Biorezonans nədir? Xərçəng müalicəsində yeri varmı?

Biorezonans nədir?

Biorezonans orqanizmin elektrik tarazlığındakı pozuntuları aşkarlayaraq xəstəliklərin diaqnozunun qoyulduğu və bu tarazlığın bərpası ilə xəstəliklərin sağaldıldığı iddiasına əsaslanan üsuldur. 1977-ci ildə alman həkim Franz MOrell və mühəndis Erich RAsche tərəfindən irəli sürülən üsul MORA terapiyası da adlanır. Bu üsulda xəstə toxumaların normal toxumalardan fərqli elektromaqnit dalğası yaydığı və elektron cihazlarla bu fərqlərin aşkarlanaraq xəstəliklərin diaqnozunun qoyula bildiyi iddia edilir. Bu baxımdan elektrodermal test adlandırılır. Həmçinin bu elektromaqnit tezliklərinin tərsinə çevrilib verildikdə anormal toxuma və hüceyrələri düzəltdiyi, beləcə xəstəlikləri sağaltdığı irəli sürülür. Bu baxımdan həm də müalicə üsulu kimi təqdim edilir. Hətta şəxs xəstə olmasa belə normal toxumalardan gələn tezliklərin tərsinə çevrilmədən verilməsinin orqanları gücləndirdiyi iddia olunur. Beləliklə xəstəliklərdən qorunmağa kömək etdiyi müdafiə edilir.

Necə tətbiq olunur və hansı hallar üçün istifadə edilir?

Biorezonans terapiyasının geniş yayılmış tətbiq formasına görə;

Əvvəlcə xəstənin tarixçəsi alınır və sadə fiziki müayinə aparılır. Sonra xüsusi olduğu iddia edilən qan testi edilir. Qan testi ilə allergenlərin, mikroorqanizmlərin, xərçəng hüceyrələrinin tezlik kodlarının araşdırıldığı deyilir. Daha sonra elektron cihaza bağlı elektrodlar bədənə yerləşdirilərək seans başlanır. Seanslar bitdikdən sonra təsirin davamı üçün sağlam tezliklə yükləndiyi deyilən çip bədənə yapışdırılır.

Bu üsulun müxtəlif allergiyalar, astma, atopik dermatit (ekzema), revmatik xəstəliklər, psixoloji problemlər və xərçəng başda olmaqla bütün sağlamlıq problemlərində təsirli olduğu bildirilir. Xərçəngdə xüsusilə kimyaterapiya və radioterapiyanın effektivliyini artırıb yan təsirlərini azaltdığı irəli sürülür. Biorezonansın ən çox istifadə olunduğu sahələrdən biri də siqareti tərgitdirmədir.

Təsir mexanizmi nədir?

Biorezonansın deyilən heç bir təsiri elmi əsaslara bağlana bilməmişdir. Anormal toxuma və ya hüceyrələrin fərqli elektromaqnit dalğaları yayması nəzəriyyəsi heç cür sübut olunmamış; həmçinin toxumalardan gələn fərqli elektromaqnit dalğaları olsa belə bu cihazların onları ayırd edib ölçə bilməyəcəyi göstərilmişdir.

Biorezonansın xərçəngdəki təsirləri isə şiş basqılayıcı P53 geninə əsaslandırılır. Orqanizmdə şiş yaranmasının qarşısını almaqda ən mühüm gen olan p53 geninin mutasiyası bir çox xərçəng növünün inkişafında əsas rol oynayır. Biorezonansın da xərçəng xəstələrində basqılanmış bu geni yenidən aktivləşdirib xərçəng hüceyrələrinin bədəndə təbii yollarla öldürülməsini təmin etdiyi iddia edilir. P53-ün xərçəngdə bu təsiri uzun illərdir geniş məlumdur. Buna görə p53 geninin aktivləşdirilməsi bir çox alternativ tibb şarlatanının da ən çox istifadə etdiyi arqumentə çevrilmişdir. Heç bir təsiri göstərilməyən çoxsaylı məhsul və üsul p53 genini aktivləşdirdiyi arqumenti ilə satılır. Biorezonans da bunlardandır. Biorezonansın p53 genini aktivləşdirdiyinə dair heç bir sübut yoxdur. Həmçinin bu cihazların bunu necə etdiyinə heç bir elmi izah verilə bilmir. İnsanların mövzu üzrə yetərsiz biliyindən faydalanaraq belə tibbi terminlərlə açıqlamalar edilir və insanların daha asan razı salınması təmin olunur.

Biorezonansın təsirləri üzrə tədqiqatların nəticələri nələrdir?

Biorezonans aparıcı qurum və təşkilatlar tərəfindən alternativ və tamamlayıcı tibb üsulu kimi qəbul edilmir, "psevdoelm" daxilində qiymətləndirilir. Psevdoelm; elmi arqumentlərlə irəli sürülən, lakin elmi əsaslara söykənməyən və elmi araşdırmalarla dəstəklənə bilməyən inanc, məlumat və tətbiqlər toplusudur.

Amerika Xərçəng Cəmiyyəti icmal tədqiqatı ilə biorezonansın xərçəng xəstələrində heç bir müsbət təsiri olmadığı nəticəsinə gəlmiş və xəstələri biorezonansla müalicə axtarmamaq barədə xəbərdar etmişdir. Amerika Qida və Dərman İdarəsi (FDA) də sağlamlığa faydası barədə əsassız iddialarla bu elektron cihazları satan bəzi şirkətləri məhkəməyə vermişdir.

