ESMO 2019 Konqresinin ulduzu: süd vəzi, ağciyər və yumurtalıq xərçəngi tədqiqatları

30 minə yaxın onkologiya mütəxəssisini bir araya gətirəcək Avropa Xərçəng Konqresi ESMO 2019, 27 Sentyabr - 1 Oktyabr tarixlərində İspaniyanın Barselona şəhərində keçiriləcək.

Avropa Tibbi Onkologiya Cəmiyyəti (European Society for Medical Oncology, ESMO) qurulduğu 1975-ci ildən bəri başda Avropa olmaqla dünyanın hər yerində xərçəng tədqiqatlarını dəstəkləmə missiyasını yerinə yetirir.

Bu il konqresə rekord iştirakla yanaşı rekord elmi tədqiqat müraciəti oldu və 2200 orijinal tədqiqat qəbul edildi. Həmçinin nəticələri hələ açıqlanmayan 92 late-breaking abstracts (son anda bildirilən elmi tədqiqat) var.

Bu il ESMO konqresində ən diqqətçəkən və klinik praktikanı dəyişdirməsi gözlənilən tədqiqatlar süd vəzi, ağciyər və yumurtalıq xərçənglərindən gəldi.

Dünyanın ən böyük iki onkologiya toplantısından biri olan ESMO Konqresində bu il immunoterapiyada "çox innovativ strategiyalar" və dəqiq tibbin istifadəsində "bir çox irəliləyiş" görüləcəyini ESMO Mətbuat və Media rəhbəri Dr. Pilar Garrido açıqladı.

Süd vəzi xərçəngi klinik tədqiqatlarının yeni nəticələri

Bu il süd vəzi xərçəngində ən çox danışılacaq klinik tədqiqatlar irəli mərhələli hormon müsbət və hormon basqılanmasına davamlı süd vəzi şişləri üçün CDK 4/6 inhibitoru tədqiqatlarının gözlənilən uzunmüddətli nəticələri idi. Bunlar abemasiklib (Verzenio) üstəgəl fulvestrant üçün MONARCH-2 və ribosiklib (Kisqali) üstəgəl fulvestrant üçün MONALEESA-3 tədqiqatlarıdır.

Yumurtalıq xərçənginin standart müalicəsində dəyişiklik?

Bir neçə tədqiqat yumurtalıq xərçənginin standart müalicəsini potensial olaraq dəyişdirəcək xüsusiyyətdə görünür.

PAOLA-1 sınağı platin əsaslı kimyaterapiya ilə müalicə edilən irəli yumurtalıq xərçəngli xəstələrdə olaparib (Lynparza) üstəgəl bevasizumabla saxlayıcı müalicəni araşdırdı (LBA-2).

Tədqiqatın əsas məqamı bu potensial ikili saxlayıcı/qoruyucu müalicə strategiyasının BRCA1 / 2 mutasiya vəziyyətindən asılı olmayaraq bütün xəstələr üçün olmasıdır.

Ağciyər xərçəngində yeni məlumatlar

Ağciyər xərçəngi ilə bağlı biri immunoterapiyanın nə zaman istifadə olunacağına, digəri dəqiq tibbə həsr olunan iki tədqiqat təqdim ediləcək.

FLAURA sınağı kiçik hüceyrəli olmayan ağciyər xərçəngli xəstələrin % 10 ilə % 13-nü təmsil edən EGFR mutasiyası müsbət xəstələrdə aparılmışdır.

Bu tədqiqatın eksperimental qolu olan osimertinibin (Tagrisso) irəli mərhələli EGFR müsbət ağciyər xərçəngi üçün ən ideal birinci xətt müalicə olduğunu bilirdik, lakin bu il ümumi sağqalım nəticələrini eşidəcəyik (LBA-5).

Digər tədqiqat çoxdan gözlənilən immunoterapiya kombinasiyası tədqiqatıdır: CheckMate 227. İrəli mərhələli kiçik hüceyrəli olmayan ağciyər xərçəngli xəstələrdə nivolumab (Opdivo) üstəgəl aşağı dozalı ipilimumab (Yervoy) kombinasiyası platin əsaslı kimyaterapiya ilə müqayisə edildi. Bu tədqiqatda xəstə seçimi vasitəsi kimi şiş mutasiya yükü adlı biomarker istifadə edilmişdi.

Bu tədqiqatın əvvəl təqdim edilmiş proqressiyasız (irəliləməsiz) sağqalım və müalicəyə cavab göstəriciləri çox diqqətçəkən olsa da, ümumi sağqalım nəticələrində əhəmiyyətli yaxşılaşma yox idi.

Bu il hazırda klinik sınaqlarda tətbiq edilən digər bioloji marker, proqramlaşdırılmış ölüm liqandı 1-ə (PD-L1) əsaslanan nəticələri əldə edəcəyik. Bu yeni məlumatlar bəzi xəstə qruplarında kimyaterapiya əvəzinə kombinə immunoterapiyanın istifadə edilə biləcəyini göstərəcək (LBA-4).

Nadir xərçənglər

İrəli mərhələli xolangiokarsinomanın (öd kanalı xərçəngi) çox nadir forması olan IDH1 mutasiyası müsbət şişli xəstələrdə aparılmış ClarIDHy tədqiqatında ivosideniblə (Tibsovo) plasebonu müqayisə edən təqdimat olacaq (LBA11).

Tədqiqat müsbətdirsə və nəticələr yetərincə yaxşıdırsa, bu cür irəli xəstəliyi olan 6 xəstənin 1-də təsirli müalicə seçiminə malik ola bilərik. Hazırda onların müalicə seçimi çox azdır, buna görə nəticələr həqiqətən cəlbedici ola bilər.

Əvvəllər müalicə almamış yerli irəliləmiş və ya metastatik urotelial karsinoma (sidik kisəsi xərçəngi) müalicəsində platin əsaslı kimyaterapiyaya əlavə immunoterapiya atezolizumab (Tecentriq) ilə plasebonu müqayisə edən IMvigor130 tədqiqatı təqdim ediləcək.

INVICTUS adlı ikiqat kor, plasebo nəzarətli faza 3 tədqiqatında qastrointestinal stromal şişli xəstələrdə ripretinib adlı yeni agentin ən az 4. xətt müalicə kimi sınanmasının nəticələri təqdim ediləcək (LBA87).

Yeni klinik məlumatlardan başqa mövzuları əhatə edən sessiyalar arasında onkoloqlarda tükənmişlik və əlaqəli psixoloji dəstəyə yönəlmiş simpozium var.