D.D. Palmer və kiropraktik (kayropraktik) tətbiq 1895 

Həkim Edward Schneider belə yazmışdı: "Amerikalılar kiropraktorlara böyük maraq göstərirlər. Kiropraktora müraciət etmək ehtimalımız digər alternativ qulluq göstərənlərə müraciət etməkdən daha yüksəkdir."

Buna görə bu sağlamlıq xidməti bu kitabda yer almağa layiqdir.

Kayropraktik tətbiq 1895-ci ildə Daniel “D.D.” Palmerin bir kişinin kürəyini manipulyasiya edərək eşitməsini yaxşılaşdırdığını iddia etməsi ilə başlamışdır. Keçmiş arıçı və baqqal olan Palmer kayropraktika fikrini vəfat etmiş bir həkimin ruhundan aldığını yazmışdır.

1860-cı illərdə irəli sürülmüş Louis Pasteurun xəstəliklərin mikrob nəzəriyyəsi yaxşı tanınırdı. Lakin hələ də qəribə müalicələrin aparıldığı, məşhur patent dərmanların rəngarəng adlar və şişirdilmiş iddialarla satıldığı dövrdə yaşayan Palmer belə deyirdi:  

"Kiropraktorlar yoluxucu hesab edilən hər xəstəliyin onurğa beyninə təsir etdiyini müşahidə etmişlər. Onurğa sütununda hər xəstəliyə uyğun çıxıntı tapa bilərsiniz. Əgər yüz çiçək xəstəliyi hadisəsi olsa, bir nəfərdə hara baxmalı olduğunuzu göstərə bilərəm və digər doxsan doqquzunda da eyni yerə baxdıqda ortaq cəhəti görəcəksiniz.” 

Palmerin oğlu B.J. də kiropraktik müalicənin öncüllərindən biri idi.

Bu gün kiropraktika adətən onurğa sütununun və digər oynaqların manipulyasiyası ilə dayaq-hərəkət ağrısının və başqa xəstəliklərin müalicəsini əhatə edir. Ənənəvi kiropraktorlar bədənin və orqanlarının fəaliyyətinə mane olan onurğa oynağı disfunksiyasının bir növü sayılan vertebral subluksasiyaya tez-tez istinad etmişlər. 

Palmer əvvəlcə subluksasiyaların sinir sıxılmasına səbəb olduğunu fərz etdi. Lakin sonralar onların sinirləri həddindən artıq boş və ya gərgin etdiyini irəli sürdü. Bununla da əlaqəli orqanların sağlamlığına təsir göstərdiklərini söylədi. 

Bu gün bir çox müasir kiropraktor uyğun olduqda əsas tibbi yanaşmalardan istifadə edir. Ağrıkəsici təsir baxımından kayropraktik müalicədə plasebo effektinin nə dərəcədə rol oynadığına dair müzakirələr davam edir.

Məqalə şəklinin təsviri: Chester Paciorekin 1956-cı il tarixli bu tablosunda D.D. Palmer 1895-ci ildə Harvey Lillard üzərində kiropraktik tətbiq aparır.

Məqalədə adı çəkilən tarixi şəxslər: Daniel David “D.D.” Palmer (1845–1913), Bartlett Joshua “B.J.” Palmer (1882–1961)

• Əvvəlki mövzu: Taun 1894 – Tanrının qəzəbi, qara ölüm
• Növbəti mövzu: Rentgen şüaları 1895 – İnsan bədəninin o tərəfi