შეიძლება ალტერნატიული მედიცინის ძიების მიზეზი საკმარისი და სწორი მეორე აზრის წყაროების გამოუყენებლობა იყოს?

კვლევა ჩატარდა გინეკოლოგიური, ანუ ქალებისთვის სპეციფიკური კიბოების მქონე პაციენტებში, რომლებიც მეორე აზრს ეძებდნენ და დამატებითი და ალტერნატიული მედიცინის გამოყენებისკენ იყვნენ მიდრეკილი.

ქალის რეპროდუქციულ ორგანოებს კიბოს 5 ძირითადი ტიპი შეიძლება შეეხოს: საშვილოსნოს ყელის (ცერვიქსის), საკვერცხის, საშვილოსნოს, საშოსა და ვულვის. მათ ერთ ჯგუფად განიხილავენ და გინეკოლოგიურ კიბოებს უწოდებენ.

კვლევაში გინეკოლოგიური კიბოს მქონე 191 პაციენტს 1 წელი აკვირდებოდნენ. დიაგნოზის შემდეგ 80-მა (41.9%) სპეციალისტის მეორე აზრი მიიღო, ხოლო 89-მ (46.6%) დამატებითი და ალტერნატიული მედიცინა გამოიყენა. ეს ტენდენციები უმეტესად შორსწასულ კიბოში, რადიოთერაპიის მიმღებ და მაღალი განათლების მქონე პაციენტებში გამოვლინდა. ასევე მეორე აზრის მაძიებლები ასეთ პროდუქტებს უფრო ხშირად იყენებდნენ. პაციენტების %80-ს მათი გამოყენება ექიმისთვის არ უთქვამს.

კვლევა გვაფიქრებინებს, რომ გინეკოლოგიური კიბოს მქონე პაციენტებში სპეციალისტის მეორე აზრის ძიება ხშირია და ისინი იმავდროულად დამატებით და ალტერნატიულ მიდგომებსაც ეძებენ.

მიუხედავად იმისა, რომ კვლევა თითქოს მეორე აზრის ძიებასა და ალტერნატიულ მედიცინას შორის კავშირს უსვამს ხაზს, ჩვენი აზრით ვითარება სხვაა. საუკეთესო მკურნალობის მაძიებელი პაციენტი ან ახლობელი მეორე აზრით თუ ვერ დაკმაყოფილდა, ეს სურვილი, როგორც კვლევაში ჩანს, მნიშვნელოვნად შეიძლება ალტერნატიული მედიცინის ძიებაში გადაიზარდოს.

რაც უფრო შეზღუდულია კიბოს მქონე პაციენტებისა და ოჯახებისთვის სწორი მეორე აზრის წყაროები, მით უფრო მეტია კომერციული მიზნებით მომუშავე ალტერნატიული მკურნალების წინაშე აღმოჩენის ალბათობა. ეს მკურნალობის შანსს შეამცირებს და სიცოცხლის დაკარგვის ალბათობის წინაშე დააყენებს.