Dendritik hüceyrə peyvəndi üstəgəl kimyaterapiya ilə təkrarlanmış yumurtalıq xərçəngində ümumi ömrün nəzərəçarpacaq uzanması

Cibula və həmkarları tərəfindən Ginekoloji Onkologiya Cəmiyyətinin (SGO) 50-ci Toplantısında təqdim olunan klinik tədqiqatın nəticələri, dendritik hüceyrə peyvəndi adlı yeni bir immunoterapiya müalicəsinin standart kimyaterapiyaya əlavə edildikdə təkrarlayan yumurtalıq xərçəngi olan qadınlarda ümumi sağqalımı əhəmiyyətli dərəcədə uzatdığını göstərdi.

Dendritik hüceyrə peyvəndi nədir?

Dendritik hüceyrə peyvəndi, adaptiv hüceyrəvi immunoterapiyaların bir növüdür və dendritik hüceyrələrdən istifadə etməklə, fərdiləşdirilmiş xərçəng müalicəsi üsulu hazırlanmasıdır. Xəstədən əldə olunan dendritik hüceyrələr laboratoriya şəraitində genetik mühəndislik üsulları ilə şiş hüceyrəsinin antigenləri vasitəsilə stimullaşdırılır. Stimullaşdırılan dendritik hüceyrələr müəllim kimi davranaraq səthlərindəki şiş hüceyrəsi antigenlərini digər immunitet sistemi hüceyrələrinə bədən daxilində tanıdır. Müəyyən antigenə spesifik olaraq çoxalan və yetişən T hüceyrələri, antigenə qarşı aktivləşərək digər limfositləri stimullaşdıran sitokinlər ifraz edirlər. Bu üsul sayəsində dendritik hüceyrə peyvəndlərindən istifadə etməklə perspektivli müalicəyə yol açılıb. Bu şəkildə hazırlanan, FDA tərəfindən təsdiqlənmiş xərçəng peyvəndi də mövcuddur: Sipuleucel-T

Araşdırmanın nəticələri

Bu randomizə edilmiş faz-2 klinik tədqiqatda təkrarlayan yumurtalıq xərçəngi üçün kimyaterapiya ilə yanaşı dendritik hüceyrə əsaslı immunoterapiya alan və almayan qadınların ümumi ömürləri müqayisə edildi.

Araşdırmanın nəticələrinə görə;

• Proqressiyasız sağqalımda (müalicə ilə xəstəliyi nəzarətdə saxlama müddəti) əhəmiyyətli fərq müşahidə edilmədi (dendritik hüceyrə əsaslı immunoterapiya üstəgəl kimyaterapiya ilə müalicə olunan xəstələrdə 11.3 ay və yalnız kimyaterapiya ilə müalicə olunanlarda 10.1 ay)
• Bunun əksinə, ümumi ömürlərə baxıldıqda dendritik hüceyrə peyvəndi üstəgəl kimyaterapiya alanlarda yalnız kimyaterapiya alanlara nisbətən əhəmiyyətli fərq müşahidə edildi:
• - 1 illik sağqalım göstəricisi dendritik hüceyrə müalicəsi üstəgəl kimyaterapiya alanlarda %72.4, yalnız kimyaterapiya alanlarda isə %40.9,
• median ümumi sağqalım kombinasiya qolunda 35.5 ay, təkli müalicə qolunda isə 22.1 ay idi və
• kimyaterapiyaya dendritik hüceyrə peyvəndi əlavə edilməsinin ölüm riskini %62 azaltdığı müəyyən edildi.

Praqadakı Charles Universiteti Tibb Fakültəsinin Ginekoloji Onkologiya Mərkəzinin həkimi David Cibula bu dendritik hüceyrə peyvəndi müalicəsinin kimyaterapiyaya əlavə olaraq demək olar heç bir yan təsir yaratmadığına görə xəstələr tərəfindən yaxşı qəbul edildiyini bildirdi.

Dr. Cibula bu yanaşmanın yumurtalıq xərçəngində indiyədək görülən ən ümidverici nəticələrdən biri olduğunu da əlavə etdi və 2019 üçün daha genişmiqyaslı faz-3 klinik tədqiqatın planlaşdırıldığını açıqladı.