ხმელთაშუაზღვის დიეტამ შეიძლება იმუნოთერაპიაზე პასუხის სიხშირე გაზარდოს

კვების გავლენა ჯანმრთელობაზე დღითიდღე უკეთ ხდება ცნობილი. ბევრი პაციენტი, პაციენტის ახლობელი თუ ჯანდაცვის მუშაკი როგორც დაავადებების პრევენციის, ისე მათი მკურნალობისთვის გარკვეულ დიეტებს ან საკვებ დანამატებს ეყრდნობა. სამეცნიერო კვლევები აჩვენებს, რომ ამ მოლოდინების უმეტესობა გადაჭარბებულია; თუმცა დიეტის მცირე ნაწილი (მაგალითად, ხმელთაშუაზღვის ან MIND) ჯანმრთელობისთვის სასარგებლო გავლენით გამოირჩევა.

ახალი კვლევის თანახმად, ხმელთაშუაზღვის დიეტამ კანის კიბოს იშვიათი და აგრესიული ბიოლოგიის მქონე ქვეტიპის, მელანომის დროს, შეიძლება იმუნოთერაპიაზე პასუხის სიხშირე და პროგრესირების გარეშე გადარჩენის ხანგრძლივობა გაზარდოს.

ვვარაუდობთ, რომ მომავალში იმუნოთერაპიის წარმატებაში კვებამ შესაძლოა მნიშვნელოვანი როლი შეასრულოს. ამჟამად ფართოვდება კლინიკური კვლევები, რომლებიც დიეტის სახეობების გავლენას სხვადასხვა ტიპის სიმსივნეზე, მათ შორის საჭმლის მომნელებელი სისტემის კიბოზე, სწავლობს.

ზეითუნის ზეთიდან, თხილეულიდან და თევზიდან მიღებული მონო- და პოლიუჯერი ცხიმებით მდიდარი ხმელთაშუაზღვის დიეტის დაცვა, ასევე პოლიფენოლები და ბოსტნეულიდან, ხილიდან და მთლიანი მარცვლეულიდან მიღებული ბოჭკო მნიშვნელოვნად იყო დაკავშირებული შორსწასული მელანომის მქონე პაციენტებში „იმუნური საკონტროლო წერტილების ინჰიბიტორების“ კლასის იმუნოთერაპიაზე პასუხის ზრდასთან.

რა არის იმუნური საკონტროლო წერტილის ინჰიბიტორი?

იმუნური საკონტროლო წერტილების ინჰიბიტორები წამლების სახეობაა, რომელიც T უჯრედებისა და ზოგიერთი კიბოს უჯრედის ზედაპირზე არსებულ იმუნურ საკონტროლო ცილებს, მაგალითად PD-1-სა და PD-L1-ს, ბლოკავს. ამით ცდილობენ, კიბოს უჯრედები იმუნურ სისტემას მეგობრად არ მოეჩვენოს და იმუნიტეტი კიბოს წინააღმდეგ გაააქტიურონ. ამდენად, იმუნური საკონტროლო წერტილების ინჰიბიტორები იმუნოთერაპიის ერთ-ერთი სახეობაა. ეს წამლები ინფუზიის სახით შეჰყავთ და ანტისხეულების სტრუქტურა აქვს.

გაერთიანებული სამეფოსა და ნიდერლანდების მკვლევრების ამ მრავალცენტრულმა კვლევამ აღრიცხა შორსწასული მელანომის დიაგნოზის მქონე 91 პაციენტის საკვები რაციონი, რომლებიც იმუნური საკონტროლო წერტილების ინჰიბიტორებით მკურნალობდნენ, და მათ მდგომარეობას რეგულარული ონკოლოგიური გამოსახულებითი გამოკვლევებით აკვირდებოდა.

ხმელთაშუაზღვის დიეტა, გარდა იმისა, რომ საერთო იმუნოთერაპიულ პასუხთან მნიშვნელოვანი კავშირი ჰქონდა, 12-ე თვეზე პროგრესირების გარეშე გადარჩენასთანაც (მკურნალობით დაავადების კონტროლის ხანგრძლივობა) მნიშვნელოვნად იყო დაკავშირებული.

რა მექანიზმით მოქმედებს დიეტა იმუნოთერაპიაზე პასუხზე?

გრონინგენის უნივერსიტეტის სამედიცინო ცენტრის წარმომადგენელმა Laura Bolte-მ, რომელმაც კვლევა წარადგინა, აღნიშნა, რომ იმუნური საკონტროლო წერტილების ინჰიბიტორებმა მრავალი სახის კიბოს მკურნალობაში რევოლუციას შეუწყო ხელი და დასძინა: „ჩვენი კვლევა ხაზს უსვამს კვების შეფასების მნიშვნელობას კიბოს მქონე პაციენტებში, რომლებიც იმუნური საკონტროლო წერტილის ინჰიბიტორით მკურნალობას იწყებენ, და მხარს უჭერს კვებითი სტრატეგიების როლს პაციენტთა შედეგებისა და გადარჩენის გაუმჯობესებაში.“

კვლევამ ასევე აჩვენა, რომ მთლიანი მარცვლეულისა და პარკოსნების მიღებას შესაძლოა შეემცირებინა იმუნოთერაპიით გამოწვეული, მაგალითად კოლიტის მსგავსი, იმუნურ სისტემასთან დაკავშირებული გვერდითი მოვლენების განვითარების ალბათობა. ამის საპირისპიროდ, წითელი და გადამუშავებული ხორცი იმუნურ სისტემასთან დაკავშირებული გვერდითი მოვლენების უფრო მაღალ ალბათობას უკავშირდებოდა.

იმუნოთერაპიაზე პასუხის კავშირი კვებასა და ნაწლავის მიკრობიომთან მკურნალობაზე პასუხის გაუმჯობესებისთვის იმედიან და საინტერესო მომავალს გვთავაზობს. თანდათან იზრდება კლინიკური ცდების რაოდენობა, რომლებიც ბოჭკოთი მდიდარი დიეტის, ბოსტნეულზე ორიენტირებული კვების, ცილებითა და ცხიმებით მდიდარი კვებისა და სხვადასხვა დანამატის გავლენას იმუნოთერაპიაზე პასუხის სიხშირეზე სწავლობს. ამ კვლევებმა მომავალში შესაძლოა მეტი პაციენტისთვის გახსნას იმუნოთერაპიით სარგებლობის გზა.