Body Outline - bədən şablonu: ağrı şikayəti olan xərçəng xəstələri üçün ünsiyyət vasitəsi və art-terapiya üsulu

Xərçəngli xəstələrin müxtəlif dərəcəli fiziki ağrılarını yüngülləşdirmək üçün hər il aparılan yeni araşdırmalarla art-terapiya üsulları inkişafını davam etdirir. Memorial Sloan-Kettering Xərçəng Mərkəzinin hazırlayıb sınadığı art-terapiya üsulu ilə xərçəngin xəstələrə ağrı verən tərəflərini üzə çıxarmaq və xəstələrin özlərini daha yaxşı ifadə etmələri hədəflənib. Bu yazımızda Memorial Sloan-Kettering Xərçəng Mərkəzinin Art-terapiya və Psixiatriya şöbəsinin hazırladığı art-terapiya yeniliyi olan bədən şablonu (Body Outline) üsulunu və klinik tədqiqatını birlikdə nəzərdən keçirək.

Üsul

Xəstələrə hazır bədən şablonu (body outline) verilir və ya özləri də çəkə bilərlər. Bu forma üzərində iş seansları təxminən 45 dəqiqədir. Xəstələr bu müddətdə yalnız xarici cizgiləri olan bədən formasının içini doldurmağa təşviq edilir. Bunun üçün rəngli karandaş, pastel boya, akvarel və ya müxtəlif rəngli kağızlarla kollaj üsulundan istifadə edə bilərlər. Seçilən rənglərlə xarici cizgiləri verilmiş bu bədən formasının içini istədikləri kimi rəngləyib yeni formalar yaratmaları, həndəsi xətlər və ya üzvi teksturalar kimi sərbəst üsullardan istifadə etmələri istənilir.

Nəticə

60-ı qadın, 10-u kişi, ümumilikdə 70 xərçəngli xəstə ilə sınanan bu araşdırmadan müxtəlif nəticələr əldə edilib. 70 xəstənin hamısının bədən təsvirlərinin bir-birindən çox fərqli olduğu müşahidə edilib.

Bütün xəstələrin işlərinə görə yaranan əsərlər üç əsas qrupda araşdırıla bilər:

1. Fiziki ağrını vizuallaşdırma,
2. Duyğularla ünsiyyət qurma,
3. Məna/anlayış axtarışı.

Bədən şablonu məşğələsinin çox çevik üsullarla tətbiq edilə bilməsi və terapevtik xüsusiyyəti xərçəngli xəstələr üçün faydalı texnikadır. Həm mücərrəd simvolik xüsusiyyətlər daşıdığı, həm də bədənin real əksini ehtiva etdiyi üçün araşdırma nəticələrinə görə tövsiyə olunan üsul olub. Son illərdə art-terapevtlərin xərçəng xəstələrinə tövsiyə etməli olduğu mühüm üsullardan birinə çevrilib. İfadə və özünü büruzə vermə ehtiyacını ən asan qarşılamağa kömək edən Body Outline ilə fiziki ağrını təsvir edərkən emosional hisslərin təfərrüatlarını belə vermək mümkün olur. Bu, xəstələrin anlaşılmasını asanlaşdıraraq rahatlıq hissi yaradır.

Özünüz sınamaq istəsəniz aşağıdakı bədən şablonunu çap edib və ya özünüz çəkib bədəninizdə ağrını ən çox hiss etdiyiniz nahiyələrə fokuslanaraq rəng və xətlərlə anlatmağa çalışa bilərsiniz. Mümkünsə ən azı A4 kağızı ölçüsündə və kağızı dolduracaq böyüklükdə olsun. Eyni bədən forması ilə ayrı kağızda, başqa vaxt ikinci dəfə sınayaraq narahatlığınızı ən çox harada hiss edirsinizsə, bunu əks etdirməyə çalışa bilərsiniz.