იყავით აქტიური ხანდაზმულ ასაკში...

კორნელის უნივერსიტეტის მიერ ჩატარებულ კვლევაში დადგინდა, რომ მენოპაუზის შემდგომ ხანდაზმულ ასაკში უმოძრაო ცხოვრების წესით მცხოვრები ქალები უფრო ადრე იღუპებოდნენ, ვიდრე მათი უფრო აქტიური თანატოლები.

ჩვენი ცხოვრების არცერთ პერიოდში არ უნდა ვიცხოვროთ უმოძრაო ცხოვრების წესით. საყოველთაოდ ცნობილია, რომ ასაკის მატებასთან ერთად ორგანიზმში გარკვეული ცვლილებები ხდება. მეტაბოლიზმი ნელდება და, რადგან მიღებული საკვები სწრაფად ვეღარ იწვება, წონის მომატება უფრო ადვილი ხდება. ჭარბი წონა და უმოძრაო ცხოვრების წესი იმ ძირითად ფაქტორებს შორისაა, რომლებიც მრავალი დაავადების, განსაკუთრებით კი კიბოს, განვითარებას უწყობს ხელს. ამიტომ რეგულარული ვარჯიში სასარგებლოა როგორც თქვენი ფიზიკური, ისე ფსიქიკური ჯანმრთელობისთვის.

ამ თვალსაზრისით, კორნელის უნივერსიტეტში ჩატარებულ კვლევაში მენოპაუზის შემდგომ ხანდაზმულ ასაკში 93.000 ქალის ცხოვრების წესი შეისწავლეს. მიღებულმა შედეგებმა აჩვენა, რომ ქალებს, რომლებიც დღეში 11 საათზე მეტხანს ისხდნენ ან უმოძრაოდ ატარებდნენ დროს, იმ ქალებთან შედარებით, რომლებიც დღეში 4 საათს ან ნაკლებს ატარებდნენ უმოძრაოდ, სიცოცხლის დაკარგვის %12-ით მეტი რისკი ჰქონდათ. იმავე კვლევის თანახმად, უმოძრაო ცხოვრების წესით მცხოვრები იმავე ჯგუფის ქალებში გულ-სისხლძარღვთა დაავადებებთან დაკავშირებული სიცოცხლის დაკარგვის რისკი შეადგენდა %13-ს, კიბოსთან დაკავშირებული სიცოცხლის დაკარგვის რისკი — %21-ს, ხოლო გულის კორონარულ დაავადებებთან დაკავშირებული სიცოცხლის დაკარგვის რისკი — %27-ს.

კვლევაში მონაწილე 50-79 წლის ასაკის ქალებს 12 წელზე მეტი ხნის განმავლობაში აკვირდებოდნენ. მიღებული შედეგები ამერიკის პრევენციული მედიცინის ჟურნალში გამოქვეყნდა. ამ შედეგების მიხედვით, მაშინაც კი, თუ დღის განმავლობაში დიდხანს გიწევთ ჯდომა, რეგულარული ვარჯიში და აქტიური ცხოვრების წესი დაგეხმარებათ იყოთ აქტიური და დაგიცავთ ჯანმრთელობის შესაძლო პრობლემებისგან.

მკვლევართა აზრით, ქალები კუნთოვანი მასის დაკარგვას 35 წლის ასაკიდან იწყებენ, ეს დანაკარგი კი მენოპაუზასთან ერთად ჩქარდება და წონის მომატება უფრო ადვილი ხდება. ამის თავიდან აცილება შეგიძლიათ რეგულარული ვარჯიშითა და ყოველდღიურ ცხოვრებაში მეტი აქტიურობით.

დღევანდელი პირობები ამცირებს თავისუფალ დროს, სატრანსპორტო საშუალებებით გადაადგილების გაზრდით ზრდის ჯდომის დროს, ხოლო კომპიუტერებისა და უახლესი მოდელის ტელეფონების საშუალებით კომუნიკაცია ფიზიკური აქტივობის დონეს ამცირებს. ამიტომ გარემო ფაქტორებთან დაკავშირებულ წონის მატებასა და ვარჯიშს შორის კავშირი თანდათან ძლიერდება.

ამიტომ, როცა დრო გექნებათ, გაისეირნეთ.. ოჯახთან ან მეგობრებთან ერთად პარკში გაისეირნეთ.. მცირე მანძილებზე ფეხით იარეთ.. ეცადეთ, წონაში არ მოიმატოთ და მეტი ბოსტნეული და ხილი მიირთვით.. მეტი საოჯახო საქმე გააკეთეთ.. შეზღუდეთ კომპიუტერისა და ტელევიზორის წინ გატარებული დრო.. რაც მთავარია, თქვენი ჯანმრთელობის მდგომარეობის შესაბამისად, ყოველდღე 45წთ.-1 საათი რეგულარულად ივარჯიშეთ..

არ დაგავიწყდეთ! თქვენს ცხოვრებაში შეტანილი მცირე ცვლილებები დიდ განსხვავებებს შექმნის..