3 კიბოს პრეპარატი, რომელთა დამტკიცებასაც FDA-სგან 2024 წლის აგვისტოში ელიან

2024 წლის აგვისტოში FDA-ს (აშშ-ის სურსათისა და მედიკამენტების ადმინისტრაცია) გადაწყვეტილებას შემდეგი 3 ონკოლოგიური პრეპარატის შესახებ ელიან:

1. აფამიტრესგენ ოტოლოსელი (afami-cel) შორსწასული სინოვიური სარკომისთვის,
2. linvoseltamab რეციდიული ან მკურნალობისადმი რეზისტენტული მრავლობითი მიელომისთვის და
3. axatilimab ქრონიკული ტრანსპლანტატი მასპინძლის წინააღმდეგ დაავადებისთვის.

Afami-cel შორსწასული სინოვიური სარკომისთვის

FDA-მ პრიორიტეტული განხილვისთვის მიიღო afami-cel-ის ბიოლოგიური პრეპარატის ლიცენზიის განაცხადი (BLA= ბიოლოგიური პრეპარატის ლიცენზიის განაცხადი, biologics license application) შორსწასული სინოვიური სარკომის სამკურნალოდ. Afami-cel აუტოლოგიური T უჯრედული თერაპიაა, რომელიც შეიქმნა MAGE A4 ცილის მატარებელ სოლიდურ სიმსივნეებში კიბოს უჯრედების მიზანში ამოსაღებად.

აუტოლოგიური T უჯრედული თერაპია, პროცედურაა, რომლის დროსაც პაციენტის საკუთარი იმუნური უჯრედები (T უჯრედები) გამოაქვთ, ლაბორატორიაში გენეტიკურად ცვლიან და შემდეგ კვლავ პაციენტს უბრუნებენ. ეს მკურნალობა T უჯრედებს საშუალებას აძლევს, კიბოს უჯრედები უფრო ეფექტიანად ამოიცნონ და გაანადგურონ. მიუხედავად იმისა, რომ ის სისხლისა და ლიმფის კიბოებში წლების განმავლობაში ეფექტიანად გამოიყენება, სოლიდურ (ქსოვილებიდან და ორგანოებიდან წარმოშობილ) კიბოებში ეფექტიან უჯრედულ მკურნალობას მხოლოდ ახლა ვხედავთ.

BLA განაცხადს ამყარებს ფაზა 2 SPEARHEAD-1 კვლევის 1. ჯგუფში მიღებული მონაცემები. ეს კვლევა შემუშავდა afami-cel-ის შესაფასებლად მეტასტაზური ან არაოპერაბელური სინოვიური სარკომის მქონე 44 პაციენტსა და მიქსოიდური/მრგვალუჯრედოვანი ლიპოსარკომის მქონე 8 პაციენტში, რომლებსაც HLA-A*02 შესაბამისობა და MAGE A4 დადებითობა ჰქონდათ.

დაკავშირებული თემა: იმუნოთერაპია სარკომაში — არსებული მონაცემები და იმედისმომცემი სტრატეგიები

პაციენტებს მანამდე მკურნალობის მედიანურად 3 ხაზი ჰქონდათ მიღებული. კვლევაში ყველა პაციენტმა afami-cel-ის ერთი დოზა მიიღო, ხოლო 20 პაციენტმა ხიდისებური მკურნალობა მიიღო.

სინოვიური სარკომის მქონე პაციენტებს შორის

• პასუხის მაჩვენებელი 39% იყო, ხოლო პასუხის ხანგრძლივობის მედიანა 11,6 თვე იყო.
• მედიანური პროგრესირების გარეშე გადარჩენა 3,8 თვე და
• მედიანური საერთო გადარჩენა 16,9 თვე იყო.

პაციენტთა მთელ ჯგუფში მკურნალობასთან დაკავშირებული ყველაზე გავრცელებული 3. ან უფრო მაღალი ხარისხის არასასურველი მოვლენები იყო ლიმფოპენია (96%), ნეიტროპენია (85%) და ლეიკოპენია (81%).

ქვემოთ მოცემულ გამოსახულებაზე ნაჩვენებია, როგორ მოქმედებს უჯრედულ დონეზე ინჟინერიით შექმნილი T-უჯრედული რეცეპტორის (TCR) თერაპია, როგორიცაა Afami-cel.

