არაწვრილუჯრედოვანი ფილტვის კიბოს ოპერაციის შემდეგ იმუნოთერაპიის მეორე დამტკიცება

IB (T2a, ანუ სიმსივნის დიამეტრი ≥4 cm), II ან IIIA სტადიის არაწვრილუჯრედოვანი ფილტვის კიბოს (KHDAK) ოპერაციისა და პლატინაზე დაფუძნებული ქიმიოთერაპიის შემდეგ ადიუვანტური პემბროლიზუმაბის (Keytruda, Merck) იმუნოთერაპიამ 2023 წლის 26 იანვარს FDA-ის, აშშ-ის სურსათისა და წამლის ადმინისტრაციის, დამტკიცება მიიღო.

ეს ადრეული არაწვრილუჯრედოვანი ფილტვის კიბოს ოპერაციის შემდეგ ადიუვანტური იმუნოთერაპიის მე-2 დამტკიცებაა. მანამდე, 2021 წლის ოქტომბერში, ამ მდგომარეობის მქონე პაციენტების სამკურნალოდ ატეზოლიზუმაბმა (Tecentriq) მიიღო FDA-ის დამტკიცება (იხილეთ შესაბამისი დამტკიცება).

FDA-ის დამტკიცება KEYNOTE-091-ის საფუძველზე

პემბროლიზუმაბის ეფექტიანობა შეფასდა KEYNOTE-091-ში, მრავალცენტრიან, რანდომიზებულ, სამმაგად ბრმა, პლაცებოკონტროლირებულ კვლევაში. პაციენტებს ნეოადიუვანტური ოპერაციამდელი შემამცირებელი რადიოთერაპია ან ქიმიოთერაპია არ ჰქონდათ მიღებული. ისინი 1:1 თანაფარდობით შემთხვევით განაწილდნენ 1 წლამდე ყოველ 3 კვირაში ინტრავენურად 200 mg პემბროლიზუმაბის ან პლაცებოს მისაღებად. სტრატიფიკაციის ფაქტორები ადიუვანტური ქიმიოთერაპიის მიღებასა და კვლევაში მონაწილე ქვეყნებს მოიცავდა. რანდომიზებული 1177 პაციენტიდან 1010-მა, 86%-მა, სიმსივნის ოპერაციით სრულად ამოკვეთის შემდეგ ადიუვანტური პლატინაზე დაფუძნებული ქიმიოთერაპია მიიღო.

კვლევის მთავარი შესაფასებელი ეფექტიანობის მაჩვენებელი მკვლევრის მიერ შეფასებული დაავადების გარეშე გადარჩენა იყო.

კიბოს დროს დაავადების გარეშე გადარჩენა (disease-free survival, DFS) არის პერიოდი კიბოს მკურნალობის შემდეგ, როდესაც კიბო ხელახლა არ ჩნდება. ეს დრო შეიძლება არ მიუთითებდეს, მომავალში განმეორდება თუ არა კიბო, თუმცა აჩვენებს, რომ პაციენტმა მკურნალობას უპასუხა; რაც უფრო ხანგრძლივია ეს პერიოდი, მით უკეთესი პასუხია მიღებული. 

შედეგები

კვლევამ თავის მთავარ საბოლოო მაჩვენებელს მიაღწია და დაავადების გარეშე გადარჩენაში სტატისტიკურად მნიშვნელოვანი გაუმჯობესება აჩვენა.

ადიუვანტური ქიმიოთერაპიის მიმღებ პაციენტებში დაავადების გარეშე გადარჩენის მედიანა პემბროლიზუმაბის ჯგუფში 58,7 თვე (95% GA: 39,2, მიღწეული არ არის), ხოლო პლაცებოს ჯგუფში 34,9 თვე იყო (95% GA: 28,6, მიღწეული არ არის) (რისკების თანაფარდობა=0,73; 95% CI: 0,60, 0,89).

ადიუვანტური ქიმიოთერაპიის არმიმღები 167 პაციენტის საძიებო ქვეჯგუფურ ანალიზში დაავადების გარეშე გადარჩენის რისკების თანაფარდობა 1,25 იყო (95% CI: 0,76, 2,05); ანუ ამ პაციენტების ჯგუფს იმუნოთერაპიისგან სარგებელი არ მიუღია.

KEYNOTE-091-ში გამოვლენილი გვერდითი მოვლენები ზოგადად მსგავსი იყო სხვა KHDAK პაციენტებში მხოლოდ Keytruda-ს მიღებისას დაფიქსირებულისა, ჰიპოთირეოზის, 22%-ის, ჰიპერთირეოზის, 11%-ის, და პნევმონიტის, 7%-ის, გარდა. ორ პაციენტში განვითარდა მიოკარდიტი, გულის კუნთის ანთება, რომელმაც სიკვდილი გამოიწვია.

პემბროლიზუმაბის რეკომენდებული დოზაა 200 mg ყოველ 3 კვირაში ან 400 mg ყოველ 6 კვირაში, დაავადების განმეორებამდე, მიუღებელ გვერდით მოვლენამდე ან 12 თვემდე.