Əllə hiss edilən kütlədən başqa süd vəzi xərçənginin əlamətləri hansılardır?

Süd vəzində əllə hiss edilən kütlə süd vəzi xərçənginin ən çox rast gəlinən əlamətidir. Bununla yanaşı, qadınlarda və kişilərdə süd vəzi xərçənginin əllə hiss edilən kütlədən başqa əlamətləri də var.

Bəzi insanlarda isə süd vəzi xərçəngi heç bir əlamət və ya şikayət yaratmır, lakin mammoqrafiya kimi süd vəzi xərçəngi skrininqində aşkarlana bilər.

Bu yazıda süd vəzində nəzərəçarpan düyün/kütlə olmadan yarana biləcək süd vəzi xərçənginin digər əlamət və tapıntılarını bölüşdük.

Bu əlamət və tapıntılar xərçəngdən kənar səbəblərlə də əlaqəli ola bilər. Lakin bu əlamətləri olan insanlar həm xərçəngsiz, həm də xərçəngli vəziyyətləri yoxlamaq üçün lazımi testlərə görə həkimə müraciət etməlidirlər.

1. Dərinin quruluşunda dəyişikliklər

Dəri dəyişiklikləri süd vəzi xərçənginin erkən əlaməti ola bilər.

Süd vəzi xərçəngi dəri hüceyrələrində quruluş dəyişikliklərinə gətirə biləcək dəyişikliklərə və iltihaba səbəb ola bilər. Bu quruluş dəyişikliklərinə nümunələr bunlardır:

• areola (gilə) dərisində dəyişiklik, məsələn, qabıqlanma
• süd vəzinin hər hansı yerində dərinin qalınlaşması

Daha nadir hallarda qaşınma da süd vəzi xərçəngi ilə əlaqəli ola bilər.

Bu dəri dəyişiklikləri Paget xəstəliyi adlanan nadir süd vəzi xərçəngi növünün əlaməti ola bilər.

Quruluş dəyişiklikləri dermatit və ekzema daxil olmaqla xoşxassəli dəri vəziyyətlərinin nəticəsində də yarana bilər.

2. Süd vəzi giləsindən axıntı

İnsanın süd vəzi giləsindən südvermə dövründən kənarda axıntı ola bilər; az və ya çox, şəffafdan süd rənginə, sarı, yaşıl və ya qırmızı rəngədək.

Süd verən insanlarda gilədən südəbənzər axıntı normaldır, lakin başqa xüsusiyyətli gilə axıntısı varsa, həkimə görünmək tövsiyə edilir.

Anormal gilə axıntılarının çoxu infeksiya kimi xərçəngsiz səbəblərə bağlı olsa da, bəzi insanlarda süd vəzi xərçənginə işarə edə bilər.

Süd vəzi axıntısının digər mümkün səbəbləri bunlardır:

• süd vəzi infeksiyaları
• doğuşa nəzarət həblərinin əlavə təsiri
• bəzi dərmanları qəbul etməyin əlavə təsiri
• bədən fiziologiyasında dəyişikliklər
• qalxanabənzər vəz xəstəliyi kimi bəzi tibbi vəziyyətlər

3. Çuxurlaşma

Dəridə çuxurlaşma bəzən aqressiv süd vəzi xərçəngi növü olan iltihabi süd vəzi xərçənginin əlaməti ola bilər. Xərçəng hüceyrələri süd vəzində limfa mayesinin yığılmasına, həmçinin çuxurlaşmaya və ya dərinin çuxurlaşmasına səbəb ola bilər. Dəri çuxurlaşmasını görən hər kəsin həkimlə danışması vacibdir.

4. Limfa düyünü dəyişiklikləri

Xərçəng hüceyrələri qoltuqaltı limfa düyünlərinə gedərək onların şişməsinə səbəb ola bilər.

Limfa düyünləri mayeni süzən və potensial zərərli hüceyrələri tutan kiçik, oval immun sistemi toxuması yığıntılarıdır. Limfa düyünləri bakteriya, virus və xərçəng hüceyrələrinə reaksiya olaraq şişə bilər.

Xərçəng hüceyrəsi süd vəzindən ayrılarsa, ilk getdiyi yer təsirlənmiş süd vəzi ilə eyni tərəfdəki qoltuqaltı limfa düyünü nahiyəsidir. Bu, həmin nahiyədə şişməyə səbəb ola bilər.

Qoltuqaltındakı şişmiş limfa düyünlərinə əlavə olaraq insan bunları körpücük sümüyünün ətrafında görə bilər. Adətən kiçik, sərt, şişmiş düyünlər/kütlələr kimi hiss edilir.

