სიახლეები ძუძუს კიბოს მკურნალობაში — 2017 და 2018
ამ სტატიაში
ძუძუს კიბო ქალებში ყველაზე ხშირი კიბოა. ახალი მკურნალობებით სხვა ორგანოებში მეტასტაზირებული , ანუ სტადია 4 ძუძუს კიბოს დროსაც სიცოცხლე მნიშვნელოვნად გახანგრძლივდა. ყველა სტადიის ერთად შეფასებისას სრულ გამოჯანმრთელებას აღმნიშვნელი 5-წლიანი გადარჩენა % 90-ს აღწევს. ვნახოთ ბოლო ორი წლის სიახლეები, რომლებმაც ამაში წვლილი შეიტანა;
თითის წვერების გაგრილებით ქიმიოთერაპიული ნერვული დაზიანება შემცირდა (მარტი 2018)
ძუძუს კიბოს როგორც დამცავ, ისე მეტასტაზური დაავადების ქიმიოთერაპიაში ყველაზე ხშირად გამოყენებული პრეპარატია პაკლიტაქსელი. მისი უმნიშვნელოვანესი გვერდითი მოვლენა ნერვის დაზიანებით თითების წვერების დაბუჟებაა (პერიფერიული ნეიროპათია). ამისთვის ზოგი წამალი და მეთოდი გვაქვს (მაგალითად აკუპუნქტურა), თუმცა ერთმა კვლევამ აჩვენა, რომ ნერვის დაზიანების თავიდან აცილებაც შეიძლება.
ძუძუს კიბოსთვის ყოველკვირეული pakitaxel ქიმიოთერაპიის მიმღები 40 პაციენტის კვლევაში ხელისა და ფეხის თითების ქიმიოთერაპიამდე, დროს და შემდეგ გაგრილებამ თითების დაბუჟების ჩივილები შეამცირა. ეს მკურნალობის მიღების გასამარტივებელ ეფექტიან დამხმარე მეთოდად გამოჩნდა.
- დაკავშირებული თემა: ქიმიოთერაპიის თმის ცვენის პრევენცია შეიძლება: თავის კანის გამაგრილებელმა სისტემამ Dignicap FDA-ს ნებართვა მიიღო
Abemaciclib შორსწასული, HER2-უარყოფითი, ჰორმონრეცეპტორდადებითი ძუძუს კიბოსთვის (მარტი 2018)
Abemaciclib (სავაჭრო სახელი Verzenio), ჰორმონრეცეპტორდადებითი, HER2-უარყოფითი შორსწასული (მეტასტაზური) ძუძუს კიბოს მქონე ქალებისთვის გამოსაყენებლად მზად მყოფ CDK 4/6 ინჰიბიტორებს შორის მესამე მიზნობრივი პრეპარატია. ადრე FDA-ს ნებართვა palbociclib-მა (Ibrance) და ribociclib-მა (Kisqali) მიიღო.
აბემაციკლიბის გამოყენება ახლად დიაგნოსტირებულ სტადია 4 ძუძუს კიბოში როგორც არომატაზის დამთრგუნველ ჰორმონულ მკურნალობასთან, ისე ესტროგენის რეცეპტორის ინჰიბიტორ ფულვესტრანტთან ერთად FDA -ს ნებართვით კლინიკურ პრაქტიკაში შევიდა.
დამატებით, წარსულში ჰორმონდამთრგუნველი მკურნალობის და ქიმიოთერაპიის მიმღებებშიც გადარჩენის სარგებელი გამოვლინდა.
- დაკავშირებული თემა: ჰორმონდადებითი სტადია 4 ძუძუს კიბოს საწყისი მკურნალობისთვის Abemaciclib-მა FDA-ს ნებართვა მიიღო
მენოპაუზაში მეტასტაზური ძუძუს კიბოსთვის ეფექტიანმა რიბოციკლიბმა პრემენოპაუზაშიც აჩვენა ეფექტიანობა (თებერვალი 2018)
რიბოციკლიბი (სავაჭრო სახელი Kisqali) უჯრედული ციკლის დამთრგუნველი CDK4/6 წამლების ჯგუფში შედის. კვლევებით, ჰორმონდამოკიდებული, HER2 რეცეპტორის არმქონე, მენოპაუზაში მყოფ ძუძუს კიბოს პაციენტებში ამ ჯგუფის ჰორმონდამთრგუნველებთან გამოყენება სიცოცხლეს ახანგრძლივებს.
