Bir vaxtlar çox nadir görülən xəstəlik: Ağciyər xərçəngi!

Ağciyər xərçəngi dünyada xərçəngə bağlı həyat itkilərinin aparıcı səbəbi kimi bir çox şəxsə və ailəsinə təsir edən mühüm sağlamlıq problemidir. Artıq çox yaxşı məlum olduğu kimi, ağciyər xərçəngi çox vaxt tütün istifadəsi nəticəsində yaranır, lakin ağciyər xərçəngi riskini artıran başqa amillər də mövcuddur. Bir vaxtlar ağciyər xərçəngi çox nadir xəstəlik idi; belə ki, həkimlər ağciyər xərçəngli xəstə gördükdə peşə həyatlarında çox nadir görüləcək vəziyyətlə qarşılaşdıqlarını düşünürdülər. Bəs nə oldu ki, ağciyər xərçəngi ictimai sağlamlıq probleminə çevrildi?

18 əsrin sonunda başlayan sənaye inqilabı, maşınla siqaret istehsalı və kütləvi marketinq nəticəsində siqaret vərdişi populyarlaşdı. Bununla birlikdə ağciyər xərçəngi demək olar ki, dünyada epidemiya xəstəliyinə çevrildi.

Xüsusilə Dünya müharibələri ilə siqaret istifadəsi zirvəyə çatdı. Eyni dövrlərdə siqaretin zərərlərinə işarə edən elmi tədqiqatların nəticələri açıqlanmağa başlanmışdı. Siqaret istehsalçıları isə satışlarını xilas etmək üçün elmi tədqiqatların nəticələrinin mübahisəli olduğu iddiası ilə ictimai təbliğata və reklam kampaniyalarına başladılar. Bu reklamların afişalarında həkimlər və hətta körpələr təsvir edildi. Siqaret istehsalçılarının əks-təbliğatı və güclü lobbi fəaliyyəti bir müddət də siyasi qarşılıq tapdı və milyonların sağlamlığına böyük zərərlər verilməyə davam edildi. Hazırda siqaret istifadəsinə bağlı ağciyər xərçəngindən hər il 1.5 milyon həyat itkisi baş verir və siqaret istifadə nisbətləri azalmasa, bu rəqəmin 2020-ci illərdə ildə 2 milyona çatacağı təxmin edilir. Siqaret istifadəsini azaltmağa yönəlmiş bir çox tədbirlə yanaşı açıq siqaret reklamı etmək də bir çox ölkədə qadağan edilmişdir. Lakin bu zərərli istehlakı tam dayandırmaq üçün daha çox çətin addım atılmalıdır.

Diqqətçəkən siqaret statistikası:

• Yeni nəsil siqaret istehsalı maşınları dəqiqədə 20 000 ədəd siqaret istehsal edə bilir
• Satılan hər 1 siqaret istehsalçısına 1 cent qazandırır
• 3 və ya 4 milyon ədəd siqaret ağciyər xərçənginə bağlı 1 həyat itkisi deməkdir
• 1 siqaret çəkən şəxs ömrü boyunca siqaret istehsalçısına orta hesabla 10 000 dollar qazandırır

Siqaret bu yüksək nisbətlərdə istifadə olunmağa davam etdikcə ən çox ağciyər xərçəngi haqqında danışmağa və yazmağa davam edəcəyik. Keçən il nəticələri açıqlanan və saytımızda təfərrüatlarından danışdığımız bəzi tədqiqatlar ağciyər xərçəngli xəstələr üçün ümid işığı olmuşdur. İmmunoterapiya başlığı altında tanınan bu dərmanlar münasibətilə saytımızın ağciyər xərçəngi bölməsini yenilədik.

İndi gəlin birlikdə ağciyər xərçəngini bütün tərəfləri ilə araşdıraq...