1. სამიზნე ცილის განსაზღვრა: Afami-cel ამოიცნობს სამიზნე ცილას, როგორიცაა MAGE A4, რომელიც განსაკუთრებით კიბოს უჯრედებში გვხვდება, ხოლო ნორმალურ უჯრედებში იშვიათია.
2. ცილის დამუშავება: სამიზნე ცილა უჯრედში არსებული პროტეასომის მიერ იშლება და პეპტიდურ ფრაგმენტებად იყოფა.
3. HLA-პეპტიდური კომპლექსის წარმოქმნა: დამუშავებული პეპტიდური ფრაგმენტები უჯრედის ზედაპირზე არსებულ HLA (Human Leukocyte Antigen — ადამიანის ლეიკოციტური ანტიგენი) მოლეკულებს უკავშირდება. ეს კომპლექსი უჯრედის ზედაპირზე გადაიტანება, რათა T-უჯრედებმა ამოიცნონ.
4. TCR-ით ამოცნობა და ურთიერთქმედება: ინჟინერიით შექმნილი T-უჯრედების ზედაპირზე არსებული T-უჯრედული რეცეპტორები (TCR) ამოიცნობს ამ HLA-პეპტიდურ კომპლექსს და კიბოს უჯრედებს სპეციფიკურად უკავშირდება.
5. მოქმედება კიბოს უჯრედების წინააღმდეგ: TCR-ების HLA-პეპტიდურ კომპლექსთან შეკავშირება იწვევს T-უჯრედების გააქტიურებას კიბოს უჯრედების გასანადგურებლად. ამ აქტივაციის შედეგად კიბოს უჯრედები იხოცება და, შესაბამისად, სიმსივნე მცირდება ან ქრება.

Linvoseltamab რეციდიული/მკურნალობისადმი რეზისტენტული მრავლობითი მიელომისთვის

FDA განიხილავს linvoseltamab-ის ბიოლოგიური პრეპარატის ლიცენზიის განაცხადს რეციდიული ან მკურნალობისადმი რეზისტენტული მრავლობითი მიელომის მქონე ზრდასრულთა სამკურნალოდ. განაცხადს ამყარებს ფაზა 1/2 LINKER-MM1 კვლევის მონაცემები.

ეს კვლევა შემუშავდა BCMA-CD3-ზე მიმართული ბისპეციფიკური ანტისხეულის, linvoseltamab-ის შესაფასებლად რეციდიული (განმეორებითი) ან მკურნალობისადმი რეზისტენტული მრავლობითი მიელომის მქონე პაციენტებში, რომელთა დაავადებაც პროგრესირებდა მკურნალობის სულ მცირე 3 წინა ხაზის შემდეგ, პროტეასომის ინჰიბიტორის, იმუნომოდულატორული პრეპარატისა და anti-CD38 ანტისხეულის ჩათვლით.

კვლევაში მონაწილე 117 პაციენტის შეფასება იყო შესაძლებელი, ხოლო დაკვირვების მედიანური ხანგრძლივობა 11,1 თვე იყო.

• ობიექტური პასუხის მაჩვენებელი 71% იყო,
• პაციენტების 46%-მა სრული ან უკეთესი პასუხი,
• ხოლო 62%-მა ძალიან კარგი ნაწილობრივი ან უკეთესი პასუხი მიიღო.
• სრულ პასუხამდე დროის მედიანა 7,9 თვე იყო, ხოლო ნაწილობრივ პასუხამდე — 2,6 თვე.

პასუხის ხანგრძლივობის მედიანა, პროგრესირების გარეშე გადარჩენა და საერთო გადარჩენა მიღწეული არ იყო. 12 თვეზე პასუხის შენარჩუნების ალბათობა 78% იყო, 12 თვეზე ცოცხლად ყოფნის ალბათობა — 74,5%, ხოლო 12 თვეზე ცოცხლად და პროგრესირების გარეშე ყოფნის ალბათობა — 68,8%.

მკურნალობასთან დაკავშირებული ყველაზე გავრცელებული არასასურველი მოვლენები იყო ციტოკინების გამოთავისუფლების სინდრომი (46,2%), ნეიტროპენია (41,0%) და ანემია (38,5%).

Axatilimab ქრონიკული GVHH-სთვის

FDA განიხილავს axatilimab-ს, CSF-1R-ზე მიმართულ მონოკლონურ ანტისხეულს, ქრონიკული GVHH-ს სამკურნალოდ იმ პაციენტებში, რომლებსაც მანამდე სისტემური მკურნალობის სულ მცირე 2 ხაზი აქვთ მიღებული.

განაცხადს ამყარებს ფაზა 2 AGAVE-201 კვლევის მონაცემები. ამ კვლევაში ჩაერთო 241 ზრდასრული და პედიატრიული პაციენტი, რომლებსაც GVHH-ს გამო მანამდე სისტემური მკურნალობის 4 ხაზი ჰქონდათ მიღებული.

პაციენტები შემთხვევითად განაწილდნენ axatilimab-ის შემდეგი დოზების მისაღებად: 0,3 mg/kg ყოველ 2 კვირაში (80 პაციენტი), 1 mg/kg ყოველ 2 კვირაში (81 პაციენტი) ან 3 mg/kg ყოველ 4 კვირაში (80 პაციენტი).

მკურნალობის პირველი 6 ციკლის განმავლობაში,

• საერთო პასუხის მაჩვენებელი 0,3 mg/kg ჯგუფში 74% იყო, 1 mg/kg ჯგუფში — 67%, ხოლო 3 mg/kg ჯგუფში — 50%.

ჯგუფებში ყველაზე გავრცელებული არასასურველი მოვლენები იყო დაღლილობა, თავის ტკივილი და COVID-19.