700 პრემენოპაუზაში მყოფი, მეტასტაზური ჰორმონრეცეპტორდადებითი ძუძუს კიბოს პაციენტი MONALEESA-7-ში შეაფასეს. რიბოციკლიბთან ერთად საკვერცხის ჰორმონების წარმოების დამთრგუნველების მიცემისას დაავადებისგან თავისუფალმა სიცოცხლემ 24 თვეს მიაღწია.
მენოპაუზაში ეფექტიანი რიბოციკლიბი ახლა პრემენოპაუზურ ჰორმონდამოკიდებულ, HER2-ის არმქონე ძუძუს კიბოშიც დაიკავებს ადგილს.
ძუძუს კიბოს რეციდივის რისკი ხუთწლიანი ადიუვანტური ჰორმონოთერაპიის შემდეგ (ნოემბერი 2017)
ჰორმონული (ენდოკრინული) მკურნალობაარამეტასტაზური, ჰორმონის რეცეპტორ დადებითი ძუძუს კიბოს ქალებში გადარჩენას განუწყვეტლივ აუმჯობესებს. თუმცა 60.000 ქალის ფართო მეტაანალიზით, დაგეგმილი ხუთწლიანი ჰორმონოთერაპიის შემდეგ რეციდივის რისკი 15 წლამდე რჩებოდა. ის მჭიდროდ უკავშირდებოდა კვანძების სტატუსს, სიმსივნის ზომასა და ხარისხს. მონაცემებმა მაღალი რისკის პაციენტებისთვის ადიუვანტური (ოპერაციისშემდგომი დამცავი) ენდოკრინული მკურნალობის 10 წლამდე გაზრდის წინა რჩევა დაადასტურა. ასევე მხარს უჭერს კარგად ამტანი დაბალი რისკის პაციენტებისთვის 10-წლიანი ჰორმონოთერაპიის ვარიანტად შეთავაზებას.
მეტასტაზური ძუძუს კიბოს ძვლის მარეგულირებელ/დამცავ აგენტებზე განახლებული გაიდლაინი (ოქტომბერი 2017)
ძუძუს კიბოს მეტასტაზირების შემთხვევაში ძვლები პრიორიტეტულად შესაფასებელი ორგანოებია. ამერიკის კლინიკური ონკოლოგიის საზოგადოებამ Cancer Care Ontario-სთან ერთად მათი როლის განახლებული გაიდლაინი გამოაქვეყნა. არსებული ძვლის დამცავ წამლებს შორის უპირატესობა არ გამოვლენილა. ყველაზე ცნობილი ზოლედრონის მჟავა და მისი ანალოგები (ზოგადად ბისფოსფონატებად წოდებული) თვეში 1-ჯერ ვენური ინფუზიით გამოიყენება. ეს ყოველ 3 თვეში გამოყენებას შეადარეს და ეფექტიანობა არ განსხვავდებოდა. ანუ ზოლედრონის მჟავის ნაკლები სიხშირით მიცემამ ჩონჩხის მოვლენის (მაგალითად მოტეხილობა, ზურგის ტვინზე ზეწოლით დამბლა) რისკი შეიძლება არ გაზარდოს. თუმცა მათი ზომიერი ტკივილგამაყუჩებელი ეფექტის გამო ძვლის ტკივილის სამართავად მარტო ეს წამლები არასაკმარისია.
- დაკავშირებული თემა: კიბო და სტომატოლოგიური მკურნალობა! რას მიაქციონ ყურადღება ძვლის დამცავი წამლების მომხმარებლებმა?
გუშაგ ლიმფურ კვანძში მეტასტაზის მქონე ქალებში ხანგრძლივი შედეგები (ოქტომბერი 2017)
ადრეული სტადიის ძუძუს კიბოში, თუ იღლიაში ხელით შესაგრძნობი მეტასტაზური კვანძი არ არის ან მხოლოდ ერთი ან ორი მეტასტაზური სენტინელური (გუშაგი) კვანძია, იღლიის ყველა კვანძის რუტინული ამოღება აუცილებელი არ არის. თითქმის 10-წლიანი დაკვირვებით მხოლოდ სენტინელური დისექციის შემდეგ საერთო და დაავადებისგან თავისუფალი გადარჩენა ყველა კვანძის ამოღებაზე დაბალი არ იყო. ამიტომ ადრეული კიბოსას იღლიის დამაზიანებელ ქირურგიას (აქსილარულ დისექციას) აუცილებლობის გარეშე უნდა მოერიდონ.
