ხშირად გამოყენებულ ჰერბიციდში პოტენციურად კიბოს გამომწვევი გლიფოსატი გამოვლინდა

აშშ-ის ერთ-ერთმა უდიდესმა სასოფლო-სამეურნეო რეგიონმა, კალიფორნიამ, სარეველების გასანადგურებლად გამოყენებული პრეპარატის შემადგენლობაში არსებული გლიფოსატის ნივთიერება კანცეროგენების / კიბოს გამომწვევთა სიაში შეიტანა. ამ შემთხვევაში სარეველების გამანადგურებელი სასოფლო-სამეურნეო პრეპარატების შეფუთვებზე იქნება წარწერა „პოტენციური კანცეროგენი“.

რა არის გლიფოსატი?

გლიფოსატი გაყიდვაში 1974 წელს გამოვიდა. იგი გამოიყენება სარეველების გასანადგურებლად სხვა მცენარეების დაზიანების გარეშე. გლიფოსატი უფერო და უსუნოა. ჯანმრთელობის მსოფლიო ორგანიზაციამ ქიმიური ნივთიერება გლიფოსატი პოტენციურ კანცეროგენად განსაზღვრა. გლიფოსატის შემცველი სასოფლო-სამეურნეო პრეპარატები იყიდება 160-ზე მეტ ქვეყანაში და გამოიყენება 250-ზე მეტ სიმინდის ყანაში.

ჩვენს ქვეყანაშიც ხშირად გამოყენებული სარეველების გამანადგურებელი პესტიციდების უმრავლესობა გლიფოსატის მოლეკულას შეიცავს (ყველაზე ცნობილი სავაჭრო სახელია Roundup). ხაზგასმით უნდა აღინიშნოს, რომ ამ ტიპის სარეველების გამანადგურებელი პრეპარატები სპორტულ მოედნებზე, პარკებსა და ბაღებშიც გამოიყენება.

როგორ დავიცვა თავი სასოფლო-სამეურნეო პრეპარატებში არსებული კანცეროგენებისგან?

• თუ აუცილებელი არ არის, მოერიდეთ სარეველების გამანადგურებელი სასოფლო-სამეურნეო პრეპარატების გამოყენებას. ყურადღებით წაიკითხეთ შეძენილი პრეპარატების შეფუთვებზე არსებული გაფრთხილებები. არ შეიძინოთ „გლიფოსატის“ შემცველი სასოფლო-სამეურნეო პრეპარატები.
• ამ ტიპის სასოფლო-სამეურნეო პრეპარატების გამომყენებელმა პირებმა დამცავი ნიღაბი და ტანსაცმელი უნდა გამოიყენონ.
• სასოფლო-სამეურნეო პრეპარატი არ უნდა გამოიყენებოდეს ცხოველთა საცხოვრებელ გარემოში. პრეპარატის შეფუთვები და ნარჩენები ბუნებაში არ უნდა დარჩეს.
• პრეპარატით დამუშავებული ადგილის ხილი და ბოსტნეული გარკვეული დროით არ უნდა მოიხმარონ, ხოლო მოხმარების შემთხვევაში ძალიან კარგად უნდა გარეცხონ.