ბუნებრივმა ცილამ Tinagl1 შესაძლოა ძუძუს კიბოს უჯრედების ზრდა და მეტასტაზირება შეაფერხოს

3 იანვარს, 2019 წელს Cancer Cell-ში გამოქვეყნებულმა კვლევამ მეცნიერთა და ონკოლოგიის პროფესიონალთა დიდი ინტერესი გამოიწვია. კვლევაში აღმოაჩინეს, რომ ბუნებრივი Tinagl1 ცილისგან მიღებული პრეპარატი სამმაგად უარყოფითი ძუძუს კიბოს უჯრედების ზრდასა და მეტასტაზირებას აფერხებდა. პრეპარატი EGFR და ინტეგრინი / FAK სახელის მქონე, კიბოს განვითარებაში ძალიან მნიშვნელოვან ორ უჯრედულ გზას უმიზნებს.
სამმაგად უარყოფითი ძუძუს კიბოაგრესიული ბიოლოგიის კიბოა და ძუძუს კიბოს ყველა შემთხვევის % 13-17-ს შეადგენს. ამ პაციენტებში რეციდივის (განმეორების) მაჩვენებელი უფრო მაღალია, მკურნალობის არჩევანი კი ძუძუს კიბოს სხვა ტიპებზე შეზღუდულია.
შენიშვნა: ქვემოთ მოცემულ სურათზე ძუძუს კიბოს ტიპებია.

კვლევა აშშ-ში, პრინსტონის უნივერსიტეტსა და ნიუ-ჯერსის Rutgers კიბოს ინსტიტუტში ჩატარდა. სპეციალურად მომზადებულ ადამიანის და თაგვის სიმსივნური უჯრედების მოდელებში მკვლევრებმა Tinagl1 ბუნებრივი ცილის გავლენა შეისწავლეს სიმსივნის ზრდასა და გავრცელებაზე.
კვლევის შედეგების თანახმად:
თაგვის მოდელებში Tinagl1 ცილის მაღალი აქტივობა სიმსივნის ზრდას ანელებდა და მეტასტაზირებას დიდწილად აფერხებდა. აღმოჩნდა, რომ Tinagl1 თრგუნავს ორ გზას, რომლებიც სამმაგად უარყოფით ძუძუს კიბოში აგრესიულ ზრდასა და წამლისადმი რეზისტენტობას უზრუნველყოფს.
ასევე Tinagl1 ცილა ძუძუს სიმსივნის მქონე თაგვებს შეუყვანეს. 7-კვირიანი მკურნალობის შემდეგ სიმსივნის ზრდა და მეტასტაზირება წარმატებით შეფერხდა. თაგვებში გვერდითი მოვლენა არ გამოვლენილა. Tinagl1 მკურნალობა მეტასტაზის დაწყებიდან მალევე დაწყების შემთხვევაშიც ეფექტიანი აღმოჩნდა.
- Tinagl1, ეპიდერმული ზრდის ფაქტორის რეცეპტორის (EGFR) გენის აქტივობის შეჩერებით კიბოს ზრდას აფერხებს. ეპიდერმული ზრდის ფაქტორი (EGF) სიმსივნის ზრდის ხელშემწყობი ცილაა. EGFR-ზე მიმართული მკურნალობების ეფექტიანობა საკმაოდ შეზღუდულია, ამიტომ Tinagl1 შეიძლება EGFR-ის წინააღმდეგ ახალი ეფექტიანი მიდგომა იყოს.
- Tinagl1 უჯრედის მიგრაციაში მნიშვნელოვან ინტეგრინებზეც მოქმედებს. ინტეგრინები კიბოს უჯრედების სხვა ქსოვილებსა და ორგანოებში გადაადგილებაში მონაწილეობს. Tinagl1 ინტეგრინის გზას ფოკალური ადჰეზიის კინაზის (FAK) ცილის აქტივობის დარღვევით თრგუნავს.
ორივე გზა მოლეკულურად ერთმანეთთანაა დაკავშირებული და სამმაგად უარყოფით ძუძუს კიბოში აგრესიულ ზრდას უწყობს ხელს. ამიტომ Tinagl1 შეიძლება ორი უჯრედული გზის დამიზნების ეფექტიანი წამალი იყოს.
გარდა ამისა, ადამიანის 800-ზე მეტი სიმსივნური ნიმუშის ანალიზში დაბალი Tinagl1 გენური აქტივობის მქონე პაციენტებში კიბო უფრო შორსწასული და სიცოცხლის ხანგრძლივობა ნაკლები იყო. Tinagl1 გენის მაღალი დონე უკეთეს კლინიკურ შედეგებს უკავშირდებოდა. ეს სამმაგად უარყოფითი ძუძუს კიბოს პაციენტებშიც შეინიშნებოდა.
რას გვეუბნება ეს კვლევა?
- შეიმუშავეს პრეპარატი, რომელიც სამმაგად უარყოფითი ძუძუს კიბოს წინააღმდეგ ეფექტიანი შეიძლება იყოს. წინა კვლევებისგან მას განასხვავებს როგორც სიმსივნის ზრდის, ისე მეტასტაზირების დამიზნება.
- როგორც EGFR, ისე ინტეგრინი/FAK გზების დამიზნების გამო Tinagl1 ცილამ შეიძლება ეფექტიანი და უსაფრთხო სამკურნალო მიდგომა შემოგვთავაზოს.
- პრეპარატი პრეკლინიკურ (ლაბორატორიულ) ეტაპზე გამოიცადა. ადამიანებში კლინიკური კვლევებითეფექტიანობისა და უსაფრთხოების დადასტურების შემდეგ გახდება მისი გამოყენება შესაძლებელი.
- პირველად აჩვენეს, რომ იმუნოთერაპია ძუძუს კიბოს დროს სიცოცხლეს ახანგრძლივებს
წყაროები
Tinagl1 Suppresses Triple-Negative Breast Cancer Progression and Metastasis by Simultaneously Inhibiting Integrin/FAK and EGFR Signaling.
Cancer Cell, 3 January 2019.
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.