კიბოს მქონე მეგობრის მხარდაჭერის 8 კარგი გზა

როდესაც ძველ მეგობარს, თანამშრომელს ან მეზობელს კიბოს დიაგნოზს უსვამენ, შეიძლება არ იცოდეთ, რა გააკეთოთ. შეიძლება ფიქრობდეთ, შეხვდეთ თუ საჩუქარი გაუგზავნოთ. კიბოს მქონე მეგობრის საუკეთესო მხარდაჭერისთვის გვინდა ექსპერტების მომზადებული 8 რჩევა გაგიზიაროთ.

1. სტუმრობამდე დარეკეთ

საავადმყოფოში ან სახლში მოსვენებულ მეგობარს ან მის მომვლელს სტუმრობამდე აუცილებლად დაურეკეთ და ნებართვა სთხოვეთ. შეიძლება ზარს ვერ უპასუხოს, გადმორეკვა დაავიწყდეს, ეს ყველაფერი პირადად ნუ მიიღებთ.

თუ ეწვევით და დიდხანს არ დარჩებით, პაციენტი უფრო მშვიდად დაისვენებს. თუ არ ხართ დარწმუნებული, ზედმეტად ხომ არ დარჩით და კიდევ გინდათ მასთან ყოფნა, შეგიძლიათ პირდაპირ ჰკითხოთ.

2. შესთავაზეთ ყოველდღიურ საქმეებში დახმარება

მეგობრისთვის კითხვა, სჭირდება თუ არა დახმარება, შეიძლება რთული იყოს, თუმცა მისთვის ერთ-ერთი ყველაზე სასარგებლო რამაა. მაგალითად; ბაზარში წასვლაში, საჭმლის მომზადებაში, შვილის/შვილიშვილის მოვლაში, ბავშვების სკოლიდან წამოყვანაში, ქიმიოთერაპიისთვის საავადმყოფოში მიყვანაში შეგიძლიათ დაეხმაროთ. თავად განსაზღვრეთ, რა საქმეებში შეგიძლიათ დახმარება და შესთავაზეთ. ან ვთქვათ საკუთარი სახლისთვის მაღაზიაში საყიდლებზე წახვედით, დაურეკეთ ამ მეგობარსაც და უთხარით, რომ თუ რამე სჭირდება, უყიდით და მიუტანთ.

3. მოუსმინეთ, ისაუბრეთ

ერთ-ერთი ყველაზე მარტივი, მაგრამ მნიშვნელოვანი დახმარება მეგობრის მოსმენაა. შეიძლება არ იცოდეთ, საუბარი საიდან დაიწყოთ, დაავადებაზე საუბარი საჭირო არ არის. მდგომარეობის გამო ისედაც მუდმივად კიბოზე საუბრობენ და შესაძლოა მეგობრებთანაც ეს თემა არ უნდოდეთ. ჩვეულებრივ საყვარელ თემებზე შეგიძლიათ ისაუბროთ. საკვებთან გვერდით მიუჯდეთ, ჩაის დროს ყურადღების გადასატანად ესაუბროთ. როცა თვითონ მოყოლას მოისურვებს, საკმარისია მოუსმინოთ და გაუგოთ. მნიშვნელოვანია მეგობარმა იგრძნოს, რომ მუდამ თქვენ გვერდითაა.

4. გახსოვდეთ, ყველას კიბო განსხვავებულია

მეგობრის კიბოს სახეობა სხვა ნაცნობის დიაგნოზის მსგავსიც რომ იყოს, მკურნალობას, შესაბამისად გვერდით მოვლენებსა და ემოციურ პროცესებს ყველა განსხვავებულად გადის. ამიტომ საჭირო არ არის იმ ნაცნობებზე საუბარი, ვინ როგორ დაამარცხა კიბო ან ზოგ "კიბოს სასწაულ სამკურნალო კურსზე" მითითება. როდესაც მეგობარი საავადმყოფოში თანამედროვე მედიცინის მეთოდებით ონკოლოგებისგან საუკეთესო მკურნალობას იღებს, თქვენ ყველაზე მეტად სოციალურად და ემოციურად სჭირდებით.

