Abemaciclib-მა ჰორმონ-დადებითი ძუძუს კიბოს სამკურნალოდ FDA-ს ნებართვა მიიღო

28 სექტემბერს 2017 წელს აშშ-ის სურსათისა და წამლების ადმინისტრაციამ FDA-მ ჰორმონული მკურნალობის შემდეგ პროგრესირებადი, ჰორმონული რეცეპტორების დადებითი, HER2-უარყოფითი ადგილობრივად გავრცელებული ან მეტასტაზური ძუძუს კიბოს მქონე ქალებისთვის abemaciclib-ის (სავაჭრო სახელი Verzenio) ფულვესტრანტთან ერთად გამოყენება დაამტკიცა. ასევე ცალკე გამოყენება დაამტკიცა როგორც ქალებში, ისე მამაკაცებში, რომელთაც ჰორმონული რეცეპტორების დადებითი, HER2-უარყოფითი დაავადება ჰორმონული თერაპიის შემდეგ ადგილობრივად გავრცელდა ან მეტასტაზური გახდა, მეტასტაზებისთვის ქიმიოთერაპია მიიღეს და შემდეგაც პროგრესირება გაგრძელდა.

Abemaciclib კიბოს უჯრედშიდა ზრდის სასიგნალო გზების ციკლინდამოკიდებულ 4/6 კინაზას ბლოკავს. Palbociclib -ისა და ribociclib-ის შემდეგ მესამე თაობის ციკლინდამოკიდებულ 4/6 კინაზის ინჰიბიტორმა abemaciclib-მაც ძუძუს კიბოსთვის FDA-ს ნებართვა მიიღო.

ფულვესტრანტთან კომბინაციის დამტკიცება დაეყრდნო მანამდე მეტასტაზური დაავადებისთვის ქიმიოთერაპიის არმიმღებ, ჰორმონული მკურნალობის შემდეგ პროგრესირებადი, ჰორმონრეცეპტორ-დადებითი, HER2-უარყოფითი მეტასტაზური ძუძუს კიბოს მქონე ქალების რანდომიზებულ, პლაცებოკონტროლირებულ მრავალცენტრულ MONARCH 2 კვლევას.

კვლევაში 669 პაციენტი ორ ჯგუფად დაყვეს: დღეში ორჯერ პერორალურად აბემაციკლიბს ან პლაცებოს იღებდნენ; ასევე 28-დღიანი ციკლების პირველში 1. და 15. დღეებზე, ხოლო 2. და შემდეგ ციკლებში 1. დღეს 500 mg ფულვესტრანტის კუნთშიდა ინექციას. მკურნალობა უკონტროლო ტოქსიკურობამდე ან პროგრესირებამდე გრძელდებოდა.

ფულვესტრანტისა და abemaciclib-ის ჯგუფში პროგრესირებისგან თავისუფალი გადარჩენის მედიანა — მკურნალობით დაავადების კონტროლის დრო — 16.4 თვე იყო, პლაცებოსა და ფულვესტრანტის ჯგუფში კი 9.3 თვე. ობიექტური პასუხი პირველში %48.1, მეორეში %21.3 იყო.

ცალკე გამოყენება დაეყრდნო ქალების ერთჯგუფიან, ღია, მრავალცენტრულ კვლევას: მათ დაავადების ნებისმიერ ეტაპზე ტაქსანი, მეტასტაზებისთვის ერთი ან ორი ქიმიოთერაპიის სქემა ჰქონდათ მიღებული და ენდოკრინული მკურნალობისას ან შემდეგ პროგრესირებდა გაზომვადი, ჰორმონული რეცეპტორების დადებითი, HER2-უარყოფითი მეტასტაზური ძუძუს კიბო. MONARCH 1 კვლევაში 132 პაციენტი ჩართეს; პროგრესირებამდე ან უმართავ ტოქსიკურობამდე პერორალურად 200 mg abemaciclib დღეში ორჯერ ეძლეოდათ. ობიექტური პასუხი %19.7, პასუხის მედიანური ხანგრძლივობა 8.6 თვე იყო.

ყველაზე ხშირი გვერდითი ეფექტები იყო დიარეა, თეთრი სისხლის უჯრედების — ლეიკოციტების შემცირება, გულისრევა, მუცლის ტკივილი, ინფექციები, სისუსტე, ანემია, მადის დაქვეითება, ღებინება, თავის ტკივილი და თრომბოციტების შემცირება. ფულვესტრანტთან კომბინაციაში ყველაზე ხშირად აღწერილი (≥% 5) 3. ან 4. ხარისხის ეფექტები იყო ლეიკოციტების შემცირება, დიარეა, ანემია და ინფექციები.

რეკომენდებული საწყისი დოზაა ფულვესტრანტთან კომბინაციაში დღეში ორჯერ 150 mg ან მონოთერაპიად დღეში ორჯერ 200 mg.