ახალი ინფორმაცია კიბოს ტკივილისთვის იოგის, მასაჟისა და აკუპუნქტურის შესახებ

ახალი სამკურნალო გაიდლაინი ხაზს უსვამს, რომ ტკივილის მართვის ინტეგრაციულ (დამატებით) ტექნიკას, როგორიცაა მასაჟი, აკუპუნქტურა და მუსიკათერაპია, ზრდასრულებში კიბოს ტკივილის შემსუბუქებაში როლის შესრულება შეუძლია.

2022 წლის სექტემბერში Journal of Clinical Oncology ჟურნალში გამოქვეყნებული ეს ახალი რეკომენდაციები ექიმებს ტკივილის მართვის სხვადასხვა არაფარმაკოლოგიური სტრატეგიის შეთავაზებაში ეხმარება.

კიბოს ტკივილი ბევრი პაციენტისა და ექიმისთვის კლინიკური გამოწვევაა და სულ უფრო მეტი მტკიცებულება გვაქვს, რომ დამატებითი მკურნალობები ტკივილის მართვაში შეიძლება სასარგებლო იყოს.

თუმცა კლინიკური გაიდლაინები იმის შესახებ, თუ როდის გამოიყენება ან არ გამოიყენება ეს მიდგომები, არასაკმარისია და კიბოს ბევრი ცენტრი საკითხს სათანადოდ არ განიხილავს.

კიბოსთან დაკავშირებული ქრონიკული ტკივილის მართვის არსებული გაიდლაინები უმეტესად ტკივილის დიაგნოსტიკასა და ფარმაკოლოგიურ ჩარევებზე (მედიკამენტურ მკურნალობაზე) იყო ორიენტირებული.

ტკივილის დამატებითი მართვის ამ ახალ გაიდლაინში სპეციალისტები ორ მთავარ კითხვას განიხილავენ:

1. გონება-სხეულის რომელი თერაპიებია რეკომენდებული კიბოს დიაგნოზის მქონე ზრდასრულ და პედიატრიულ პაციენტებში ტკივილის სამართავად?
2. რომელი ბუნებრივი პროდუქტებია რეკომენდებული კიბოს დიაგნოზის მქონე ზრდასრულ და პედიატრიულ პაციენტებში ტკივილის სამართავად?

ექსპერტთა პანელმა ახალი გაიდლაინისთვის ლიტერატურა მიმოიხილა და 277 შესაბამისი კვლევა გამოავლინა. ეს მასალა მოიცავდა 1990-დან 2021 წლამდე გამოქვეყნებულ სისტემატურ მიმოხილვებსა და რანდომიზებულ კონტროლირებულ კვლევებს, რომლებშიც ტკივილის ინტენსივობასთან, ტკივილთან დაკავშირებული სიმპტომებისა და ჩივილების შემცირებასა და გვერდით მოვლენებთან დაკავშირებული შედეგები შეფასდა.

სპეციალისტებმა რეკომენდაციები არსებული მტკიცებულებების სიძლიერის საფუძველზე შეადგინეს. უფრო მყარი მტკიცებულებების მქონე მეთოდებთან დაკავშირებით პანელმა აკუპუნქტურის, რეფლექსოლოგიის, მასაჟისა და ჰიპნოზის შესახებ სხვადასხვა რეკომენდაცია გასცა. პანელმა:

• დაადგინა, რომ ძუძუს კიბოს მქონე პაციენტებში არომატაზის ინჰიბიტორებთან (მაგალითად, arimidex-სა და femara-სთან) დაკავშირებული სახსრის ტკივილისა და კიბოთი გამოწვეული ზოგადი ან კუნთ-სახსროვანი ტკივილისთვის აკუპუნქტურა შეიძლება რეკომენდებული იყოს.
• კიბოს სისტემური მკურნალობისას ტკივილისთვის რეფლექსოლოგია ან აკუპრესურა ურჩია.
• ჰიპნოზი ვარიანტია იმ პაციენტებისთვის, რომლებსაც კიბოს მკურნალობის ან დიაგნოსტიკური გამოკვლევის პროცედურებთან დაკავშირებული ტკივილი აქვთ; მასაჟი კი პალიატიური ან ტერმინალური/სიცოცხლის ბოლო ეტაპის მოვლისას ან ძუძუს კიბოს მკურნალობის შემდეგ არსებული ტკივილის ვარიანტია.

ამ რეკომენდაციების ძალა საშუალოდ შეფასდა და ისინი საშუალო ხარისხის მტკიცებულებებს ეფუძნებოდა, რომლებიც აჩვენებდა, რომ სარგებელი რისკებს აჭარბებს.

პანელმა რამდენიმე რეკომენდაციაც დაამატა, რომლებიც სუსტად მიიჩნია და დაბალი ხარისხის მტკიცებულებებს ეფუძნებოდა. ესენია ჰათა იოგა ძუძუს ან თავისა და კისრის კიბოს მკურნალობის შემდეგ ტკივილის მქონე პაციენტებისთვის და მუსიკათერაპია კიბოს ოპერაციის შემდეგ ტკივილის მქონე პაციენტებისთვის.

სპეციალისტებმა ასევე დაადგინეს, რომ ბუნებრივი პროდუქტების, მათ შორის ომეგა-3 ცხიმოვანი მჟავებისა და გლუტამინის რეკომენდებისთვის მტკიცებულება არ არსებობს.

იმუნოთერაპიისა და მიზნობრივი მკურნალობის მსგავსი მოწინავე ონკოლოგიური მკურნალობებით კიბოს დიაგნოზის მქონე პაციენტები უფრო დიდხანს ცხოვრობენ; ამიტომ ტკივილისა და სხვა გვერდითი მოვლენების მართვა ცხოვრების ხარისხის გასაუმჯობესებლად კრიტიკულად მნიშვნელოვანია. ახალი კლინიკური გაიდლაინი ექიმებს რეკომენდაციებს მისცემს, დროულად ჩართონ აკუპუნქტურისა და მასაჟის მსგავსი არაფარმაკოლოგიური მკურნალობები კიბოს მქონე პაციენტების ტკივილის მართვის გასაუმჯობესებლად.

ამასთან, მნიშვნელოვანია ვიცოდეთ, რომ ამ თერაპიების კლინიკურ პრაქტიკაში დანერგვა ყოველთვის მარტივი არ არის. ჯანდაცვის სისტემები ამჟამად მათი ჩამტარებელი ექიმების დაფინანსებისთვის მზად არ ჩანს. თუმცა დღეს, როცა ვსაუბრობთ, რომ „სიცოცხლის ხარისხი თვით სიცოცხლესავით მნიშვნელოვანია“, ვიმედოვნებთ, სადაზღვევო სისტემები ამ მკურნალობების დაფარვას დაიწყებს, რადგან მზარდი მტკიცებულებები კიბოს ტკივილის მართვაში მათ ეფექტიანობას აჩვენებს.