5. თუ საჩუქრით მიდიხართ, კარგად დაფიქრდით

კიბოს მკურნალობის დროს და შემდეგ ჯანსაღი დიეტა აუცილებელია. ამიტომ ლანგარი ბაქლავა, საკუთარი ხელით მომზადებული ღვეზელები ან შოკოლადის ტორტი ავადმყოფი მეგობრისთვის საუკეთესო არჩევანი შეიძლება არ იყოს. მათ ჯანსაღი და მსუბუქი საკვები სჭირდებათ. მკურნალობის გვერდითი მოვლენების, გულისრევის, ღებინების, დიარეის გამო ყველა ჯანსაღი საკვების ჭამაც შეიძლება ვერ შეძლონ. თუ ხელცარიელი მისვლა არ გინდათ, მდგომარეობის მიხედვით ხილი, ბოსტნეული, ნაჭუჭიანი თხილეული აირჩიეთ.

6. შეგიძლიათ გააზრებული საჩუქრები მიიტანოთ

კიბოს მქონე მეგობრისთვის საჩუქარი ცოტათი მგრძნობიარე საკითხია. ყვავილები დასუსტებული იმუნური სისტემის მქონეთათვის შესაფერისი შეიძლება არ იყოს. სუნამო ან სურნელოვანი პროდუქტები ძალიან შემაწუხებელი შეიძლება იყოს. თუმცა წიგნები, ჟურნალები, ფილმები, თავსატეხები, სახატავი რვეული და ფერადი ფანქრების ნაკრები ქიმიოთერაპიისას დროის გასაყვანად და ყურადღების გადასატანად გამოდგება.

სახლის თავად დასუფთავების ნაცვლად შეგიძლიათ დასუფთავების მომსახურება დაუკვეთოთ. საერთო მეგობრებთან ერთად მოგონებების ალბომი შექმნათ და აჩუქოთ. მნიშვნელოვანი და სასაცილო მოგონებებით სავსე საჩუქარი მეგობარს ძალიან გაახარებს.

7. მის მომვლელსა და ოჯახის სხვა წევრებსაც დაუჭირეთ მხარი

ჩვეულებრივ პაციენტზე ფიქრისას გვავიწყდება მისი ახლობლები, რომლებიც არანაკლებ წუხან და რთულ პერიოდს გადიან. გაიხსენეთ მომვლელების პასუხისმგებლობა და ტვირთიც. მომვლელის ნებისმიერი მხარდაჭერა უშუალოდ თქვენი ავადმყოფი მეგობრის მხარდაჭერაა. ეს შეიძლება მხოლოდ ფინჯან ყავაზე გარეთ გაყვანა და დასვენების საშუალების მიცემაც იყოს. 

-დაკავშირებული თემა: კიბოს პაციენტების მომვლელები არ უნდა დავივიწყოთ – მომვლელთა მხარდაჭერის 4 გზა

8. დიაგნოზის შემდეგაც განაგრძეთ მხარდაჭერა

პაციენტებს მხარდაჭერა მხოლოდ დაავადების დასაწყისში კი არა, მთელ პროცესში სჭირდებათ. მნიშვნელოვანია გვახსოვდეს, რომ დახმარება მხოლოდ პირველი დიაგნოზისას ან საავადმყოფოში ყოფნისას საჭირო არ არის. მხარდამჭერ მეგობრების ჯგუფთან ერთად შეგიძლიათ მოიფიქროთ მხარდაჭერის გავრცელების გზები. შეძლებისდაგვარად ყოველ კვირას გაიხსენეთ და ჰკითხეთ, შეგიძლიათ თუ არა რამე გააკეთოთ. ყველაზე მნიშვნელოვანია მეგობრის ხასიათის, მისთვის კომფორტულის, გემოვნებისა და საჭიროებების გათვალისწინებით შესთავაზოთ დახმარება ან თუ კარგად იცნობთ და ფიქრობთ, რომ არ შეწუხდება, პირდაპირ გააკეთოთ.

დაკავშირებული თემა:

- საუკეთესო საჩუქრის იდეები კიბოს მქონე ქალისთვის

- ონკოლოგიური პაციენტები და მათი ახლობლები კარგი მსმენელები უნდა იყვნენ

- როგორი უნდა იყოს პაციენტის, ახლობლისა და ექიმის კომუნიკაცია?

- ნიშნები, რომ კიბოს მქონე ადამიანი სიცოცხლის დასასრულს უახლოვდება და რჩევები ახლობლებისთვის