ძუძუს კიბოს ადრეულ სტადიაზე გამოყენებული ქიმიოთერაპია ჩვენს ახალგაზრდა პაციენტებს დედობის ოცნებას (ნაყოფიერებას) ვერ წაართმევს

წარმატებულმა თურქმა ექიმმა ქუთლუქ ოქთაიმ ამერიკაში ჩატარებული კვლევებით დაამტკიცა, რომ ახალგაზრდა ასაკში ძუძუს კიბოთი დაავადებულ პაციენტებში ნაყოფიერების შენარჩუნება მნიშვნელოვანი სიხშირით არის შესაძლებელი და კიბოს მკურნალობის დასრულების შემდეგ მათ უსაფრთხოდ შეუძლიათ დედობა.

ადრეული სტადიის ძუძუს კიბოს დიაგნოზის შემდეგ პაციენტებს გარკვეული დროის განმავლობაში ქიმიოთერაპიას ვუტარებთ კიბოს მახასიათებლებისა და სტადიის მიხედვით: ოპერაციამდე სიმსივნის შესამცირებლად და ქირურგიული მკურნალობის წარმატების გასაზრდელად, ან ოპერაციის შემდეგ დამცავი მიზნით. ამ ქიმიოთერაპიის შემდეგ, პაციენტის ასაკის მიხედვით, ნაყოფიერების დაკარგვა %10-50 სიხშირით გვხვდება. სხვა სიტყვებით, თუ ქიმიოთერაპიამდე გარკვეულ ზომებს არ მივიღებთ, ჩვენმა პაციენტების ნაწილმა შესაძლოა მომავალში შვილის გაჩენის შესაძლებლობა დაკარგოს.

ბუნებრივია, ახალგაზრდა პაციენტები კიბოს დიაგნოზის დასმისას უპირველესად საკუთარ სიცოცხლესთან დაკავშირებით ძლიერ შიშსა და შფოთვას განიცდიან. მათ მკვეთრი რეაქცია აქვთ ძუძუში გაჩენილ კიბოზე. ამ პერიოდში სიცოცხლის გადასარჩენად თითქოს ყველაფრის გასაწირად არიან მზად. ითხოვენ ძუძუს, ზოგჯერ ორივე ძუძუს სრულ მოცილებას და უმძიმეს მკურნალობას, რათა ამ დაავადებას აღარასოდეს შეხვდნენ. ჩვენ, ონკოლოგებმა, ეს მგრძნობიარე პერიოდი ძალიან კარგად უნდა ვმართოთ და მეცნიერების მიერ მოწოდებული ცოდნით მომავალში დაავადების განმეორების ალბათობა მინიმუმამდე შევამციროთ. ამავე დროს უნდა უზრუნველვყოთ, რომ პაციენტს ქირურგიულმა და სამედიცინო მკურნალობამ რაც შეიძლება ნაკლები ზიანი მიაყენოს და ყველა არსებული შესაძლებლობა ოსტატურად გამოვიყენოთ მის სასარგებლოდ.

New York Medical College-ში გინეკოლოგიისა და მეანობის პროფესორის თანამდებობაზე მომუშავე ქუთლუქ ოქთაისთითქმის 15-წლიანი კვლევები ნაყოფიერების შენარჩუნებისა და მისი დაკარგვის თავიდან აცილების შესახებ იმედის სხივად იქცა არა მხოლოდ კიბოთი დაავადებულთათვის, არამედ ამ სირთულეების მქონე ათასობით ქალისთვისაც.

მის მიერ კოლეგებთან ერთად ჩატარებულმა ასზე მეტმა კვლევამ და სამეცნიერო სტატიამ იგი მსოფლიოში ამ სფეროს ლიდერად აქცია. მან დაამტკიცა, რომ გაუთხოვარ ახალგაზრდა ქალებს, რომლებსაც ძუძუს კიბო აქვთ, ქიმიოთერაპიამდე ნაყოფიერების შენარჩუნება მის მიერ შემუშავებული და მეცნიერულად დადასტურებული უსაფრთხოების მქონე მეთოდით შეუძლიათ. ეს მეთოდებია, შესაბამისად: კვერცხუჯრედების შეგროვება და გაყინული შენახვა; საკვერცხის ლაპაროსკოპიული ოპერაციით ამოღება და გაყინვა; გათხოვილ ქალებში კვერცხუჯრედის შეგროვება, მეუღლისგან მიღებული სპერმით განაყოფიერება და შექმნილი ემბრიონის გაყინვა. დაავადების საფრთხის გაქრობის შემდეგ ამ გაყინული მასალის მომავალ დედასთან დაბრუნებით ორსულობის მიღწევა ხდება.

როგორც თქვენც ივარაუდებთ, წლების განმავლობაში მიმდინარე ამ კვლევების შედეგად პროფესორმა, ექიმმა ქუთლუქ ოქთაიმ თავის ბოლო კვლევაში, რომელიც ალბათ ყველაზე სასიხარულოა და მეცნიერულად ყველაზე ძლიერ მტკიცებულებას გვთავაზობს, განაცხადა: ქიმიოთერაპიამდე საკვერცხის სტიმულაციით შეგროვებული კვერცხუჯრედებიდან მიღებული ემბრიონის გამოჯანმრთელებულ პაციენტში ან სუროგატ დედაში გადატანა შემთხვევების თითქმის ნახევარში ცოცხალი და ჯანმრთელი ბავშვის დაბადებით დასრულდა. მან მიღებული მონაცემები შეადარა იმავე მეთოდის შედეგებს კიბოს არმქონე ქალებში, რომლებიც ბუნებრივი გზით ვერ ორსულდებოდნენ, და ხაზგასმით აღნიშნა, რომ წარმატების მაჩვენებლები მსგავსი იყო.

ყველა ქალმა, რომელსაც ძუძუს კიბოს ადრეული სტადია დაუდგინდა და ჯერ შვილი არ ჰყავს, გაუთხოვარია ან მომავალში შვილის გაჩენის შესაძლებლობის შენარჩუნება სურს, ქიმიოთერაპიამდე ეს შესაძლებლობები ექიმთან საფუძვლიანად უნდა განიხილოს. მისთვის ყველაზე შესაფერისი მეთოდი ოჯახთან და ექიმთან ერთად უნდა განსაზღვროს.

პროფესორ, ექიმ ქუთლუქ ოქთაის ერთგულება საკუთარ სპეციალობაში არჩეული საკითხისადმი და ამის შედეგად მიღწეული წარმატება ახალგაზრდა მომავალ ექიმებს მაგალითად უნდა ექცეთ. ამ მეთოდით მოსარგებლე ყველა ჩვენი პაციენტის სახელით ქუთლუქ ოქთაის მადლობას ვუხდით.

• სიახლეები ძუძუს კიბოს მკურნალობაში - 2017 და 2018