Bununla yanaşı, limfa düyünü dəyişiklikləri süd vəzi infeksiyaları və ya tamamilə əlaqəsiz digər xəstəliklər səbəbindən də görülə bilər.

İnsan bu dəyişikliklər haqqında həkimlə danışmalıdır ki, mümkün səbəb müəyyən edilə bilsin.

5. Süd vəzi və ya gilə ağrısı

Süd vəzi xərçəngi ağrı, həssaslıq və narahatlıq hissinə gətirən dəyişikliklərə səbəb ola bilər. Süd vəzi xərçəngi adətən ağrısız olsa da, süd vəzi xərçəngi ilə bağlı ola biləcək heç bir əlamət və ya şikayət nəzərdən qaçırılmamalıdır.

Bəzi insanlar ağrını yanma hissi kimi təsvir edə bilər.

6. Süd vəzində çəkilmə və ya struktur dəyişikliyi

Süd vəzi xərçəngi xüsusilə dəriyə yaxın yerdə yarananda süd vəzi dərisində çəkilməyə səbəb ola bilər; hətta süd vəzi toxumasının dərinliyindəki böyük kütlə də struktur dəyişikliklərinə səbəb ola bilər.

Gilələrin görünüşü adətən ovulyasiya və ya aybaşı dövrünün müxtəlif vaxtlarında dəyişə bilər, lakin insanlar gilədə hər hansı yeni dəyişiklik barədə həkimə görünməlidirlər.

7. Qızartı

Süd vəzi xərçəngi dərinin rənginin dəyişməsinə səbəb ola bilər. Dəri qırmızı, bənövşəyi və ya maviyə çalan rəngdə ola bilər.

İnsan bu dəyişiklikləri izah edən süd vəzi travması keçirməyibsə, həkiminə görünməlidir. Travma olduğu halda belə süd vəzində rəng dəyişikliyi aradan qalxmırsa, yenə tibbi yardım nəzərdən keçirilməlidir.

8. Şişkinlik

Süd vəzi xərçəngi bütün süd vəzinin və ya bir hissəsinin şişməsinə səbəb ola bilər. Bu şişkinlikdən sonra aydın düyün olmaya bilər, lakin süd vəzi digərindən fərqli ola bilər.

İnsanların çoxunda süd vəzilərinin ölçüləri fərqlidir; buna baxmayaraq, normal süd vəzi ölçüsündən daha böyük dəyişiklik varsa, bu vəziyyət nəzərdən qaçırılmamalıdır.

Şişkinlik səbəbindən dəri gərgin hiss edilə bilər.

Nə zaman həkimə görünmək lazımdır?

Əsas olan süd vəzindəki hər hansı dəyişikliyi həkiminizə bildirməkdir.

İnsanlar süd vəzi dəyişikliklərini görəndə təşvişə düşməməli və qorxmamalıdırlar. Yaşlanma, hormon səviyyələrində dəyişikliklər və digər amillər insanın həyatı boyunca süd vəzi toxumasında dəyişikliklərə gətirə bilər.

Lakin insanlar sağlamlıqları barədə məlumatlı olmalı və süd vəzisində hər hansı şikayətin səbəbini müəyyən etmək üçün həkimə müraciət etməlidirlər.

Yuxarıda sadalanan səkkiz dəyişikliyin hər biri üçün, xüsusilə bu dəyişikliklər aşağıdakılardan biri ilə əlaqəli görünmürsə, həkimə müraciət edilməlidir:

• aybaşı dövrü
• süd vəzi travması
• süd vəzi infeksiyası

Həkiminiz şikayətləri qiymətləndirə, təsirlənmiş süd vəzini və ya hər ikisini müayinə edə və lazım gəlsə əlavə testlər tövsiyə edə bilər. İnfeksiyanı və ya digər mümkün səbəbləri istisna etmək üçün mammoqrafiya, ultrasəs, digər görüntüləmə testləri və ya qan testləri tövsiyə edə bilər.

- Əlaqəli mövzu: Mammoqrafiyaya neçə yaşında başlanmalı, hansı tezliklə edilməlidir?

Nəticə

Süd vəzi xərçənginin ən çox rast gəlinən əlaməti əllə hiss edilən kütlədir; bununla yanaşı, süd vəzi xərçəngi gilədə və süd vəzi dərisinin digər hissələrində dəri dəyişikliklərini ehtiva edən əlamət və tapıntılara səbəb ola bilər. Bir çox vəziyyət (kist, infeksiya, ekzema və dermatit kimi) potensial olaraq süd vəzi dəyişikliklərinə səbəb ola bilər. Yeni və nəzərəçarpan dəyişikliklər üçün həkimə görünmək hər hansı süd vəzi dəyişikliyinin narahatedici olub-olmadığını müəyyən etməyə kömək edə bilər.