George Papanicolaou, რომელმაც Pap smear-ით მილიონობით ქალი გადაარჩინა

საშვილოსნოს ყელის კიბოს სკრინინგისთვის გამოყენებული Pap smear-ის ან ნაცხის ტესტის აღმომჩენი, მეცნიერებისთვის თავდადებული და კიბოს დამარცხების შესაძლებლობის დამადასტურებელი George Nicholas Papanicolaou-ს თავმდაბალ ცხოვრებაში ვიმოგზაუროთ.

13 მაისს 1883 წელს საბერძნეთის ევბეის კუნძულის კიმიში დაბადებული George Nicholas Papanicolaou თავდაპირველად მუსიკასა და ჰუმანიტარულ მეცნიერებებში სპეციალიზდებოდა, თუმცა ექიმი მამის გავლენით მედიცინა აირჩია და 1904 წელს წარჩინებით დაამთავრა. ჯარში მცირე ხნით ქირურგის ასისტენტი იყო, შემდეგ კიმიში ორი წელი კეთროვანებს მკურნალობდა. 1910 წელს მიუნხენის უნივერსიტეტში ზოოლოგიის დოქტორანტურა დაიწყო. მალე ცნობილ სამხედრო ოჯახში დაბადებულ Andromache Mavroyeni-ზე დაქორწინდა. დედის გარდაცვალების შემდეგ წყვილი საბერძნეთში დაბრუნდა. 1912 წელს პირველი ბალკანური ომისას სამედიცინო ნაწილებში ჯარისკაცად შეუერთდა. აშშ-ის კარიერული შესაძლებლობებითაც ინტერესდებოდა და ცოლთან ახალი ცხოვრების დასაწყებად 19 ოქტომბერს 1913 წელს ნიუ-იორკში გადავიდა. 1914 წელს ნიუ-იორკის უნივერსიტეტის პათოლოგიასა და კორნელის სამედიცინო კოლეჯის ანატომიის დეპარტამენტში ადამიანის ფიზიოლოგიის კვლევა დაიწყო.

სქესის კვლევიდან კიბოს ადრეული დიაგნოსტიკის აღმოჩენამდე

1916 წელს ზღვის გოჭებში სქესობრივი ქრომოსომების კვლევისას აღმოაჩინა, რომ გამრავლების ციკლების დადგენა ვაგინალური სეკრეციის ნაცხით შეიძლებოდა. 1920 წლიდან ადამიანის რეპროდუქციული სისტემის ციტოპათოლოგიაზე კონცენტრირდა. ნაცხში ნორმალურ და ავთვისებიან საშვილოსნოს ყელის უჯრედთა მიკროსკოპიული სხვაობა აღმოაჩინა. 1928 წელს პირველი პუბლიკაცია წარადგინა, იმავე წელს აშშ-ის მოქალაქე გახდა და კორნელში ასისტენტ-პროფესორობა მიიღო. ნიუ-იორკის საავადმყოფოს კვლევის ფარგლებში 1943 წელს გინეკოლოგიურ პათოლოგ Dr. Herbert Traut-თან ერთად მენსტრუალური ციკლის ცვლილებებისა და ჰორმონებისა თუ ავთვისებიანი სიმსივნის ვაგინალურ ციტოლოგიაზე გავლენის ამხსნელი „საშვილოსნოს ყელის კიბოს დიაგნოსტიკა ვაგინალური ნაცხით“ წიგნი გამოსცა.

მის მიერ აღმოჩენილი და სახელის საწყისი ასოებით წოდებული Pap smear (ნაცხის) ტესტი, დღესაც ერთ-ერთი ყველაზე გავრცელებული კიბოს სკრინინგის მეთოდია. იაფი და მარტივი მეთოდი ძალიან ადრეულ კიბოსა და კიბოსწინარე კერებსაც ცნობს. საშოდან ან ყელიდან აღებული ნორმალური და არანორმალური ნაცხის მიკროსკოპით ნახვასა და სწორ კლასიფიკაციას უზრუნველყოფს. 1940-იანი წლებიდან ადრეული აღმოჩენითა თუ კიბომდე ჩარევით მილიონობით ქალი უარყოფითი შედეგებისგან დაიცვა.

- დაკავშირებული თემა: საშვილოსნოს ყელის კიბოს სიმპტომები და მკურნალობა (დაწვრილებით)

1951 წელს Papanicolaou კორნელის სამედიცინო კოლეჯის ემერიტუსი გახდა, სადაც დღეს მისი სახელის ორი ლაბორატორიაა. 1954 წელს გამოსცა „ექსფოლიაციური ციტოლოგიის ატლასი“, ჯანსაღი და დაავადებული ქსოვილების ფართო აღწერით არა მარტო ქალის რეპროდუქციულ, არამედ სხვა სისტემებშიც. სულ ოთხი წიგნი და ასზე მეტი სტატია დაწერა. მრავალი ჯილდო, მათ შორის აშშ-ის, იტალიისა და საბერძნეთის უნივერსიტეტების საპატიო ხარისხები მიიღო. ცნობილია ამერიკის სამედიცინო კოლეჯების ასოციაციის Borden პრემიით (1940), ამერიკის ხელოვნებისა და მეცნიერების აკადემიის Amory პრემიით (1947), საზოგადოებრივი ჯანმრთელობის ასოციაციის კლინიკური კვლევის Albert Lasker პრემიით (1950) და კიბოს საზოგადოების ღირსების მედლით (1952). ათენის მეანობა-გინეკოლოგიის საზოგადოებისა და ნიუ-იორკის მეცნიერებათა აკადემიის საპატიო წევრი გახდა.

თითქმის ორმოცდაათწლიანი კარიერის შემდეგ 1961 წელს მაიამის კიბოს ინსტიტუტის განვითარების და ხელმძღვანელობისთვის ნიუ-იორკიდან მაიამიში გადავიდა. ჩასვლიდან სამი თვის შემდეგ, 19 თებერვალს 1962 წელს, ინფარქტით გარდაიცვალა. მის პატივსაცემად ინსტიტუტს Papanicolaou-ს კიბოს კვლევის ინსტიტუტი ეწოდა.

დღეს საშუალო რისკის ქალებს Pap smear სკრინინგს 21 წლიდან ყოველ 3 წელიწადში ვურჩევთ (დაწვრილებით იხილეთ: კიბოს სკრინინგის მოქმედი პროგრამები).

დაკავშირებული თემები:

- რას ნიშნავს Pap smear-ის არანორმალური შედეგი?

- საშვილოსნოს ყელის კიბოს პრევენციისა და ადრეული დიაგნოსტიკის გზამკვლევი განახლდა!

ქვემოთ მოცემული ინფოგრაფიკული პოსტერით საშვილოსნოს ყელის კიბოს, Pap smear-ისა და HPV ვაქცინის შესახებ პრაქტიკულ და დეტალურ ინფორმაციას მიიღებთ.