ESMO 2019 კონგრესის ვარსკვლავები: ძუძუს, ფილტვისა და საკვერცხის კიბოს კვლევები

დაახლოებით 30 ათასი ონკოლოგიის პროფესიონალის გამაერთიანებელი ევროპის კიბოს კონგრესი ESMO 2019, 27 სექტემბრიდან 1 ოქტომბრამდე ესპანეთის ქალაქ ბარსელონაში გაიმართება.

ევროპის სამედიცინო ონკოლოგიის საზოგადოება (European Society for Medical Oncology, ESMO) 1975 წელს დაარსებიდან ასრულებს კიბოს კვლევების მხარდაჭერის მისიას, უპირველესად ევროპაში და ასევე მთელ მსოფლიოში.

წელს კონგრესს რეკორდულ დასწრებასთან ერთად სამეცნიერო განაცხადების რეკორდული რაოდენობაც ჰქონდა და 2200 ორიგინალური კვლევა მიიღეს. ასევე არის 92 late-breaking abstracts, ანუ ბოლო მომენტში შეტყობინებული კვლევა, რომელთა შედეგები ჯერ არ გამოცხადებულა.

წელს ESMO კონგრესის ყველაზე საყურადღებო და კლინიკური პრაქტიკის შეცვლის მოსალოდნელი კვლევები ძუძუს, ფილტვის და საკვერცხის კიბოებიდან მოდის.

მსოფლიოს ონკოლოგიის ორი უდიდესი შეხვედრიდან ერთ-ერთზე, ESMO კონგრესზე, წელს იმუნოთერაპიაში „ძალიან ინოვაციურ სტრატეგიებსა“ და ზუსტი მედიცინის გამოყენებაში „მრავალ წინსვლას“ ვიხილავთ, განაცხადა ESMO-ს პრესისა და მედიის ხელმძღვანელმა, ექიმმა Pilar Garrido-მ.

ძუძუს კიბოს კლინიკური კვლევების ახალი შედეგები

წელს ძუძუს კიბოს ყველაზე განხილვადი კვლევები იყო შორს წასული ჰორმონდადებითი და ჰორმონის დათრგუნვისადმი რეზისტენტული სიმსივნეებისთვის CDK 4/6 ინჰიბიტორების მოსალოდნელი ხანგრძლივი შედეგები. ესენია MONARCH-2 კვლევა აბემაციკლიბი (Verzenio) პლუს ფულვესტრანტისთვის და MONALEESA-3 კვლევა რიბოციკლიბი (Kisqali) პლუს ფულვესტრანტისთვის.

ცვლილება საკვერცხის კიბოს სტანდარტულ მკურნალობაში?

რამდენიმე კვლევა, როგორც ჩანს, საკვერცხის კიბოს სტანდარტული მკურნალობის შეცვლის პოტენციალს ატარებს.

PAOLA-1 კვლევამ შეისწავლა ოლაპარიბი (Lynparza) პლუს ბევაციზუმაბით შემანარჩუნებელი მკურნალობა პლატინაზე დაფუძნებული ქიმიოთერაპიით ნამკურნალებ შორს წასული საკვერცხის კიბოს პაციენტებში (LBA-2).

ამ კვლევის საკვანძო ასპექტია, რომ ეს შესაძლო ორკომპონენტიანი შემანარჩუნებელი/დამცავი სტრატეგია ყველა პაციენტისთვისაა, BRCA1 / 2 მუტაციის სტატუსისგან დამოუკიდებლად.

ახალი მონაცემები ფილტვის კიბოში

ფილტვის კიბოს შესახებ ორი კვლევა წარდგება: ერთი იმუნოთერაპიის გამოყენების დროს ეხება, მეორე — ზუსტ მედიცინას.

FLAURA კვლევა EGFR მუტაციადადებით პაციენტებში ჩატარდა, რომლებიც არაწვრილუჯრედოვანი ფილტვის კიბოს პაციენტების % 10-დან % 13-მდე შეადგენს.

