Prezervativ 1564 – Hamiləlikdən qorunma üsullarının uzun keçmişi

Mayalanmanın və hamiləliyin qarşısını almaq üsullarının uzun tarixi var. Qədim misirlilər hamilə qalmamaq üçün timsah nəcisini balla qarışdırıb vaginaya yerləşdirirdilər. Prezervativlər və digər maneə vasitələri / baryerlər hamiləlik göstəricisini və sifilis, qonoreya kimi cinsi yolla keçən xəstəliklərin (hər ikisinə bakteriyalar səbəb olur), eləcə də İnsan İmmunçatışmazlığı Virusunun (HIV) səbəb olduğu Qazanılmış İmmunçatışmazlığı Sindromunun (AIDS) yayılmasını azaltmaq üçün tarix boyu məşhur olub. Hazırda lateks, poliuretan, quzu bağırsağı və ya digər materiallardan hazırlanmış prezervativlər adətən penisin üzərinə keçirilir.

Prezervativin rəsmi dərc edilmiş ilk təsvirlərindən biri 1564-cü ildə italyan həkim Gabriele Falloppio-nun sifilisdən qoruyan kətan örtüyü təsvir etməsi ilə ortaya çıxdı. De Morbo Gallico sifilis sınaqları haqqında belə yazır: "Təcrübəni 1100 kişi üzərində sınadım və heç birinin yoluxmadığına şahidlik üçün ölməz Tanrını çağırıram." Məşhur venesiyalı macəraçı, yazıçı və qadın düşkünü Giacomo Casanova təbii dəridən prezervativlər istifadə edib onları "insanın ağlını rahatladan ingilis atçılıq paltoları" adlandırırdı. İlk rezin prezervativ 1855-ci ildə istehsal edildi və New York Times ilk prezervativ reklamını 1861-ci ildə dərc etdi. 1920-ci illərdə hazırlanmış lateks prezervativlər rezindən daha nazik idi və istehsalı daha az əmək tələb edirdi. 1930-cu illərdə maşınlardan istifadə edən avtomatik prezervativ istehsal xətləri fəaliyyətə başladı.

Prezervativ istifadəsi tarix boyu məhdudlaşdırılıb və ya qanunsuz olub. Qısaca, 1873-cü ildə ABŞ-ın Comstock qanunu poçtla satılan prezervativlərin poçt idarəsi tərəfindən müsadirəsinə icazə verdi. 1890-cı ildə əvvəlcə dəri prezervativ istehsal edən məşhur Nyu-York müəssisəsinə rəhbərlik edən Julius Schmidt evində təxminən 700 prezervativ saxladığı üçün həbs edildi. Almaniya 1941-ci ildə mülki şəxslərin prezervativ istifadəsini qadağan etdi. Prezervativlər 1978-ci ilə qədər İrlandiyada qanuni satıla bilməzdi.

Yazıdakı şəklin izahı: Giacomo Casanova (solda) və həmkarı prezervativlərini şişirdərək dəlik olub-olmadığını yoxlayırlar. Mémoires, écrits par lui-même əsərində qravür (1872).

Yazıda adı çəkilən tarixi şəxslər: Gabriele Falloppio (1523–1562), Giacomo Girolamo Casanova de Seingalt (1725–1798)

• Əvvəlki mövzu: De Praestigiis Daemonum 1563 – Şeytanların hiylələri haqqında
• Növbəti mövzu: Doğuş maşası 1580 – Pul və şöhrət arzusunun həyatla mübarizəsi