მეტასტაზური HER2-დადებითი ძუძუს კიბოსთვის ნერატინიბმა FDA-ს დამტკიცება მიიღო

Neratinib (Nerlynx) სახელწოდების მცირე მოლეკულის კლასის კიბოს საწინააღმდეგო საშუალება, მანამდე ანტი-HER2-ზე დაფუძნებული ორი ან მეტი ხაზის რეჟიმის მიმღებ, მეტასტაზური ან შორსწასული HER2-დადებითი ძუძუს კიბოს მქონე მოზრდილი პაციენტების სამკურნალოდ კაპეციტაბინის ქიმიოთერაპიასთან კომბინაციაში 25 თებერვალს, 2020 წელს, აშშ-ის სურსათისა და წამლების ადმინისტრაციამ (FDA) დაამტკიცა. შენიშვნა: ნერატინიბს ადრე, 17 ივლისს, 2017 წელს, ადრეული სტადიის HER2-დადებითი ძუძუს კიბოს ადიუვანტური მკურნალობის სახით ჰქონდა მიღებული FDA-ს დამტკიცება (იხილეთ შესაბამისი დამტკიცება).
NALA კვლევის დიზაინი
ნერატინიბის ეფექტურობა კაპეციტაბინთან ერთად შესწავლილ იქნა NALA-ში — რანდომიზებულ, მრავალცენტრულ, ღია კლინიკურ კვლევაში, რომელშიც მეტასტაზურ გარემოში ორი ან მეტი ანტი-HER2-ზე დაფუძნებული რეჟიმის მიმღები 621 პაციენტი მონაწილეობდა მეტასტაზური HER2-დადებითი ძუძუს კიბოთი. პაციენტები (1: 1) შემთხვევით გადანაწილდნენ. ყოველ 21-დღიან ციკლში პაციენტები წამლებს შემდეგი დოზებით იღებდნენ:
- ექსპერიმენტულ ჯგუფში, 21 დღის განმავლობაში დღეში ერთხელ პერორალურად ნერატინიბი 240 mg და 1-14. დღეებში კაპეციტაბინი 750 mg/m2 დღეში 2-ჯერ (307 პაციენტი), და
- საკონტროლო ჯგუფში, 21 დღის განმავლობაში ლაპატინიბი 1250 mg და 1-14. დღეებში კაპეციტაბინი 1000 mg/m2 დღეში 3-ჯერ (314 პაციენტი).
პაციენტებს მკურნალობდნენ დაავადების პროგრესირებამდე ან მიუღებელ გვერდით ეფექტამდე. ეფექტურობის პირველადი შედეგის საზომები იყო საერთო გადარჩენა და პროგრესირების გარეშე გადარჩენა. მნიშვნელოვანი მეორეული საზომები იყო ობიექტური პასუხის მაჩვენებელი და პასუხის ხანგრძლივობა.
კვლევის შედეგები
- კაპეციტაბინთან ერთად ნერატინიბის მიმღებ პაციენტებში მედიანური პროგრესირების გარეშე გადარჩენა 5.6 თვე იყო (95% CI: 4.9, 6.9), ხოლო კაპეციტაბინთან ერთად ლაპატინიბის მიმღებებში — 5.5 თვე (95% CI: 4.3, 5.6). საფრთხის თანაფარდობა: 0.76; 95% CI: 0.63, 0.93; p=0.0059.
- 12. თვეზე პროგრესირების გარეშე გადარჩენა, შესაბამისად, % 29 (% 95 CI: 23, 35) და % 15 (% 95 CI: 10, 20) იყო.
- მედიანური საერთო გადარჩენა ნერატინიბის ჯგუფში 21 თვე იყო (95% CI: 17.7, 23.8), ლაპატინიბის ჯგუფში კი — 18.7 თვე (95% CI: 15.5, 21.2). საფრთხის თანაფარდობა: 0.88; 95% CI: 0.72, 1.07; p=0.2086
- ობიექტური პასუხის მაჩვენებელი, შესაბამისად, %32.8 და %26.7 იყო, ნერატინიბის სასარგებლოდ.
- პასუხის მედიანური ხანგრძლივობა, შესაბამისად, 8.5 და 5.6 თვე იყო, ნერატინიბის სასარგებლოდ.
გვერდითი ეფექტები
ნერატინიბისა და კაპეციტაბინის ჯგუფში ნებისმიერი ხარისხის ყველაზე ხშირად აღწერილი გვერდითი ეფექტებია დიარეა, გულისრევა, ღებინება, მადის დაქვეითება, ყაბზობა, დაღლილობა / ასთენია, წონის კლება, თავბრუსხვევა, ზურგის ტკივილი, ართრალგია, საშარდე გზების ინფექცია, ზედა სასუნთქი გზების ინფექცია, მუცლის შებერვა, თირკმლის უკმარისობა და კუნთების სპაზმი. ყველაზე ხშირად აღწერილი 3 ან 4 ხარისხის გვერდითი ეფექტებია დიარეა, გულისრევა, ღებინება, დაღლილობა და მადის დაქვეითება. - დაკავშირებული თემა: თავად კიბოთი ან მისი მკურნალობით გამოწვეული დიარეა — რატომ ჩნდება, როგორ მკურნალობენ? შორსწასული ან მეტასტაზური ძუძუს კიბოსთვის ნერატინიბის რეკომენდებული დოზაადღეში სულ 240 mg (დღეში 1-ჯერ საკვებთან ერთად პერორალურად მიღებული 6 ტაბლეტი). რადგან დიარეა გავრცელებული გვერდითი ეფექტია, ნერატინიბის მკურნალობასთან ერთად პირველი 56 დღის განმავლობაში ლოპერამიდის მსგავსი დიარეის საწინააღმდეგო დამხმარე მკურნალობის რუტინული დანიშვნაც რეკომენდებულია. *
როგორია ნერატინიბის მოქმედების მექანიზმი?
ნერატინიბი არის ტიროზინკინაზის ინჰიბიტორი. ის ადამიანის ეპიდერმული ზრდის ფაქტორის რეცეპტორების (EGFR, HER2, HER4) უჯრედშიდა ნაწილის ტიროზინკინაზურ აქტივობას შეუქცევადად თრგუნავს და ამგვარად კიბოს უჯრედში ზრდისა და გამრავლების სიგნალებს ბლოკავს.
წყაროები
fda.gov - 25 Feb 2020
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.