Crispr-cas9 ტექნოლოგიით კიბოში იმუნოთერაპიის ახალი სამიზნე აღმოაჩინეს

21. საუკუნის ერთ-ერთი უმნიშვნელოვანესი აღმოჩენა, CRISPR/CAS9 გენეტიკური ტექნოლოგია, კიბოს საწინააღმდეგო ეფექტიანი მკურნალობის შეთავაზების გარდა, კიბოში ბიომარკერებისა და წამლის სამიზნეების კვლევებსაც ეხმარება. ამ მიზნით ჩატარებულ კვლევაში აღმოაჩინეს, რომ TPN2 სახელწოდების ცილა იმუნური საკონტროლო წერტილების ინჰიბიტორების, ანუ ახალი თაობის იმუნოთერაპიის ეფექტიანობას განსაზღვრავს.

იმუნური საკონტროლო წერტილების ინჰიბიტორი იმუნოთერაპიები კიბოს უჯრედების უშუალო მოკვლის ნაცვლად იმუნურ სისტემას კიბოზე შეტევისთვის ააქტიურებს; ეს ონკოლოგიური მკურნალობა 2011 წლის შემდეგ დაინერგა.

2017 წლის ივლისში Nature-ში გამოქვეყნებულ საინტერესო კვლევაში სიმსივნის ათასობით გენს cripsr -ით ამატებდნენ და შლიდნენ, მათი ფუნქციები კი ლაბორატორიაში შეისწავლეს. თაგვებში ჩატარებულ კვლევაში კანის კიბოს, მელანომის უჯრედებში 2.368 გენი crispr-ით სისტემატურად გააჩუმეს, რათა დაედგინათ, რომელი გენი ამცირებდა იმუნოთერაპიული წამლების ეფექტიანობას.

კვლევის შედეგების მიხედვით:

• PTPN2 (ცილოვანი თიროზინფოსფატაზის) გენის აქტივობის დათრგუნვისას იმუნოთერაპიული წამლების მოქმედება გაიზარდა.
• PTPN2 კიბოს უჯრედებს იმუნოთერაპიის მიმართ რეზისტენტობის გამოვლენის შესაძლებლობას აძლევს.
• PTPN2 უჯრედის ზრდის გზებში აქტიურად მონაწილე ცილაა. იგი უჯრედის ზრდის, დიფერენცირებისა და კიბოდ გარდაქმნის გამომწვევ გზებში მონაწილეობს.

რა კლინიკური მნიშვნელობა აქვს ამ კვლევას?

• CRISPR-ით გენების სწრაფი შემოწმება და ფუნქციების დადგენა შეიძლება, რაც ახალი წამლის სამიზნეების აღმოჩენას შესაძლებელს ხდის.
• დადგინდა კიდევ ერთი მიზეზი, რატომ არ აძლევს იმუნოთერაპია სარგებელს ზოგ პაციენტს. PTPN2-ის მიზანში ამოღებით მისი ეფექტიანობა შეიძლება გაიზარდოს.
• ახალი თაობის PTPN2 ინჰიბიტორების შექმნით უფრო ეფექტიანი ონკოლოგიური მკურნალობის შეთავაზება შეიძლება.
• შექმნილი ტექნიკით სხვა კიბოებშიც მთელი გენომის სწრაფი შემოწმება და მკურნალობაზე განსხვავებული პასუხის მიზეზების დადგენა შეიძლება.