brigatinibin effektivliyini və təhlükəsizliyini ortaya qoyur. Müalicə variantları məhdud olan NF2-SWN xəstələri üçün ümidverici alternativ təqdim edərək şişlərin böyüməsini azaltmaq və həyat keyfiyyətini artırmaq potensialı daşıyır. Buna görə brigatinibin klinik istifadəsi üçün əlavə araşdırmalar və təsdiq prosesləri lazımdır.