İrəli yaşlarda aktiv olun...

Kornell Universitetinin apardığı araşdırmada, menopauzadan sonra irəli yaşlarda hərəkətsiz həyat sürən qadınların daha aktiv olan yaşıdları ilə müqayisədə daha erkən vəfat etdiyi müşahidə edilmişdir.

Həyatımızın heç bir dövründə hərəkətsiz həyat sürməməliyik. Yaşın irəliləməsi ilə bədəndə bəzi dəyişikliklərin baş verməsi hamıya məlum olan bir həqiqətdir. Metabolizm zəifləyir, qəbul edilən qidalar tez yandırılmadığı üçün çəki almaq daha da asanlaşır. Artıq çəki və hərəkətsiz həyat sürmək, başda xərçəng olmaqla, bir çox xəstəliyə səbəb olan amillərin əsasları sırasında yer alır. Bu səbəbdən müntəzəm idmanla məşğul olmaq həm fiziki, həm də psixoloji sağlamlığınız üçün faydalıdır.

Bu baxımdan, Kornell Universitetində aparılan araşdırmada menopauzadan sonra irəli yaşlarda 93.000 qadının həyat tərzi araşdırılmışdır. Əldə edilən nəticələrə əsasən, gündə 11 saatdan çox oturan və ya hərəkətsiz vaxt keçirən qadınların, gündə 4 saat və ya daha az hərəkətsiz vaxt keçirən qadınlarla müqayisədə %12 nisbətində daha yüksək ölüm riski daşıdığı müəyyən edilmişdir. Yenə həmin araşdırmaya görə, hərəkətsiz həyat sürən və eyni qrupda yer alan qadınlarda ürək-damar xəstəlikləri ilə əlaqəli ölüm riski %13, xərçənglə əlaqəli ölüm riski %21, koronar ürək xəstəlikləri ilə əlaqəli ölüm riski isə %27 nisbətindədir.

Araşdırmada iştirak edən 50-79 yaşları arasındakı qadınlar 12 ildən çox müddət ərzində izlənilmişdir. Əldə edilən nəticələr Amerikan Profilaktik Tibb Jurnalında paylaşılmışdır. Bu nəticələrə görə, gün ərzində uzun saatlar oturaraq keçirsəniz belə, müntəzəm idman və aktiv həyat sayəsində fəal olmağınız sizi yarana biləcək mümkün sağlamlıq problemlərindən qoruyacaqdır.

Tədqiqatçıların fikrincə, qadınlar 35 yaşından etibarən əzələ kütləsini itirməyə başlayır və bu itki menopauza ilə birlikdə sürətlənir, çəki almaq asanlaşır. Müntəzəm idmanla məşğul olaraq və gündəlik həyatınızda daha aktiv olmaqla bunun qarşısını ala bilərsiniz.

Müasir şərait boş vaxtı azaldır, nəqliyyatdan istifadəni artıraraq oturma müddətini çoxaldır, ünsiyyəti kompüter və ən yeni telefonlarla təmin etməklə fiziki aktivlik səviyyəsini azaldır. Bu səbəbdən ətraf mühit amilləri ilə əlaqəli çəki alma və idmanla məşğul olma arasındakı əlaqə getdikcə güclənir.

Buna görə də, vaxt tapdıqca gəzintiyə çıxın.. Ailənizlə və ya dostlarınızla parkda gəzin.. Qısa məsafələrə piyada gedin.. Daha çox tərəvəz və meyvə ilə qidalanaraq çəki almamağa çalışın.. Daha çox ev işi görün.. Kompüter və televizor qarşısında keçirdiyiniz vaxtı məhdudlaşdırın.. Ən əsası, sağlamlığınızın imkan verdiyi ölçüdə hər gün 45dəq.-1 saat müntəzəm idmanla məşğul olun..

Unutmayın! Həyatınızda edəcəyiniz kiçik dəyişikliklər böyük fərqlər yaradacaq..