კიბოს 10 სიმპტომი, რომლებიც ქალებმა უნდა იცოდნენ

ქალის რეპროდუქციული ორგანოების (საკვერცხეების, საშვილოსნოს, საშვილოსნოს ყელისა და საშოს) ჯანმრთელობის შემსწავლელ მეცნიერების დარგს გინეკოლოგია ეწოდება. გინეკოლოგიურ კიბოებს ზოგიერთი დამახასიათებელი სიმპტომი აქვთ. მათი ადრეული შემჩნევა სიცოცხლეს იხსნის. ძალიან მნიშვნელოვანია სხეულის მოსმენა და უჩვეულო მდგომარეობისას ექიმთან კონსულტაცია. გინეკოლოგიური კიბოს სიმპტომები სტატიის გაგრძელებაშია ჩამოთვლილი.

1. ტკივილი მენჯის / საზარდულის მიდამოში
   მენჯის ტკივილი არის ჭიპის ქვემოთ არსებული ტკივილი ან ზეწოლის შეგრძნება, რომელიც პრემენსტრუალური სინდრომის გარეშეც ჩნდება. მენჯის ტკივილი უკავშირდება საშვილოსნოს, საკვერცხის, საშვილოსნოს ყელის, ფალოპის მილისა და საშოს კიბოს.
   -დაკავშირებული თემა:საშვილოსნოს კიბოს სტადიები და მკურნალობა
2. კუჭის ხანგრძლივი დისკომფორტი და ნაწლავთა მოქმედების ცვლილება
   თუ გაქვთ შეკრულობა, დიარეა, სისხლი განავალში, აირები ან ნაწლავთა მოქმედების სხვა აშკარა ცვლილება, მიმართეთ ექიმს. ყურადღება მიაქციეთ, რამდენი ხანია პრობლემა გაქვთ და რა გარემოებებში გრძნობთ ტკივილს. ნაწლავთან დაკავშირებული ხანგრძლივი ცვლილებები შეიძლება ნაწლავური ინფექციის, გინეკოლოგიური კიბოს ან კოლონის კიბოს სიმპტომებს უკავშირდებოდეს.
   -დაკავშირებული თემა: შეკრულობა: კიბოს პაციენტებში ერთ-ერთი ყველაზე ხშირად უგულებელყოფილი პრობლემა
3. უჩვეულო ვაგინალური სისხლდენა
   უჩვეულო ვაგინალური სისხლდენა ქალებში გინეკოლოგიური კიბოს ყველაზე გავრცელებული სიმპტომია. ძლიერი მენსტრუაცია, მენსტრუაციებს შორის მოულოდნელი სისხლდენა, მენოპაუზის შემდეგ და სქესობრივი კავშირის დროს ან შემდეგ სისხლდენა უჩვეულო ვაგინალურ სისხლდენად ითვლება. ეს სიმპტომები უკავშირდება საშვილოსნოს ყელის, საშვილოსნოსა და საკვერცხის კიბოს.
   -დაკავშირებული თემა: საშვილოსნოს ყელის (ცერვიქსის) კიბოს სიმპტომები და მკურნალობა
4. მუდმივი წელის ტკივილი
   ზურგის ტკივილი ხშირად შეიძლება მუდმივ ტკივილად იგრძნობოდეს. ზოგი ქალი მას სამუშაოს შესრულებით გამოწვეულ ტკივილს ამსგავსებს. წელის ტკივილი შეიძლება საკვერცხის კიბოს სიმპტომი იყოს.
5. ხანგრძლივი ცხელება
   თუ სიცხე აგიწევთ და ის 7 დღეზე მეტხანს გაგრძელდება, სასარგებლოა ექიმთან კონსულტაცია. გაუვალი ცხელება შეიძლება კიბოს ნიშანი იყოს, თუმცა შესაძლოა არც იყოს.
   -დაკავშირებული თემა: რა არის ლეიკოპენია და ნეიტროპენია?
6. მუცლის შებერილობა
   მუცლის შეშუპება და შებერილობა საკვერცხის კიბოს გავრცელებული სიმპტომებია. შებერილობა წონის მატებას ან დღის განმავლობაში ჭარბ ჭამას არ უნდა მიაწეროთ და უგულებელყოთ. თუ დისკომფორტი იმდენად ძლიერია, რომ შარვლის ღილის გახსნა-შეკვრას ვერ ახერხებთ, მიმართეთ ექიმს.
   -დაკავშირებული თემა: რა სიმპტომები აქვს საკვერცხის კიბოს?
7. ცვლილებები ძუძუებში
   უნდა დააკვირდეთ, ხომ არ გაქვთ ძუძუებში ამობურცულობა, მგრძნობელობა, ტკივილი, დვრილიდან გამონადენი, ჩაღრმავება, სიწითლე ან შეშუპება. ნებისმიერი ცვლილება რაც შეიძლება მალე უნდა შეატყობინოთ ექიმს.
   -დაკავშირებული თემა: რა სიმპტომები აქვს ძუძუს კიბოს? ხელით შესაგრძნობი წარმონაქმნი ძუძუში?
8. ვულვის ან საშოს უჩვეულო ცვლილებები
   ვულვის ან საშოს ანომალიებთან ერთად ყურადღება უნდა მიაქციოთ ნებისმიერ წყლულს, ბუშტუკს, კანის ფერის ცვლილებას ან გამონადენს. უნდა შეამჩნიოთ ვულვისა და საშოს ცვლილებები.
9. არასასურველი წონის კლება
   შესაძლოა მოგეწონოთ კიდევ 10 კილოს დაკლება ამისთვის განსაკუთრებული ძალისხმევის გარეშე, მაგრამ ეს ნორმალური არ არის. თუ უეცრად 10 კილოს ან მეტის აუხსნელ კლებას განიცდით, ექიმს უნდა შეატყობინოთ.
10. დაღლილობა
    დაღლილობა კიბოს ერთ-ერთი ყველაზე გავრცელებული სიმპტომია. ჩვეულებრივ, კიბოს პროგრესირებასთან ერთად ის უფრო ძლიერად იგრძნობა, მაგრამ ადრეულ სტადიებშიც შეიძლება გამოვლინდეს. ნებისმიერი დაღლილობა, რომელიც ყოველდღიური საქმიანობის შესრულებაში ხელს გიშლით, ექიმმა უნდა შეაფასოს.

დაკავშირებული თემა

გინეკოლოგიური (ქალებისთვის დამახასიათებელი) კიბოს მკურნალობა — სიახლეები 2017 და 2018

შეიძლება სისუსტე და დაღლილობა კიბოს პირველი ნიშანი იყოს?