Yeni CAR T-hüceyrə müalicəsi prekursor B-hüceyrəli ALL üçün FDA təsdiqi aldı

Təkrarlayan və ya müalicəyə davamlı prekursor B-hüceyrəli kəskin limfoblastik leykemiyası (ALL) olan yetkin xəstələr üçün brexucabtagene autoleucel (Tecartus, Kite Pharma, Inc.) adlı CAR T-hüceyrə immunoterapiyası, 1 oktyabr 2021-ci ildə FDA (ABŞ Qida və Dərman İdarəsi) təsdiqi aldı.

Brexucabtagene autoleucel-in effektivliyi təkrarlayan və ya müalicəyə davamlı prekursor B-hüceyrəli ALL olan böyüklərdə CD19 adlı hüceyrə səthi molekuluna yönəlmiş ximerik antigen reseptorlu (CAR) T-hüceyrə müalicəsi olan brexucabtagene autoleucel-i qiymətləndirən təkqollu, çoxmərkəzli ZUMA-3 tədqiqatında araşdırıldı. Xəstələrə limfositləri azaldan kimyaterapiya tamamlandıqdan sonra bir dəfə brexucabtagene autoleucel infuziyası verildi.

Qeyd: CD19 (Cluster of Differentation 19), CD19 geni tərəfindən kodlaşdırılan hüceyrə membranı zülalıdır. B-limfosit antigeni kimi də tanınır. İnsanlarda CD19 bütün B-hüceyrə nəsil xətlərində ifadə olunur. CD19 insan B hüceyrələrində iki əsas rol oynayır: bir tərəfdən sitoplazmatik siqnal zülallarını membrana cəlb etmək üçün adaptor zülal rolunu oynayır; digər tərəfdən B-hüceyrə reseptorunun siqnal yollarının həddini azaltmaq üçün CD19/CD21 kompleksi daxilində işləyir. Bütün B hüceyrələrində olduğuna görə B-hüceyrə mənşəli leykemiya və limfomalar üçün həm mühüm biomarkerdir, həm də ən populyar CAR T-hüceyrə hədəfidir.

ZUMA-3 tədqiqatının təfərrüatları

Təsdiqi dəstəkləmək üçün istifadə edilən effektivlik nəticə meyarları tətbiqdən sonra 3 ay ərzində əldə edilən tam cavab göstəricisi və tam cavabın müddəti idi.

• Effektivlik baxımından qiymətləndirilə bilən 54 xəstənin 28-i 3 ay ərzində tam cavaba çatdı (%52; %95 GA: 38-66).
• Cavab verənlər median 7,1 ay izlənildikdən sonra hələ median cavab müddətinə çatılmamışdı; xəstələrin yarısından çoxunda tam cavab müddətinin 12 ayı keçdiyi təxmin edilmişdir.

Brexucabtagene autoleucel-in resept məlumatında sitokin ifrazı sindromu və nevroloji toksikliklər barədə xəbərdarlıq var. %92-də sitokin ifrazı sindromu (Dərəcə ≥3, %26) və %87-də nevroloji toksikliklər (Dərəcə ≥3, %35) baş verdi. Ən geniş yayılmış (tezlik ≥ %20) laboratoriyadan kənar əlavə reaksiyalar qızdırma, sitokin ifrazı sindromu, hipotoniya, ensefalopatiya, taxikardiya, ürəkbulanma, titrəmə, baş ağrısı, yorğunluq, febril neytropeniya, ishal, əzələ-skelet ağrısı, hipoksiya, səpki, ödem, titrəmə, infeksiya, qəbizlik, iştahanın azalması və qusmadır.

Tövsiyə edilən brexucabtagene autoleucel dozası bədən çəkisinin hər kg-ı üçün 1 x 1.000.000 (1 milyon) CAR-müsbət canlı T hüceyrəsinin (maksimum 1 x 100 milyon CAR-müsbət canlı T hüceyrəsi) bir dəfə venadaxili infuziyasıdır; bundan əvvəl limfodepletiv kimyaterapiya üçün fludarabin və siklofosfamid tətbiq edilir.