Müsbət duyğular iltihabı azaldaraq sağlamlığımızı dəstəkləyir

Psixi sağlamlığımızın bədən sağlamlığımıza təsir etdiyini hamımız bilirik. Bəs bunu necə edir?
Müsbət psixologiyalı, xoşbəxt, enerjili, sakit və rahat şəxslərin orqanizmində iltihab səviyyələrinin özünü bədbəxt hiss edən insanlardan daha aşağı olduğu müəyyən edilmişdir. Bədəndə aşağı iltihab səviyyəsi erkən ölümlərə səbəb ola bilən damar tutulması, revmatizmlə bağlı narahatlıqlar, osteoporoz və diabet kimi xroniki xəstəliklərin riskini azaldan və sağlam həyata bir az daha yaxınlaşdıran amildir.
İnflamasiya, enflamasiya, yangı və ya xalq arasında tanınan adı ilə iltihablanma canlı toxumanın hər cür canlı, cansız yad amilə və ya daxili / xarici toxuma zədəsinə verdiyi bir sıra cavablardır.
Yaşanan xoşbəxtliklərin çox fərqli növləri vardır. Müxtəlif müsbət əhval hallarını yaşamaq şəxsin psixoloji narahatlıqlara qarşı müdafiəsizliyini azalda bilər.
Tədqiqatçılar mövzu üzrə daha çox məlumat əldə etmək və toplamaq üçün 40-65 yaşlarında 175 yetkini 30 günlük tədqiqatda hər gün qiymətləndirmişlər. Hər axşam iştirakçılara həmin gün ən güclü yaşadıqları xoşbəxtlik, coşqu, sevinc, canlılıq, fəallıq və ya güclülük kimi 16 müxtəlif hiss və duyğunu dərəcələndirən şkalalar tətbiq edilmişdir. Eyni şəkildə 16 mənfi duyğu da qeydə alınmışdır. Bunların bəziləri qorxu, məyusluq, bədbəxtlik, stress, əsəbilik və ya utanc idi. 6 ay sonra aparılmış qan testlərində iltihab səviyyələrinə təsir edən amillər qiymətləndirilmişdir.
Test nəticələrinə görə mənfi duyğularını daha çox ifadə edən şəxslərdə iltihab səviyyələrində hər hansı dəyişiklik olmamış, demək olar eyni qalmışdır.
Digər tərəfdən isə müsbət duyğularını daha çox ifadə edən şəxslərin qan nəticələrinə görə iltihab səviyyələrinin azaldığı görülmüşdür.
Nəticə olaraq müsbət duyğuların iltihabı azaltdığı müşahidə edilmiş və bu vəziyyət qan testləri ilə də təsdiqlənmişdir. Mənfi duyğuları əvəz edən müsbət duyğular və xoşbəxt hiss etmək insanların təbii emosional fəaliyyəti və bədən sağlamlığı üçün əhəmiyyətlidir. Yaxşı hiss etmək və xoşbəxt olmaq üçün sizə yaxşı təsir edən fəaliyyətlər / hobbilərlə məşğul olmağı, sevdiklərinizlə daha çox vaxt keçirməyi, özünüzə vaxt ayırmağı tövsiyə edirik.
Mənbələr
Emodiversity and Biomarkers of Inflammation.
Emotion, Jun 2017
Bu məqalə sizə faydalı oldu?
Rəyiniz məzmunumuzu yaxşılaşdırmağa kömək edir.





Oxucu şərhləri
Şərhinizi paylaşın
Adınız və şərhiniz yalnız administrator təsdiqindən sonra dərc olunur. E-poçt ünvanınız ziyarətçilərə heç vaxt göstərilmir.
İlk şərhi siz yazın.