მამაკაცები ნებისმიერ ასაკში ფორმაში უნდა იყვნენ! რატომ?

ხანგრძლივი, ფართომასშტაბიანი კვლევის შედეგად დადგინდა, რომ საშუალო ასაკის მამაკაცებს, რომლებსაც გულ-სისხლძარღვთა კარგი ფიზიკური მომზადება აქვთ, განსაკუთრებით ფილტვისა და მსხვილი ნაწლავის კიბოს განვითარების დაბალი რისკი აღენიშნებათ.

რეგულარული ფიზიკური აქტივობა ჯანმრთელობისთვის ფართო სარგებლის მიღებას ნიშნავს. ეს კი გარკვეული ტიპის კიბოს განვითარების რისკის შემცირებას გულისხმობს. სხეულის აგებულებისა და ჯანმრთელობის მდგომარეობის შესაბამისი, სპეციალისტის რეკომენდაციით შესრულებული ვარჯიში კიბოს წარმოქმნის რისკს მინიმუმამდე ამცირებს. კიბოს მრავალი ტიპის შესახებ ჩატარებულმა ათეულობით კვლევამ ეს შედეგი არაერთხელ დაადასტურა. აი, კიდევ ერთი ასეთი კვლევა..

ამერიკის კლინიკური ონკოლოგიის საზოგადოების 2013 ყოველწლიურ შეხვედრაზე საზოგადოებისთვის წარდგენილი კვლევის შედეგების თანახმად, გამოითქვა მოსაზრება, რომ საშუალო ასაკის მამაკაცებში, რომლებსაც გულ-სისხლძარღვთა კარგი ფიზიკური მომზადება აქვთ, მსხვილი ნაწლავისა და ფილტვის კიბოს განვითარებისა და სიცოცხლისთვის საშიში რისკის ალბათობა ძალიან დაბალია. ტეხასის კუპერის ინსტიტუტში ჩატარებულ კვლევაში, საშუალო ასაკი 50 წლის მქონე 17,000-ზე მეტი მამაკაცის გულ-სისხლძარღვთა ფიზიკური მომზადების დონე საშუალოდ 20 წლის განმავლობაში შეისწავლეს.

მონაწილეებზე ჩატარებული ვარჯიშის ტესტი სარბენ ბილიკზე სხვადასხვა სიჩქარით სიარულისგან შედგებოდა, ხოლო ტესტის შედეგი მონაწილეების სიარულის ხანგრძლივობის მიხედვით ფასდებოდა. კვლევა მოიცავდა მამაკაცებში ყველაზე ხშირად გავრცელებული კიბოს სამ ტიპს: ფილტვის, მსხვილი ნაწლავისა და პროსტატის კიბოს. კვლევის განმავლობაში დაკვირვებულ პირებში დროთა განმავლობაში გამოვლინდა 2,332 პროსტატის კიბო, 276 მსხვილი ნაწლავის კიბო და 277 ფილტვის კიბო.

შედეგად;

• ფიზიკური მომზადების უფრო დაბალი დონის მქონე მამაკაცებთან შედარებით, უკეთესი ფიზიკური მომზადების მქონე მამაკაცებში ფილტვის კიბოს განვითარების რისკი %68-ით შემცირდა, ხოლო მსხვილი ნაწლავის კიბოს განვითარების რისკი %38-ით შემცირდა. ეს ანალიზები ჩატარდა კიბოსთან დაკავშირებული ორი შესაძლო რისკ-ფაქტორის, მოწევისა და სხეულის მასის ინდექსის, გათვალისწინებითაც. კვლევაში დადგინდა, რომ ფიზიკური მომზადების დონე გავლენას არ ახდენდა პროსტატის კიბოს განვითარებაზე.
• ფიზიკური მომზადების დონის ზრდამ კიბოსთან დაკავშირებული სიკვდილიანობა %14-ით შეამცირა, ხოლო გულ-სისხლძარღვთა დაავადებებით გამოწვეული სიკვდილიანობის მაჩვენებელი % 20-ზე მეტით შეამცირა. ამგვარად, დადგინდა, რომ ფიზიკური მომზადების დონის უმცირესი მატებაც კი ადამიანებისთვის სასარგებლოა.
• იმ პაციენტებშიც კი, რომლებსაც ჭარბი წონა არ ჰქონდათ, ფიზიკური მომზადების დაბალმა დონემ აჩვენა, რომ ეს კიბოს განვითარების რისკს ზრდის. ამ შედეგმა ცხადყო, რომ მაღალი წონის მქონე ადამიანებსაც კი შეუძლიათ ვარჯიშის დახმარებით კიბოს რისკის შემცირება.

როგორც კიდევ ერთხელ დადასტურდა, არც ისე რთული უნდა იყოს, ცხოვრების ჯანსაღი წესის ერთ-ერთი წესის სახით, ვარჯიში, რომლის აუცილებლობასაც არაერთხელ აღვნიშნავდი, თქვენი ცხოვრების ნაწილად აქციოთ. ჯანმრთელობის მდგომარეობის შესაბამისად შესრულებული ვარჯიში ყოველთვის სასარგებლო იქნება თქვენთვის და დაავადებებისგან დაცვაში დაგეხმარებათ. ვარჯიში უფრო მხნე გონებასა და ძლიერ იმუნურ სისტემას ნიშნავს. ძლიერი იმუნური სისტემა კი დაავადებებს მაქსიმალურად დაგვაშორებს.

სწორი კვებით მხარდაჭერილი ვარჯიში ჯანმრთელობის შენარჩუნების ერთ-ერთი უმთავრესი პირობაა და საკუთარ თავზე ზრუნვის ყველაზე დიდი გამოვლინებაა.