ძუძუს ნაწილობრივი დასხივება დაბალი რისკის ადრეულ კიბოში (აგვისტო 2017)
ძუძუს ნაწილობრივი დასხივება (სხივური თერაპია) ნიშნავს ადრეული კიბოს ორგანოშემანარჩუნებელი ოპერაციის შემდეგ შეზღუდული, ფოკუსირებული დასხივების გამოყენებას ტრადიციული მთლიანი დასხივების უფრო შესაფერის ალტერნატივად. 50 წელზე უფროს, დაბალი რისკის, ადრეული კიბოს ოპერაციაგავლილ 2000-ზე მეტ ქალში რანდომიზებულად მთლიანი ან ნაწილობრივი დასხივება ჩატარდა. 5-წლიანი ადგილობრივი რეციდივი მსგავსი იყო. 50 წლისა და უფროს, ჰორმონრეცეპტორდადებით ქალებში კვანძების ჩართულობის გარეშე და სიმსივნის ზომით ≤ 3 cm ნაწილობრივი დასხივება გონივრული ალტერნატივაა.
დაბალი რისკის HER2-უარყოფით ძუძუს კიბოში ანთრაციკლინის გარეშე ადიუვანტური მკურნალობა (აგვისტო 2017)
ანთრაციკლინებიადრეული ძუძუს კიბოს ოპერაციისშემდგომ დამცავ (ადიუვანტურ) მკურნალობაში ფართოდ გამოიყენება, თუმცა გულის გვერდითი მოვლენები არასასურველია. ადრეული, ადამიანის ეპიდერმული ზრდის ფაქტორის რეცეპტორ (HER2)-უარყოფითი კიბოს 4000-ზე მეტი ქალის ანალიზში ანთრაციკლინის გარეშე დოცეტაქსელი და ციკლოფოსფამიდი ანთრაციკლინ-ციკლოფოსფამიდ-ტაქსანის რეჟიმზე გარკვეულწილად უკეთესი აღმოჩნდა (4-წლიანი დაავადებისგან თავისუფალი გადარჩენა % 88-ის საპირისპიროდ % 91). თუმცა დაბალი რისკის ადრეული კიბოს ქვეჯგუფში ანთრაციკლინებმა ანთრაციკლინის გარეშე მკურნალობაზე მნიშვნელოვნად უკეთესი შედეგი ვერ აჩვენა. შესაბამისად, ადიუვანტური მკურნალობის საჭიროების მქონე ქალებისთვის ნაკლები გვერდითი მოვლენების მქონე დოცეტაქსელი და ციკლოფოსფამიდი დაბალი რისკის HER2-უარყოფითი კიბოს შესაფერისი მკურნალობაა.
მენოპაუზაში ბისფოსფონატები ძუძუს კიბოსგან არ იცავს (აგვისტო 2017)
ზოგი კვლევა ბისფოსფონატების შესაძლო დამცავ ეფექტს ვარაუდობდა, მაგრამ 64 ათასი პოსტმენოპაუზური ქალის 7-წლიანი კვლევით პრევენციული ეფექტი არ არის. საიდან გაჩნდა ნაკლები ძუძუს კიბოს აზრი? სავარაუდოდ, ბისფოსფონატებს უფრო ხშირად ოსტეოპოროზის მქონენი იყენებდნენ, რომლის ერთ-ერთი მიზეზი ესტროგენის ნაკლებობაა. ანუ მათში ნაკლები პოსტმენოპაუზური ძუძუს კიბოს მიზეზი წამალი კი არა, დაბალი ესტროგენი შეიძლება იყოს.
BRCA მუტაციის მატარებელთა ძუძუსა და საკვერცხის კიბოს რისკები (ივნისი 2017)
9800-ზე მეტი ქალი BRCA მატარებლის პროსპექტულ კვლევაში 80 წლამდე ძუძუსა და საკვერცხის კიბოს განვითარება BRCA1 მატარებლებში შესაბამისად 72 და 44 პროცენტი, BRCA2-ში კი 69 და 17 პროცენტი იყო. ასეთი მემკვიდრეობითი მუტაციის მატარებელ ქალებს გენეტიკისა და ცხოვრების წესის მსგავსი შეცვლადი რისკების შესახებ განათლებასთან ერთად გენეტიკურ კონსულტაციაზე უნდა მიმართონ დამცავი ჰორმონული მკურნალობის, საკვერცხეების ამოღებისა (ოოფორექტომია) და სხვა რისკის შემცირების ზომებისთვის.
