ძუძუს კიბოს სამკურნალოდ იმუნოთერაპიამ პირველად მიიღო FDA-ის დამტკიცება

ამ სტატიაში
2019 წლის 8 მარტს აშშ-ის სურსათისა და წამლის ადმინისტრაციამ (FDA) PD-L1 დადებითი, ქირურგიულად არარეზექტაბელური ადგილობრივად გავრცელებული ან მეტასტაზების მქონე სამმაგად უარყოფითი ძუძუს კიბოს პირველი ხაზის მკურნალობისთვის დაჩქარებული წესით დაამტკიცა nab-პაკლიტაქსელის ქიმიოთერაპიასთან ერთად იმუნოთერაპიული პრეპარატი ატეზოლიზუმაბი(Tecentriq).
შენიშვნა: ძუძუს კიბოს დაახლოებით 15 % სამმაგად უარყოფითი ძუძუს კიბოა.
ატეზოლიზუმაბი ძუძუს კიბოს სამკურნალოდ დამტკიცებული პირველი იმუნოთერაპიული პრეპარატი გახდა.
ახალი დამტკიცება ეფუძნება ESMO 2018-ზე წარმოდგენილი IMpassion130 სახელწოდების კლინიკური კვლევის პროგრესირების გარეშე (დაავადების წინსვლის გარეშე) გადარჩენის (progression-free survival, PFS) შედეგებს.
კვლევაში ჩაერთო 902 პაციენტი ქირურგიულად არარეზექტაბელური ადგილობრივად გავრცელებული ან მეტასტაზური სამმაგად უარყოფითი ძუძუს კიბოთი; პაციენტები შემთხვევითად ორ ჯგუფად განაწილდნენ: 451 პაციენტს ატეზოლიზუმაბი და nap-პაკლიტაქსელი მიეცა, ხოლო დანარჩენ 451 პაციენტს — პლაცებო და nab-პაკლიტაქსელი.
IMpassion130 კვლევის შედეგები
კვლევამ აჩვენა, რომ პაციენტების მთელ ჯგუფში ქიმიოთერაპიაზე ატეზოლიზუმაბის დამატებისას პროგრესირების გარეშე გადარჩენის მედიანური დრო 7.2 თვე იყო, ხოლო პლაცებოსა და ქიმიოთერაპიის ჯგუფში — 5.5 თვე.
ატეზოლიზუმაბმა საერთო გადარჩენის მედიანაც გაზარდა, თუმცა შუალედური ანალიზის დროს სტატისტიკური მნიშვნელობა არ მიღწეულა (21.3 და 17.6 თვე).
მკვლევრებმა ასევე ჩაატარეს ქვეჯგუფის ანალიზი იმ პაციენტებში, რომელთა სიმსივნეში შეჭრილ იმუნური სისტემის უჯრედებში PD-L1-ის დონე ≥ 1 % იყო. სამმაგად უარყოფითი ძუძუს კიბოს მქონე პაციენტების დაახლოებით 40 %-ში PD-L1 დადებითობა გამოვლინდა. ამ ანალიზში ატეზოლიზუმაბის ჯგუფში 185 პაციენტი იყო, ხოლო პლაცებოს ჯგუფში — 184.
კვლევის ყველაზე საყურადღებო შედეგები ამ PD-L1 დადებით ჯგუფში;
- ატეზოლიზუმაბმა დაავადების პროგრესირების ან სიკვდილის რისკი მნიშვნელოვნად შეამცირა.
- პროგრესირების გარეშე გადარჩენის მედიანური დრო იმუნოთერაპიის ჯგუფში 7.5 იყო, ხოლო პლაცებოს ჯგუფში — 5.0 თვე.
- ქიმიოთერაპიაზე იმუნოთერაპიის დამატებამ პროგრესირების რისკი 38 %-ით შეამცირა.
- ობიექტური პასუხის მაჩვენებელი იმუნოთერაპიის ჯგუფში 53 % იყო, ხოლო პლაცებოს ჯგუფში — 33 %.
- იმუნოთერაპიამ საერთო გადარჩენის მედიანური დროც გაახანგრძლივა: 25.0 თვე 15.5 თვის წინააღმდეგ.
ამ შთამბეჭდავი მონაცემების შემდეგ იმუნოთერაპიისა და ქიმიოთერაპიის კომბინაცია შესაძლოა PD-L1 დადებითი სამმაგად უარყოფითი ძუძუს კიბოს მკურნალობის ახალ სტანდარტად იქცეს, თუმცა საბოლოო დასკვნის გამოტანა ჯერ ნაადრევია, რადგან ამ კომბინაციის საერთო გადარჩენის მონაცემები სრულად ჯერ არ მომწიფებულა.
გამოყენების წესი და დოზა:
ატეზოლიზუმაბი ინტრავენური (IV) ინფუზიით, 60 წუთის განმავლობაში, 840 mg ფიქსირებული დოზით გამოიყენებოდა ყოველი 28-დღიანი ციკლის 1 და 15 დღეებში, დაავადების პროგრესირებამდე ან მიუღებელი გვერდითი ეფექტის განვითარებამდე. იმუნოთერაპიის შემდეგ nab-პაკლიტაქსელი შეჰყავდათ IV ინფუზიით, 100 mg / m2 საწყისი დოზით, ყოველი 28-დღიანი ციკლის 1., 8. და 15. დღეებში.
კვლევის განმავლობაში პროგრესირება ან სიკვდილი აღენიშნა ატეზოლიზუმაბის ჯგუფის 358 პაციენტს (79,4 %) და პლაცებოს ჯგუფის 378 პაციენტს (83,8 %).
გვერდითი ეფექტები
მკვლევრებმა განაცხადეს, რომ გვერდითი ეფექტები საკვლევი პრეპარატების უსაფრთხოების პროფილებს შეესაბამებოდა; ატეზოლიზუმაბისა და nab-პაკლიტაქსელის კომბინაციას უსაფრთხოების ახალი გაფრთხილებები არ გამოუწვევია.
სერიოზული (3. და 4. ხარისხის) გვერდითი ეფექტები ატეზოლიზუმაბის ჯგუფში 23 %-ში დაფიქსირდა, ხოლო პლაცებოს ჯგუფში — 18 %-ში. ყველაზე გავრცელებული სერიოზული გვერდითი ეფექტები იყო ნეიტროპენია (8 %); პერიფერიული ნეიროპათია (6 %); დაღლილობა (4 %); და ანემია (3 %).
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.