Alternativ tibb axtarışının səbəbi yetərli və düzgün ikinci rəy mənbələrindən faydalanmamaq ola bilərmi?

Bu tədqiqat ikinci rəy axtaran və tamamlayıcı və alternativ tibbdən faydalanmağa meyilli olan ginekoloji, yəni qadınlara xas xərçəngləri olan xəstələr arasında aparılıb.

5 əsas xərçəng tipi qadının reproduktiv orqanlarına təsir edə bilər: uşaqlıq boynu (serviks), yumurtalıq (over), uşaqlıq (uterus), vaginal və vulval xərçənglər. Bu xərçənglər bir qrup kimi qiymətləndirilir və  ginekoloji xərçənglər  adlandırılır.

Aparılan tədqiqatda ginekoloji xərçəngi olan 191 xəstə 1 il ərzində izlənilib. Bu xəstələrin 80-i (41.9%) xərçəng diaqnozu aldıqdan sonra səhiyyə mütəxəssislərindən ikinci rəy alarkən, 89-nun (46.6%) tamamlayıcı və alternativ tibbdən faydalandığı görülüb. Araşdırmada ikinci rəy almaq və tamamlayıcı və alternativ tibbdən faydalanmaq meylinin əsasən irəliləmiş mərhələdə xərçəngi olan, radioterapiya ilə müalicə edilən və ali təhsilli ginekoloji xərçəng xəstələrində müşahidə olunduğu müəyyən edilib. Bundan başqa, səhiyyə mütəxəssislərindən ikinci rəy almaq axtarışında olan xəstələrin tamamlayıcı və alternativ tibb məhsullarından daha çox faydalandığı müşahidə edilib. Xəstələrin %80-i bu cür tamamlayıcı məhsullardan istifadə etdiklərini həkimlərinə deməyib.

Aparılan araşdırma ginekoloji xərçəng xəstələrində mütəxəssislərdən ikinci rəy almaq axtarışının tez-tez görüldüyünü və bu xəstələrin eyni zamanda tamamlayıcı və alternativ tibb tətbiqləri ilə bağlı da axtarışda olduqlarını düşündürür.

Bu tədqiqat ikinci rəy axtarışı ilə alternativ tibb meyli arasında əlaqə olduğunu vurğulayır kimi görünsə də, fikrimizcə vəziyyət fərqlidir. Ən yaxşı müalicə axtaran xərçəng xəstəsi və ya yaxınları ikinci rəylə qane olmadıqda, tədqiqatda görüldüyü kimi, bu ikinci rəy istəyi əhəmiyyətli dərəcədə alternativ tibb axtarışına yönələ bilər.

Xərçəng xəstələrinin və ailələrinin qarşılaşa biləcəkləri düzgün ikinci rəy mənbələri nə qədər məhdud olsa, kommersiya məqsədilə çalışan alternativ tibb tətbiqçiləri ilə qarşılaşma ehtimalları bir o qədər artacaq. Bu da müalicə şanslarını azaldacaq və həyatlarını itirmə ehtimalı ilə üz-üzə qoyacaq.