კიბოს ადრეული დიაგნოსტიკის სკრინინგის პროგრამების გავლენა კიბოს სიხშირესა და კიბოთი სიკვდილის მიზეზებზე
ამ სტატიაში
ცნობილია, რომ საერთაშორისო სახელმძღვანელოების მიხედვით ჩატარებული კიბოს სკრინინგი კიბოს სიხშირესა და სიკვდილიანობაზე მნიშვნელოვან გავლენას ახდენს. ის ასევე კიბოს მიმდინარე და სამომავლო ტვირთის შემცირებას უწყობს ხელს.
ASCO 2020 კონგრესი ფარგლებში წარმოდგენილი იყო კვლევა, რომლის მიზანი კიბოს ინციდენტობის (სიხშირის) და სიკვდილიანობის ტენდენციების სიღრმისეული გაგება იყო. კიბოს სტატისტიკისა და აშშ-ის მოსახლეობის მონაცემების საფუძველზე შექმნილი ანალიზით შეაფასეს კიბოს სიხშირისა და კიბოთი სიკვდილიანობის პროგნოზი 2040 წლისთვის. 2020 წლის მდგომარეობით ყველაზე გავრცელებული და მომაკვდინებელი 10 კიბოს საშუალო წლიური ინციდენტობა (2011-2015) და სიკვდილიანობა (2012-2016) 2040 წლამდე განჭვრიტეს.
კიბოს 2020 წლის მონაცემების 2040 წლის პროგნოზი აშშ-ისთვის ასეთი იყო
2020 წლის მდგომარეობით ყველაზე გავრცელებული კიბოები იყო ძუძუს, პროსტატის, ფილტვისა და კოლორექტული კიბო, ხოლო 2040 წლის პროგნოზით ყველაზე ხშირია ძუძუს, ფილტვის კიბო, მელანომა (კანის კიბოს ტიპი) და კოლორექტული კიბო.
2020 წელს ყველაზე ხშირად სიკვდილის გამომწვევი კიბოები იყო ფილტვის, კოლორექტული, პანკრეასისა და ძუძუს კიბო; 2040 წლის პროგნოზით კიბოთი სიკვდილიანობის რიგი ასეთია: ფილტვის, პანკრეასის, ღვიძლისა და ღვიძლშიდა სანაღვლე გზების კიბო და კოლორექტული კიბო.
კვლევამ საინტერესო შედეგები აჩვენა. მაგალითად, პროსტატის კიბო 2020 წელს ყველაზე ხშირ კიბოებს შორის იყო, ხოლო 2040 წლის პროგნოზით ინციდენტობის რეიტინგში მნიშვნელოვნად იკლებს და 14. ადგილზე გადადის.
ამის საპირისპიროდ, მელანომაში თითქმის იმავე პროპორციით ზრდა შეინიშნებოდა. 2020 წელს და 2040 წლის პროგნოზში ყველაზე ხშირ კიბოდ კვლავ ძუძუს კიბო რჩება. ბოლო რამდენიმე ათწლეულის განმავლობაში ძუძუს კიბოთი სიკვდილიანობა მცირდებოდა. ჩანს, რომ ეს შემცირება თანმიმდევრულად გაგრძელდება 2040 წელსაც. შემთხვევების ზრდის მიუხედავად სიკვდილიანობის სტაბილური კლება ძალიან მნიშვნელოვანია. ამ შედეგში ძუძუს სკრინინგსა და მკურნალობის მიღწევებს დიდი როლი აქვს.
კიბოთი სიკვდილიანობაში ფილტვის კიბო 2020 წელსაც და 2040 წლის პროგნოზშიც პირველ ადგილზეა. მიუხედავად იმისა, რომ ფილტვის კიბო მუდმივად ლიდერობს, 2040 წელს ფილტვის კიბოთი სიკვდილების რაოდენობის შემცირებაა მოსალოდნელი. ეს შეიძლება აიხსნას ადრეული დიაგნოსტიკისთვის გამოყენებული დაბალდოზიანი გულმკერდის კომპიუტერული ტომოგრაფიით,მოწევის სიხშირის შემცირებითა და მკურნალობის მიღწევებით.
პანკრეასის კიბოთი სიკვდილიანობის შემდგომი ზრდაა მოსალოდნელი 2040 წელს. ამ ზრდას მრავალი მიზეზი აქვს. რეკომენდებული სკრინინგული ტესტის არარსებობის გამო ადრეული დიაგნოსტიკის სირთულე ერთ-ერთი მნიშვნელოვანი ფაქტორია.
დასკვნა
შეჯამებისას, კვლევა ძალიან ღირებულია მომდევნო წლებში კიბოს დიაგნოზებისა და სიკვდილიანობის რაოდენობაზე სკრინინგის პროგრამების გავლენის საჩვენებლად. ამგვარი კვლევები ქვეყნების სამედიცინო მომსახურების დაგეგმვასა და ჯანდაცვის პოლიტიკის ჩამოყალიბებასაც დიდად დაეხმარება. უკეთესი შედეგებისთვის მნიშვნელოვანია სკრინინგის ფართოდ გავრცელება და ყველასთვის სახელმძღვანელოებით განსაზღვრულ პროგრამებზე წვდომა.
წყაროები
2. Cancer Screening Programs Influence Incidence and Causes of Cancer Deaths. ASCO Daily News. 13 May 2020.
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.