ოქტრეოტიდი წვრილი ნაწლავის მეტასტაზური ნეიროენდოკრინული სიმსივნეების მკურნალობაში იმედს იძლევა

ოქტრეოტიდი LAR (Sandostatin LAR, Novartis), წვრილი ნაწლავის მეტასტაზური ნეიროენდოკრინული სიმსივნეების განვითარებას ანელებს.

წვრილი ნაწლავის ნეიროენდოკრინული სიმსივნეები იშვიათი კიბოებია და მათი 50% ავთვისებიანია (მალიგნური). წვრილი ნაწლავის ნეიროენდოკრინული სიმსივნეების უმეტესობა ვრცელდება და ასეთ დროს მედიკამენტური მკურნალობა სარგებელს არ იძლევა. ქიმიოთერაპიაზე პასუხი მხოლოდ პანკრეასის სიმსივნეებში დაფიქსირდა.

ავთვისებიანი (მალიგნური) სიმსივნეების ნახევარი კარცინოიდული სიმსივნეა. წვრილ ნაწლავში განვითარებული კარცინოიდული სიმსივნეების დაახლოებით 20% სხეულის შორეულ უბნებში ვრცელდება. დიაგნოზის დროს შორეული მეტასტაზების მქონე პაციენტებში 5-წლიანი გადარჩენის მაჩვენებელი დაახლოებით 27%-ია.

გასტროენტეროპანკრეასული ნეიროენდოკრინული სიმსივნეების დროს სიმპტომების საკონტროლოდ გამოყენებული ოქტრეოტიდი LAR სომატოსტატინის ანალოგია, რომელიც ზრდის ჰორმონის გამოყოფის შეჩერებით სიმსივნის განვითარებას აფერხებს. ოქტრეოტიდის უჯრედული ზრდის შემაფერხებელი მოქმედების შესასწავლად წარსულში კვლევები ჩატარდა. მათში NET-ზე ოქტრეოტიდის მსგავსი ხანგრძლივად მოქმედი სომატოსტატინის ანალოგების გავლენას სწავლობდნენ, რათა კარგად დიფერენცირებული მეტასტაზური ნეიროენდოკრინული სიმსივნეების განვითარება გაეკონტროლებინათ, თუმცა მკაფიო შედეგი ვერ მიიღეს.

მკაფიო შედეგის მისაღებად ჩატარებულ ბოლო კვლევაში NET-ზე ოქტრეოტიდი LAR-ის გავლენა უფრო დეტალურად შეისწავლეს. კვლევაში ჩაერთო წვრილი ნაწლავის ნეიროენდოკრინული სიმსივნის დიაგნოზის მქონე 85 პაციენტი 2001 წლის ივლისიდან 2008 წლის იანვრამდე; იზომებოდა დაავადების პროგრესირებამდე დრო. მკურნალობა გრძელდებოდა, სანამ CT-ით (კომპიუტერული ტომოგრაფიით) ან MRI-ით (მაგნიტურ-რეზონანსული გამოსახვით) სიმსივნის ზრდა არ დადგინდებოდა.

კვლევის ბოლოს აღმოჩნდა, რომ პრეპარატმა დაავადების პროგრესირების დრო ორჯერ მეტად შეანელა და ღვიძლის აგრესიული მეტასტაზების არმქონე პაციენტებში უჯრედული ზრდის შემაფერხებელი მოქმედებაც გამოავლინა. ოქტრეოტიდის მიმღებ პაციენტებში კიბოს პროგრესირებამდე დრო 14 თვე იყო, არმიმღებებში კი 6 თვე. პრეპარატის მთავარი მოქმედება სიმსივნის სტაბილურად შენარჩუნებაა. ოქტრეოტიდის მიმღები 42 პაციენტიდან 28-ში, ხოლო არმიმღები 43 პაციენტიდან 16-ში სიმსივნე ზრდის გარეშე სტაბილური დარჩა. ამასთან, ოქტრეოტიდის ჯგუფში კიბოს პროგრესირების მაჩვენებელი უფრო დაბალი იყო. ოქტრეოტიდი LAR-ის მიმღებ პაციენტებში სიმსივნის ზრდის რისკი პრეპარატის არმიმღებ ჯგუფთან შედარებით 67%-ით შემცირდა.

გასტროინტესტინური კიბოს სიმპოზიუმზე საზოგადოებისთვის წარდგენილმა კვლევის შედეგებმა დაადასტურა, რომ ოქტრეოტიდს შეუძლია წვრილი ნაწლავის მეტასტაზური ნეიროენდოკრინული სიმსივნეების განვითარება შეანელოს.

კვლევის ამ შედეგებმა აჩვენა, რომ ოქტრეოტიდი საკმაოდ ეფექტურია წვრილი ნაწლავის მეტასტაზური ნეიროენდოკრინული სიმსივნის მქონე პაციენტებში. პრეპარატმა შეანელა სიმსივნის განვითარება და გაახანგრძლივა საერთო სიცოცხლე წვრილი ნაწლავის მეტასტაზური NET-ის მქონე, ღვიძლის აგრესიული მეტასტაზების არმქონე პაციენტებში. ოქტრეოტიდი LAR-ის არმიმღებ თითქმის ყველა პაციენტს პროგრესირების შემდეგ ოქტრეოტიდი მისცეს, თუმცა ღვიძლის აგრესიული მეტასტაზების არმქონე პაციენტებში საერთო სიცოცხლის ხანგრძლივობის სარგებელი არ გამოვლინდა.

მონაცემებმა აჩვენა, რომ წვრილი ნაწლავის კარგად დიფერენცირებული მეტასტაზური ნეიროენდოკრინული სიმსივნეების დროს ოქტრეოტიდი შეიძლება სტანდარტულ მკურნალობად ჩაითვალოს. გავრცელებული NET-ის დროს, როცა ქიმიოთერაპია დიდად ეფექტური არ არის, დაავადებაზე დადებითი მოქმედების მქონე ოქტრეოტიდი უნდა განვიხილოთ სამკურნალო არჩევანად, რომელიც სიმსივნის განვითარების შემაფერხებელ მეთოდებს გზას გაუკვალავს.

დაკავშირებული თემა:

- ნეიროენდოკრინული სიმსივნის ნიშნები, სტადიები და მკურნალობა