ვიცოდით, რომ ამ კვლევის ექსპერიმენტული ჯგუფის პრეპარატი ოსიმერტინიბი (Tagrisso) შორს წასული EGFR-დადებითი ფილტვის კიბოსთვის ყველაზე იდეალური პირველი ხაზის მკურნალობაა, თუმცა წელს საერთო გადარჩენის შედეგებს მოვისმენთ (LBA-5).

მეორე კვლევა ხანგრძლივად ნანატრი იმუნოთერაპიის კომბინაციის კვლევაა: CheckMate 227. შორს წასული არაწვრილუჯრედოვანი ფილტვის კიბოს პაციენტებში ნივოლუმაბი (Opdivo) პლუს დაბალი დოზის იპილიმუმაბის (Yervoy) კომბინაცია პლატინაზე დაფუძნებულ ქიმიოთერაპიას შეადარეს. პაციენტების შესარჩევად გამოიყენეს სიმსივნის მუტაციური დატვირთვის სახელით ცნობილი ბიომარკერი.

ამ კვლევის ადრე წარმოდგენილი პროგრესირების გარეშე გადარჩენისა და პასუხის მაჩვენებლები ძალიან საყურადღებო იყო, თუმცა საერთო გადარჩენის შედეგებში მნიშვნელოვანი გაუმჯობესება არ ყოფილა.

წელს მივიღებთ შედეგებს, რომლებიც კლინიკურ კვლევებში უკვე გამოყენებულ სხვა ბიომარკერს, დაპროგრამებული სიკვდილის ლიგანდ 1-ს (PD-L1) ეფუძნება. ეს ახალი მონაცემები გამოავლენს, შეიძლება თუ არა ზოგ პაციენტთა ჯგუფში ქიმიოთერაპიის ნაცვლად კომბინირებული იმუნოთერაპიის გამოყენება (LBA-4).

იშვიათი კიბოები

წარდგება ClarIDHy კვლევა ივოსიდენიბისა (Tibsovo) და პლაცებოს შედარებით იმ პაციენტებში, რომელთაც შორს წასული ქოლანგიოკარცინომის (სანაღვლე სადინრის კიბოს) ძალიან იშვიათი ფორმა, IDH1 მუტაციადადებითი სიმსივნე აქვთ (LBA11).

თუ კვლევა დადებითია და შედეგები საკმარისად კარგია, ასეთი შორს წასული დაავადების ყოველი 6 პაციენტიდან 1-ისთვის ეფექტიანი მკურნალობა შეიძლება გვქონდეს. ამჟამად მათ ძალიან მცირე არჩევანი აქვთ, ამიტომ შედეგები შესაძლოა მართლაც საინტერესო იყოს.

წარდგება IMvigor130 კვლევა, რომელიც მანამდე არანამკურნალებ, ადგილობრივად შორს წასულ ან მეტასტაზურ უროთელურ კარცინომაში (შარდის ბუშტის კიბოში) პლატინაზე დაფუძნებულ ქიმიოთერაპიაზე დამატებულ იმუნოთერაპია ატეზოლიზუმაბს (Tecentriq) პლაცებოს ადარებს.

INVICTUS სახელწოდების ორმაგად ბრმა, პლაცებოკონტროლირებულ ფაზა 3 კვლევაში წარდგება გასტროინტესტინური სტრომული სიმსივნის პაციენტებში ახალი საშუალების, რიპრეტინიბის, სულ მცირე მე-4 ხაზის მკურნალობად გამოცდის შედეგები (LBA87).

ახალი კლინიკური მონაცემების გარდა სხვა საკითხების სესიებს შორის არის სიმპოზიუმი, რომელიც ონკოლოგთა პროფესიულ გადაწვასა და შესაბამის ფსიქოლოგიურ მხარდაჭერაზეა ფოკუსირებული.