დენდრიტული უჯრედების ვაქცინამ ქიმიოთერაპიასთან ერთად რეციდივირებული საკვერცხის კიბოს დროს საერთო გადარჩენა მნიშვნელოვნად გაახანგრძლივა

ციბულასა და კოლეგების მიერ გინეკოლოგიური ონკოლოგიის საზოგადოების (SGO) 50-ე შეხვედრაზე წარდგენილი კლინიკური კვლევის შედეგებმა აჩვენა, რომ დენდრიტული უჯრედების ვაქცინის სახელწოდების ახალი იმუნოთერაპიის სტანდარტულ ქიმიოთერაპიაზე დამატებამ რეციდივირებული საკვერცხის კიბოს მქონე ქალებში საერთო გადარჩენა მნიშვნელოვნად გაახანგრძლივა.

რა არის დენდრიტული უჯრედების ვაქცინა?

დენდრიტული უჯრედების ვაქცინა ადაპტაციური უჯრედული იმუნოთერაპიებისერთ-ერთი სახეობაა და დენდრიტული უჯრედების გამოყენებით კიბოს პერსონალიზებული მკურნალობის მეთოდის შემუშავებას გულისხმობს. პაციენტისგან მიღებულ დენდრიტულ უჯრედებს ლაბორატორიაში გენური ინჟინერიის მეთოდებით სიმსივნური უჯრედის ანტიგენებით ასტიმულირებენ. სტიმულირებული დენდრიტული უჯრედები მასწავლებელივით მოქმედებს და ზედაპირზე არსებულ სიმსივნური უჯრედის ანტიგენებს სხვა იმუნური სისტემის უჯრედებს ორგანიზმში აცნობს. გარკვეული ანტიგენის მიმართ სპეციფიკურად გამრავლებული და მომწიფებული T უჯრედები, ანტიგენის წინააღმდეგ აქტიურდება და სხვა ლიმფოციტების მასტიმულირებელ ციტოკინებს გამოყოფს. ამ მეთოდმა დენდრიტული უჯრედების ვაქცინებით იმედისმომცემი მკურნალობისკენ გზა გახსნა. ასე მომზადებული, FDA-ს მიერ დამტკიცებული კიბოს ვაქცინაც არსებობს: Sipuleucel-T

კვლევის შედეგები

ამ რანდომიზებულ 2. ფაზის კლინიკურ კვლევაშიშეადარეს რეციდივირებული საკვერცხის კიბოს მქონე ქალების საერთო გადარჩენა, რომლებიც ქიმიოთერაპიასთან ერთად დენდრიტულ უჯრედებზე დაფუძნებულ იმუნოთერაპიას იღებდნენ ან არ იღებდნენ.

კვლევის შედეგების მიხედვით:

• პროგრესირების გარეშე გადარჩენაში, ანუ მკურნალობით დაავადების კონტროლის ხანგრძლივობაში, მნიშვნელოვანი განსხვავება არ გამოვლენილა (დენდრიტულ უჯრედებზე დაფუძნებული იმუნოთერაპიითა და ქიმიოთერაპიით ნამკურნალებ პაციენტებში 11.3 თვე, მხოლოდ ქიმიოთერაპიით ნამკურნალებებში კი — 10.1 თვე).
• ამის საპირისპიროდ, საერთო გადარჩენის განხილვისას დენდრიტული უჯრედების ვაქცინისა და ქიმიოთერაპიის მიმღებებში, მხოლოდ ქიმიოთერაპიასთან შედარებით, მნიშვნელოვანი განსხვავება გამოვლინდა:
• - 1-წლიანი გადარჩენა დენდრიტული უჯრედების თერაპიისა და ქიმიოთერაპიის მიმღებებში %72.4 იყო, მხოლოდ ქიმიოთერაპიის მიმღებებში კი — %40.9;
• მედიანური საერთო გადარჩენა კომბინაციურ ჯგუფში 35.5 თვე იყო, მონოთერაპიის ჯგუფში კი — 22.1 თვე და
• აღმოჩნდა, რომ ქიმიოთერაპიაზე დენდრიტული უჯრედების ვაქცინის დამატებამ სიკვდილის რისკი %62-ით შეამცირა.

პრაღის ჩარლზის უნივერსიტეტის სამედიცინო ფაკულტეტის გინეკოლოგიური ონკოლოგიის ცენტრის ექიმმა დავით ციბულამ განაცხადა, რომ პაციენტები დენდრიტული უჯრედების ვაქცინით ამ მკურნალობას კარგად იტანდნენ, რადგან ის ქიმიოთერაპიაზე დამატებით თითქმის არანაირ გვერდით მოვლენას არ იწვევდა.

დოქტორმა ციბულამ დასძინა, რომ ეს მიდგომა საკვერცხის კიბოში ამ დრომდე ნანახ ერთ-ერთ ყველაზე იმედისმომცემ შედეგს წარმოადგენს და 2019 წლისთვის უფრო ფართო მასშტაბის 3. ფაზის კლინიკური კვლევის დაგეგმვა გამოაცხადა.