Piylənmə artıq siqaretdən daha çox həyat itkisinə səbəb olur

Yeni tədqiqata görə piylənmənin siqaret və tütün məhsullarından %47 daha çox həyat itkisinə səbəb olduğu, yüksək təzyiqin də siqaretə oxşar nisbətlərdə həyat itkisi yaratdığı açıqlanıb.

İndiyədək aparılmış tədqiqatlar siqaretin qarşısı alına bilən ölüm və xərçəng səbəbləri arasında ilk yerdə olduğunu göstərib. Piylənmə isə siqaretdən sonra ən mühüm səbəb sayılır və tədqiqatlar piylənmənin gələcəkdə ilk yeri tuta biləcəyinə işarələr verirdi. Ötən günlərdə bu mövzunu dəstəkləyən yeni araşdırmanın ilkin nəticəsi mətbuatla paylaşılıb.

Cleveland Clinic və Nyu-York Universitetinin Tibb Fakültəsində aparılmış tədqiqatda 2014-cü ilin məlumatlarından istifadə edilərək Amerika əhalisində həyat itkisi riskini artıran, qarşısı alına və dəyişdirilə bilən səbəblər araşdırılıb. Bu ilkin tədqiqatda həyat itkisinə səbəb olan, dəyişdirilə və azaldıla bilən amillər arasında (ən güclü səbəbdən zəifə doğru) ilk 5 yeri piylənmə, diabet (şəkərli diabet), siqaretçəkmə, yüksək təzyiq və yüksək xolesterinin tutduğu açıqlanıb.

Bu tədqiqatda diqqətçəkən məqamlardan biri əvvəllər qarşısı alına bilən ölüm səbəbləri arasında ilk yerdə olan siqaretin siyahıda daha aşağıda olmasıdır. Lakin bu, qətiyyən siqaretin artıq daha az zərərli olması kimi şərh edilməməlidir. Nəticəni xüsusilə Amerikada piylənmə nisbətlərinin artması, cəmiyyətin demək olar ki, yarısının piylənməsi olan və artıq çəkili hala gəlməsi kimi şərh etmək düzgün olar. Siqareti tərgitdirmə siyasətlərinin də təsiri var.

Təqdim edilmiş bu ilkin hesabatdakı mühüm məlumatlardan biri də həyat itkisinə səbəb olan ilk 5 yerin 3-ünü təşkil edən diabet, yüksək təzyiq və yüksək xolesterin kimi səbəblərin müalicə edilə və ya qarşısı alına bilən səbəblər olmasıdır. Buna görə xəstələrin müalicə seçimlərinin və müalicəyə göstərəcəkləri uyğunluğun ömür müddətlərinə güclü töhfə verəcəyi aydındır.

Piylənmə bu gün bütün dünya insanlarının demək olar ki, ən mühüm sağlamlıq probleminə çevrilir

Bu tədqiqatın ilkin nəticəsi çox diqqətçəkəndir və piylənmənin yaxın gələcəkdə insanları gözləyən ən mühüm sağlamlıq problemi olacağının sübutu olması baxımından vacibdir. Piylənmə ilə mübarizədə özümüzün, uşaqlarımızın və digər yaxınlarımızın gözəl həyat üçün sağlam qidalanma vərdişləri (Oncotrust Aralıq dənizi pəhrizi tövsiyə edir) və müntəzəm idman barədə dəstəklənməsi çox mühüm addım olacaq.

Hamımızın sağlamlığına aid və ömür müddətləri barədə məlumatları olan bu mühüm tədqiqat hələ tamamlanmayıb. Tədqiqatçılar ilkin hesabatı təqdim edilmiş bu sahədə işlərə, mövzu barədə nəticələri analiz etməyə və inkişaf etdirməyə hələ davam edir. Tədqiqat nəticələri açıqlandıqca sizinlə paylaşmağa davam edəcəyik.