Aparıcı tibb jurnallarından Lancet-də dərc edilmiş məqalədə 1990-cı illərin əvvəlində həkim və texniklərdən ibarət tədqiqat qruplarının biorezonans cihazlarını yoxladığı bildirilir. Testlər nəticəsində cihazların kiçik kompüter prosessoru olan sadə cihazlar olduğu və hər hansı sağlamlıq probleminə diaqnoz qoymasının və ya müalicə etməsinin mümkün olmadığı qənaətinə gəlindiyi göstərilir.

2003-cü ildə dərc edilmiş, elektrodermal test də adlandırılan biorezonans testlərinin allergik xəstəliklərdə təsirini qiymətləndirən icmalda elektrodermal testlərin allergenləri aşkarlamaq üçün istifadə edilə bilən üsul olmadığı göstərilmişdir. 2010-cu ildə dərc edilmiş başqa tədqiqatda da oxşar nəticələr alınmışdır. Digər tədqiqatda isə dəri allergiya testi ilə ev tozu gənəsi, pişik tükü kimi allergenlərdən birinə allergiyası olan 15 şəxs və bunlara allergiyası olmayan 15 şəxsə elektrodermal test tətbiq edilərək üsulun ətraf mühit allergiyalarını aşkarlama təsiri qiymətləndirilmişdir. Nəticədə biorezonansın ətraf mühit allergiyalarını aşkarlaya bilmədiyi görülmüşdür.

Atopik dermatitli (ekzema) 32 uşağın iştirakı ilə aparılan tədqiqatda biorezonansın dəri şikayətlərini və yuxu problemlərini azaltmaqda heç bir fayda vermədiyi, qandakı allergiya göstəricilərində də dəyişiklik yaratmadığı görülmüşdür. Saman qızdırması olan yetkinlərin iştirakı ilə başqa tədqiqatda da biorezonansın diaqnostik və ya müalicəvi təsiri görülməmişdir. Nüfuzlu tibb qurumlarından "Mayo Klinik" də biorezonansın atopik dermatitdə təsirli olduğuna yetərli sübut olmadığını bildirir.

Biorezonansın ən çox istifadə olunduğu sahələrdən biri də siqareti tərgitdirmədir. Biorezonansın bu təsirinə dair də heç bir elmi əsas yoxdur. Bu üsulla siqareti tərgitdiyini deyənlərin tərgitməsini təmin edən əslində plasebo təsiridir. Yəni üsulun siqareti tərgitdirdiyinə inanmaq şəxsin psixoloji olaraq siqareti tərgitmə meylini artırır. Burada siqareti tərgitməyi təmin edən biorezonans deyil, şəxsin üsulun bunu edəcəyinə inancıdır.

Ədəbiyyatda biorezonansın müsbət təsirlərini bildirən bir neçə tədqiqat vardır. Lakin bunlar metodoloji baxımdan çox əskik və etibarlı jurnallarda yer tapa bilməyən tədqiqatlardır. 2013-cü ildə dərc edilmiş tədqiqatda elektrodermal testlərin depressiya xəstələrində intihar meylini aşkarlamaqda təsirli olduğu bildirilmişdir. Lakin sonradan bu tədqiqatın hesablamalarının yanlış və araşdırmanın aldadıcı olduğu göstərilmişdir.

Biorezonans təhlükəsiz üsuldurmu?

Biorezonans tətbiqçilərinin ən əsas arqumentlərindən biri üsulun heç bir yan təsirinin olmaması, ağrısız, acısız və dərmansız olmasıdır. Buna görə uşaqlara, hətta hamilələrə də tətbiq oluna biləcəyi bildirilir. Deyildiyi kimi bu üsulda təsiri göstərilməyən elektron cihaz və çip istifadə olunur. Bu məqamda əlbəttə heç bir təsiri olmayan üsulun yan təsirinin də olmaması son dərəcə təbiidir. Digər tərəfdən bu üsul insanların sağlamlıq problemlərinin əsas müalicəsini almamasına səbəb olaraq ciddi nəticələr də yarada bilər. Həmçinin bu üsula edilən gərəksiz xərclər insanı iqtisadi baxımdan da zərərə salır. Buna görə üsulun tam zərərsiz və təhlükəsiz olduğunu demək doğru deyil.

Bəs onda nə etmək lazımdır?

Ədəbiyyata baxdıqda biorezonansın çox nəzərə alınan üsul olmadığı, bir çox nüfuzlu tibb jurnalı və qurumun hətta qiymətləndirmədiyi görünür. Belə ki, tətbiqçilərin biorezonansla etdiklərini iddia etdikləri elmilik bir yana, məntiqdən də tam uzaqdır. Rəy bildirən qurumların da üsulu qətiyyən tövsiyə etmədiyi görünür. Mövcud təsirli müalicələrin dayandırılmasına səbəb ola bilməsi və iqtisadi yükü də nəzərə alındıqda heç zərəri olmadığını demək çətindir. Bəzi tamamlayıcı tibb üsullarının müəyyən müsbət təsirləri göstərilmişdir və bunlar müasir tibblə inteqrasiya edilərək xəstələrə uyğun təqdim olunmalıdır. Lakin biorezonans bu üsullardan deyil. Tam aldatmaya, plasebo təsirinə əsaslandığı aydın bilinən üsullardandır. Burada bu üsuldan tam uzaq durmağınız və tibbi ifadələrlə sizi inandırmağa çalışanlara etibar etməməyimiz son dərəcə vacibdir.