Tinagl1 adlı təbii zülal süd vəzi xərçəngi hüceyrələrinin böyüməsini və metastazını əngəlləyə bilər

3 yanvar 2019-cu ildə Cancer Cell-də dərc olunan araşdırma alimlərin və onkologiya mütəxəssislərinin böyük marağına səbəb oldu. Araşdırmada Tinagl1 adlı təbii zülaldan əldə edilən dərmanın üçlü mənfi süd vəzi xərçəngi hüceyrələrinin böyüməsini və metastaz verməsini əngəllədiyi aşkar edildi. Dərman EGFR və inteqrin / FAK adlı, xərçəngləşmədə olduqca mühüm olan iki əsas hüceyrə siqnal yolunu hədəfləyir.
Üçlü mənfi süd vəzi xərçəngi bütün süd vəzi xərçənglərinin % 13-17-sini təşkil edən, aqressiv biologiyaya malik xərçəng növüdür. Bu növ xərçəngi olan xəstələrdə residiv (təkrarlanma) göstəricisi daha yüksəkdir və müalicə seçimləri digər süd vəzi xərçəngləri ilə müqayisədə daha məhduddur.
Qeyd: Aşağıdakı şəkildə süd vəzi xərçənginin növləri görünür.

Araşdırma ABŞ-dakı Princeton Universitetində və Nyu-Cersi Rutgers Xərçəng İnstitutunda aparıldı. Tədqiqatçılar Tinagl1 adlı təbii zülalın şiş böyüməsinə və yayılmasına təsirini xüsusi hazırlanmış insan və siçan şiş hüceyrəsi modellərində araşdırmışlar.
Araşdırma nəticələrinə görə;
Yüksək Tinagl1 zülal aktivliyinin şiş böyüməsini yavaşlatdığı və metastazı böyük ölçüdə əngəllədiyi siçan modellərində müəyyən edildi. Tinagl1-in üçlü mənfi süd vəzi xərçəngində aqressiv böyüməni və dərman müqavimətini təmin edən iki yolu inhibə etdiyi aşkar edildi.
Eyni zamanda Tinagl1 zülalı süd vəzi şişləri olan siçanlara yeridildi. 7 həftəlik müalicədən sonra şiş böyüməsinin və metastazın uğurla əngəlləndiyi görüldü. Siçanlarda heç bir əlavə təsir müşahidə edilmədi. Həmçinin Tinagl1 müalicəsinin metastaz başladıqdan dərhal sonra başlandıqda da təsirli olduğu görüldü.
- Tinagl1, epidermal böyümə faktoru reseptoru (EGFR) geninin aktivliyini dayandıraraq xərçəngin böyüməsini əngəlləyir. Epidermal böyümə faktoru (EGF) şiş böyüməsini dəstəkləyən zülallardan biridir. EGFR-ni hədəfləyən müalicələrin effektivliyi olduqca məhduddur. Buna görə Tinagl1 EGFR-yə qarşı yeni və təsirli yanaşma ola bilər.
- Tinagl1 hüceyrə miqrasiyasında mühüm rol oynayan inteqrinlərə də təsir edir. İnteqrinlər xərçəng hüceyrələrinin digər toxuma və orqanlara köçməsində rol oynayır. Tinagl1 inteqrin yolunu Fokal Adeziya Kinaz (FAK) zülalının aktivliyini pozaraq basqılayır.
İki yol da bir-biri ilə molekulyar baxımdan əlaqəlidir və üçlü mənfi süd vəzi xərçəngində aqressiv böyüməni dəstəkləyir. Buna görə Tinagl1 iki hüceyrə yolunu hədəfləyən təsirli dərman ola bilər.
Bununla yanaşı, 800-dən çox insan şişi nümunəsində aparılan təhlillərdə aşağı Tinagl1 gen aktivliyinə malik xəstələrin irəliləmiş mərhələ xərçənglərinə və daha qısa ömrə malik olduğu görüldü. Yüksək Tinagl1 gen səviyyəsi xəstələrdə daha yaxşı klinik nəticələrlə əlaqələndirildi. Üçlü mənfi süd vəzi xərçəngi olan xəstələrdə də bu vəziyyət müşahidə edildi.
Bəs bu araşdırma bizə nə ifadə edir?
- Üçlü mənfi süd vəzi xərçənginə qarşı təsirli ola biləcək dərman hazırlandı. Dərmanı əvvəlki araşdırmalardan fərqləndirən xüsusiyyət həm şiş böyüməsini, həm də metastazı hədəfləməsidir.
- Həm EGFR, həm də inteqrin/FAK yollarını hədəflədiyinə görə Tinagl1 zülalı təsirli və təhlükəsiz müalicə yanaşması təqdim edə bilər.
- Bu dərman preklinik (laboratoriya) mərhələdə sınaqdan keçirilmişdir. İnsanlarda klinik tədqiqatlarla effektivliyi və təhlükəsizliyi sübut edildikdən sonra istifadə oluna biləcək.
- İmmunoterapiyanın süd vəzi xərçəngində ömrü uzatdığı ilk dəfə göstərildi
Mənbələr
Tinagl1 Suppresses Triple-Negative Breast Cancer Progression and Metastasis by Simultaneously Inhibiting Integrin/FAK and EGFR Signaling.
Cancer Cell, 3 January 2019.
Bu məqalə sizə faydalı oldu?
Rəyiniz məzmunumuzu yaxşılaşdırmağa kömək edir.





Oxucu şərhləri
Şərhinizi paylaşın
Adınız və şərhiniz yalnız administrator təsdiqindən sonra dərc olunur. E-poçt ünvanınız ziyarətçilərə heç vaxt göstərilmir.
İlk şərhi siz yazın.