ახალმა CAR T-უჯრედულმა მკურნალობამ B-წინამორბედი უჯრედების ALL-ისთვის FDA-ის ნებართვა მიიღო

B-წინამორბედი უჯრედების რეციდივირებული ან მკურნალობისადმი რეზისტენტული მწვავე ლიმფობლასტური ლეიკემიის (ALL) მქონე ზრდასრული პაციენტებისთვის brexucabtagene autoleucel (Tecartus, Kite Pharma, Inc.) სახელწოდების CAR T-უჯრედულმა იმუნოთერაპიამ2021 წლის 1 ოქტომბერს FDA-ის (აშშ-ის სურსათისა და წამლის ადმინისტრაციის) ნებართვა მიიღო.

Brexucabtagene autoleucel-ის ეფექტიანობა შეფასდა ZUMA-3-ში — ერთჯგუფიან მულტიცენტრულ კვლევაში, რომელშიც B-წინამორბედი უჯრედების რეციდივირებული ან მკურნალობისადმი რეზისტენტული ALL-ის მქონე ზრდასრულებში შეისწავლეს brexucabtagene autoleucel, უჯრედის ზედაპირული მოლეკულის CD19-ის წინააღმდეგ მიმართული ქიმერული ანტიგენური რეცეპტორის (CAR) T-უჯრედული მკურნალობა. ლიმფოციტების შემამცირებელი ქიმიოთერაპიის დასრულების შემდეგ პაციენტებს brexucabtagene autoleucel-ის ერთჯერადი ინფუზია ჩაუტარდათ.

შენიშვნა: CD19 (Cluster of Differentation 19), CD19 გენით კოდირებული უჯრედის მემბრანის ცილაა. ის B-ლიმფოციტის ანტიგენის სახელითაცაა ცნობილი. ადამიანებში CD19 B უჯრედების ყველა ხაზში ექსპრესირდება. CD19 ადამიანის B უჯრედებში ორ მთავარ როლს ასრულებს: ერთი მხრივ, ციტოპლაზმური სასიგნალო ცილების მემბრანასთან მისაზიდად ადაპტორული ცილის ფუნქცია აქვს; მეორე მხრივ, B უჯრედის რეცეპტორის სასიგნალო გზების ზღურბლის შესამცირებლად CD19/CD21 კომპლექსის ფარგლებში მუშაობს. ყველა B უჯრედში არსებობის გამო ის B უჯრედებიდან წარმოშობილი ლეიკემიებისა და ლიმფომებისთვის მნიშვნელოვანი ბიომარკერიცაა და ყველაზე პოპულარული CAR T-უჯრედული სამიზნეც.

ZUMA-3 კვლევის დეტალები

ნებართვის მხარდასაჭერად გამოყენებული ეფექტიანობის შედეგების საზომები იყო შეყვანიდან 3 თვის განმავლობაში მიღებული სრული პასუხის მაჩვენებელი და სრული პასუხის ხანგრძლივობა.

• ეფექტიანობის მხრივ შესაფასებელი 54 პაციენტიდან 28-მა 3 თვის განმავლობაში სრულ პასუხს მიაღწია (52%; 95% სანდოობის ინტერვალი: 38-66).
• მოპასუხეებზე მედიანურად 7,1 თვის განმავლობაში დაკვირვების შემდეგ პასუხის მედიანური ხანგრძლივობა ჯერ მიღწეული არ იყო; შეფასებით, პაციენტების ნახევარზე მეტისთვის სრული პასუხის ხანგრძლივობა 12 თვეს აჭარბებდა.

Brexucabtagene autoleucel-ის დანიშვნის ინფორმაცია ციტოკინების გამოთავისუფლების სინდრომისა და ნევროლოგიური ტოქსიკურობების შესახებ გაფრთხილებას შეიცავს. 92%-ში განვითარდა ციტოკინების გამოთავისუფლების სინდრომი (ხარისხი ≥3, 26%), ხოლო 87%-ში — ნევროლოგიური ტოქსიკურობები (ხარისხი ≥3, 35%). ყველაზე გავრცელებული (სიხშირე ≥ 20%) არალაბორატორიული არასასურველი რეაქციებია ცხელება, ციტოკინების გამოთავისუფლების სინდრომი, ჰიპოტენზია, ენცეფალოპათია, ტაქიკარდია, გულისრევა, შემცივნება, თავის ტკივილი, დაღლილობა, ფებრილური ნეიტროპენია, დიარეა, კუნთოვან-ჩონჩხოვანი ტკივილი, ჰიპოქსია, გამონაყარი, შეშუპება, შემცივნება, ინფექცია, ყაბზობა, მადის დაქვეითება და ღებინება.

Brexucabtagene otoleusel-ის რეკომენდებული დოზა არის სხეულის წონის თითო kg-ზე 1 x 1000000 (1 მილიონი) CAR-დადებითი ცოცხალი T უჯრედის ერთჯერადი ინტრავენური ინფუზია (მაქსიმუმ 1 x 100 მილიონი CAR-დადებითი ცოცხალი T უჯრედი); წინასწარ ლიმფოდეპლეციური ქიმიოთერაპიისთვის ფლუდარაბინი და ციკლოფოსფამიდი გამოიყენება.