Antioksidantlar xərçəngi öldürmür, tətikləyir

Nobel mükafatı laureatı, məşhur alim və DNT-nin ikisarmallı quruluşunu kəşf edənlərdən biri olan James Watson xərçəng haqqında diqqətçəkən açıqlamalar verir. Watson antioksidantların xərçəngi öldürmək əvəzinə tətikləyə biləcəyinə diqqət çəkir. Genetik mühəndislik sahəsindəki tədqiqatları ilə tanınan Watson xərçənglə mübarizədə istifadə olunan bəzi antioksidantların xəstəliyi tətikləyə biləcəyini bildirir.

Watson sərbəst oksigen radikalları mövzusuna da toxunur. Bu radikallar oksidləşdirici stressə səbəb olaraq hüceyrələrin birləşmələrini parçalayır, DNT-də də pozulmalara yol aça bilir. DNT-dəki pozulma hüceyrələrin ölməsinə səbəb ola bilər və xərçəng hüceyrələri də bir növ zədələnmiş hüceyrə olduğuna görə antioksidant qəbul edilməsi ilə oksidləşdirici stress azaldılaraq onların ölümə getməsinin qarşısı alına bilər. Lakin Watsona görə, vəziyyət bu qədər sadə deyil və radioterapiya ilə bir çox kimyaterapiya növü xərçəng hüceyrələrini aradan qaldırmaq üçün oksigen radikalları yaradır. Yəni antioksidantların istifadəsi kimyaterapiyanın təsirini azalda bilər.

Watsonun hesabatı son vaxtlar aparılan tədqiqatlarla da dəstəklənir. Nature jurnalında dərc olunan məqalədə antioksidantların xərçəngin daha sürətlə yayılmasına səbəb ola biləcəyi müəyyən edilib.

Watson xərçəng müalicəsində yeni səhifə açacaq hədəfin Myc zülalı ola biləcəyini bildirir. Hüceyrələr daxilində 1000-dən çox molekulu idarə edən bu zülalın xərçənglə əlaqəli olduğu düşünülür.

Lakin Watsona görə xərçəng müalicəsində ən böyük maneə mühafizəkar tədqiqatların aparılmasıdır. Əgər bu şəkildə davam edərsə, xərçəng müalicəsi həmişə 10, hətta 20 il sonra mümkün olacaq.

Nəticə olaraq, xərçəng müalicəsində elmi irəliləyişləri izləmək və alternativ tibb marketoloqlarının bitki mənşəli dərmanlarından istifadə ilə bağlı ehtiyatlı olmaq lazımdır. Xərçəngin vahid bir xəstəlik olmadığı və yüzdən çox başlıq altında, demək olar ki, minlərlə alt tipinin olduğu unudulmamalıdır. Xərçəng müalicəsi üçün istifadə olunan dərmanların həkim nəzarəti altında qəbulu həyati əhəmiyyət daşıyır.