ორსულ ქალებში კიბოს სიხშირე იზრდება
16 ივნისს 2022 წელს JAMA Oncology-ში გამოქვეყნებული კვლევის მიხედვით, აშშ-ში კიბოს მქონე ორსული პაციენტების სიხშირე იზრდება და ამგვარად დიაგნოზირებული პაციენტებისთვის დაავადების უფრო არასასურველი შედეგების რისკიც მნიშვნელოვნად მატულობს.
მკვლევრებმა დაადგინეს, რომ კიბოს თანმხლები ორსულობის პრევალენტობა 2016 წლიდან 2019 წლამდე 13,8%-ით გაიზარდა.
შენიშვნა: პრევალენტობა არის მაჩვენებელი, რომელიც განსაზღვრულ პერიოდში (მაგალითად, 1 წელიწადში) მოსახლეობაში დაავადების გავრცელების სიხშირეს ასახავს. კიბოს შემთხვევაში პრევალენტობა აღნიშნავს, მაგალითად, ამ დიაგნოზის მქონე პაციენტების რაოდენობას ყოველ 100 ათას ადამიანზე.
გარდა ამისა, კიბოს მქონე ორსულ პაციენტებს, კიბოს არმქონე პაციენტებთან შედარებით, საავადმყოფოში ყოფნისას დამატებითი პრობლემებისა და სიკვდილის უფრო მაღალი რისკი ჰქონდათ.
ამ მიგნებების მისაღებად მკვლევრებმა 2016 წლის იანვრიდან 2019 წლის დეკემბრამდე პერიოდში 14,6 მილიონზე მეტი პაციენტის ჩანაწერი გააანალიზეს.
კიბოს თანმხლები ორსულობის პრევალენტობა 100000 მშობიარობაზე 69,3 შემთხვევას შეადგენდა. პრევალენტობა 2016 წელს 100000 მშობიარობაზე 64,5 შემთხვევიდან 2019 წელს 100000-ზე 73,4-მდე გაიზარდა (განსხვავება სტატისტიკურად მნიშვნელოვანი იყო, p <0,001).
ყველაზე ხშირად აღრიცხული კიბოს სახეობები იყო ძუძუს კიბო, ლიმფომა, ლეიკემია და გინეკოლოგიური (ქალებისთვის დამახასიათებელი) კიბოები. შესწავლილ პერიოდში გაიზარდა კანის, რბილი ქსოვილების, ძუძუსა და პირის ღრუს/ხახის კიბოს ყოველწლიური ახალი შემთხვევების რაოდენობა.
მკვლევრებმა კიბოს მქონე და არმქონე პაციენტების შედეგები შეადარეს. მონაცემებმა აჩვენა, რომ კიბოს მქონე პაციენტებს მშობიარობამდე საავადმყოფოში ყოფნისას მძიმე ავადობისა და სიკვდილის უფრო მაღალი რისკი ჰქონდათ.
ორსულობისას განვითარებული მძიმე დამატებითი ჯანმრთელობის პრობლემების პრევალენტობა კიბოს მქონე პაციენტებში 1000 მშობიარობაზე 97,4, ხოლო კიბოს არმქონე პაციენტებში 1000 მშობიარობაზე 17,3 იყო.
მშობიარობისთვის საავადმყოფოში ყოფნისას სიკვდილიანობის პრევალენტობა კიბოს მქონე პაციენტებში 1000 მშობიარობაზე 2,2, ხოლო კიბოს არმქონე პაციენტებში 1000 მშობიარობაზე 0,1-ზე ნაკლები იყო.
მკვლევრებმა ამ კვლევის რამდენიმე შეზღუდვაზე მიუთითეს, მათ შორის კიბოს სტადიის, კიბოს საწინააღმდეგო მკურნალობისა და მშობიარობის დროს დაავადების მდგომარეობის შესახებ ინფორმაციის ნაკლებობაზე. მონაცემთა ნაკრები ასევე არ შეიცავდა ინფორმაციას სიკვდილის მიზეზის, ონკოლოგიური შედეგების, ახალშობილთა შედეგების ან გაწერის შემდგომი პერიოდის შესახებ.
დასკვნის სახით, ეს კვლევა მნიშვნელოვან მტკიცებულებას იძლევა, რომ ერთ დასავლურ ქვეყანაში ორსულობისას კიბოს სიხშირე იზრდება. ზრდის მიზეზები ამ კვლევაში არ გამოვლენილა. პირველ შესაძლო მიზეზად უფრო გვიან ასაკში დაორსულება განიხილება, თუმცა მხოლოდ ეს მიზეზი ლეიკემია-ლიმფომის გაზრდილი სიხშირის ასახსნელად საკმარისი არ იქნება. მომავალმა კვლევებმა შეიძლება ამ მდგომარეობის მიზეზებზე გაამახვილოს ყურადღება.
*
- დაკავშირებული თემა: საშუალო ასაკში საყლაპავის კიბოს სიხშირის მნიშვნელოვანი ზრდა
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.