ადიუვანტური პერტუზუმაბი HER2-დადებითი ძუძუს კიბოსთვის (ივნისი 2017)
პერტუზუმაბი (სავაჭრო სახელი Perjeta), მაღალი რისკის HER2-დადებითი ძუძუს კიბოს ნეოადიუვანტურ მკურნალობაში სასარგებლო იყო, მაგრამ ადიუვანტური როლი უცნობი რჩებოდა. ფაზა III APHINITY-ში ადიუვანტური ქიმიოთერაპიისა და ტრასტუზუმაბის (Herceptin) მიმღები HER2-დადებითი კიბოს 4800-ზე მეტი პაციენტი ორ ჯგუფად დაყვეს: ერთს პერტუზუმაბი, მეორეს პლაცებო დაუმატეს. მედიანური 45-თვიანი დაკვირვებით პერტუზუმაბის ჯგუფში სამწლიანი დაავადებისგან თავისუფალი გადარჩენა მეტი იყო (% 94-ის საპირისპიროდ % 93). კვანძებში მეტასტაზის მქონეებმა უდიდესი სარგებელი მიიღეს. შესაბამისად, კვანძდადებით ან კვანძების ჩართულობის გარეშე 2 cm-ზე დიდი სიმსივნის მქონე ქალებში დამატება შეიძლება რეკომენდებული იყოს. თუმცა წამლის ფასი უმთავრესი პრობლემაა. საერთო გადარჩენის უპირატესობის მონაცემების არქონის გამო ჩვენს ქვეყანაში სწრაფი ანაზღაურების ნებართვას არ ველით.
წყაროები
Effects of cryotherapy on objective and subjective symptoms of paclitaxel-induced neuropathy: Prospective self-controlled trial.
J Natl Cancer Inst. 2018
2. Dickler MN, Tolaney SM, Rugo HS, et al.
MONARCH 1, A Phase II Study of Abemaciclib, a CDK4 and CDK6 Inhibitor, as a Single Agent, in Patients with Refractory HR(+)/HER2(-) Metastatic Breast Cancer.
Clin Cancer Res. 2017
3. Tripathy D, Sohn J, Im S-A, Colleoni M, et al.
First-line ribociclib vs placebo with goserelin and tamoxifen or a non-steroidal aromatase inhibitor in premenopausal women.
SABCS. 2017
4. Pan H, Gray R, Braybrooke J, et al.
20-Year Risks of Breast-Cancer Recurrence after Stopping Endocrine Therapy at 5 Years.
N Engl J Med 2017.
5. Van Poznak C, Somerfield MR, Barlow WE, et al.
Role of Bone-Modifying Agents in Metastatic Breast Cancer: An American Society of Clinical Oncology-Cancer Care Ontario Focused Guideline Update.
J Clin Oncol 2017.
6. Giuliano AE, Ballman KV, McCall L, et al.
Effect of Axillary Dissection vs No Axillary Dissection on 10-Year Overall Survival Among Women With Invasive Breast Cancer and Sentinel Node Metastasis: The ACOSOG Z0011 (Alliance) Randomized Clinical Trial.
JAMA 2017.
7. Sledge GW Jr, Toi M, Neven P, et al.
MONARCH 2: Abemaciclib in Combination With Fulvestrant in Women With HR+/HER2- Advanced Breast Cancer Who Had Progressed While Receiving Endocrine Therapy.
J Clin Oncol 2017.
8. Dickler MN, Tolaney SM, Rugo HS, et al.
MONARCH 1, A Phase II Study of Abemaciclib, a CDK4 and CDK6 Inhibitor, as a Single Agent, in Patients with Refractory HR(+)/HER2(-) Metastatic Breast Cancer.
Clin Cancer Res 2017.
9. Coles CE, Griffin CL, Kirby AM, et al.
Partial-breast radiotherapy after breast conservation surgery for patients with early breast cancer (UK IMPORT LOW trial): 5-year results from a multicentre, randomised, controlled, phase 3, non-inferiority trial.
Lancet 2017.
10. Blum JL, Flynn PJ, Yothers G, et al.
Anthracyclines in Early Breast Cancer: The ABC Trials-USOR 06-090, NSABP B-46-I/USOR 07132, and NSABP B-49 (NRG Oncology).
J Clin Oncol 2017.
11. Fournier A, Mesrine S, Gelot A, et al.
Use of Bisphosphonates and Risk of Breast Cancer in a French Cohort of Postmenopausal Women.
J Clin Oncol 2017.
12. Kuchenbaecker KB, Hopper JL, Barnes DR, et al.
Risks of Breast, Ovarian, and Contralateral Breast Cancer for BRCA1 and BRCA2 Mutation Carriers.
JAMA 2017.
13. von Minckwitz G, Procter M, de Azambuja E, et al.
Adjuvant Pertuzumab and Trastuzumab in Early HER2-Positive Breast Cancer.
N Engl J Med 2017.
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.