Xərçəng xəstəsi dostunuza dəstək verməyin 8 gözəl yolu

Köhnə dostunuz, iş yoldaşınız və ya qonşunuza xərçəng diaqnozu qoyulduqda nə edəcəyinizi bilməyə bilərsiniz. Görüşmək lazımdır, yoxsa hədiyyə göndərmək kimi suallar ağlınızdan keçə bilər. Xərçəng xəstəsi dostunuza ən yaxşı dəstək verə bilməyiniz üçün mütəxəssislərin hazırladığı 8 tövsiyəni paylaşmaq istəyirik.

1. Ziyarətdən əvvəl zəng edin

Xəstəxanada və ya evdə dincələn dostunuza və ya onu müşayiət edən şəxsə ziyarətdən əvvəl mütləq zəng edin və icazə istəyin. Telefonunuza cavab verə bilməyə, geri zəng etməyi unuda bilər; bunları şəxsi qəbul etməyin.

Ziyarət etsəniz də çox qalmasanız, xəstə daha rahat dincələ bilər. Uzun qalıb-qalmadığınızdan əmin deyilsinizsə və bir qədər də onunla vaxt keçirmək istəyirsinizsə, açıq soruşa bilərsiniz.

2. Gündəlik işlərinə kömək təklif edin

Dostunuzdan köməyə ehtiyacı olub-olmadığını soruşmaq bir qədər çətin ola bilər, amma bu, onun üçün edə biləcəyiniz ən faydalı işlərdən ola bilər. Məsələn, bazara getmək, yemək hazırlamaq, uşağına/nəvəsinə baxmaq, uşaqları məktəbdən götürmək, kimyaterapiya üçün xəstəxanaya aparmaqda kömək edə bilərsiniz. Hansı işlərə kömək edə biləcəyinizi özünüz müəyyənləşdirib təklif edə bilərsiniz. Yaxud öz eviniz üçün market alış-verişinə getmisinizsə, dostunuza zəng edib ehtiyacı olan bir şeyi alıb gətirə biləcəyinizi söyləyə bilərsiniz.

3. Dinləyin, söhbət edin

Edə biləcəyiniz ən sadə, lakin mənalı köməklərdən biri dostunuzu dinləməkdir. Söhbətə haradan başlayacağınızı bilməyə bilərsiniz, xəstəlikdən danışmağa ehtiyac yoxdur. Onsuz da vəziyyətlərinə görə daim xərçəngdən danışdıqları üçün dostları ilə də bu mövzunu istəməyə bilərlər. Adətən sevdiyiniz mövzular haqqında danışa bilərsiniz. Yeməkdə ona yoldaşlıq edə, çay vaxtı fikrini yayındıran söhbətlər edə bilərsiniz. O danışmaq istədikdə isə dinləyib anlamağınız kifayətdir. Dostunuzun hər zaman yanınızda olduğunu hiss etməsi vacibdir.

4. Hər kəsin xərçənginin fərqli olduğunu unutmayın

Dostunuzun xərçəng növünün adı başqa tanışınızın diaqnozu ilə eyni olsa belə, müalicələri, beləliklə yan təsirləri və ya emosional prosesləri hər kəs fərqli yaşayır. Buna görə o tanışlardan, kimin xərçəngə necə qalib gəlməsindən və ya bəzi "xərçəng möcüzəsi kürləri"ndən danışmağa ehtiyac yoxdur. Dostunuz xəstəxanada müasir tibbin üsulları ilə onkologiya mütəxəssislərindən ən yaxşı xərçəng müalicəsini alarkən sizə ən çox sosial və emosional baxımdan ehtiyac duyur.

5. Əliniz dolu gedəcəksinizsə, yaxşı düşünün

Xərçəng müalicəsi zamanı və sonra sağlam pəhriz vacibdir. Buna görə bir sini paxlava, özünüz açdığınız börəklər və ya şokoladlı tort xəstə dostunuz üçün düzgün hədiyyə seçimi olmaya bilər. Sağlam və yüngül qidalara ehtiyacları vardır. Müalicənin ürəkbulanma, qusma, ishal kimi yan təsirləri üzündən hər sağlam qidanı da yeyə bilməyə bilərlər. Əliboş getmək istəmirsinizsə, vəziyyətə görə meyvə, tərəvəz, qabıqlı çərəz kimi qidaları seçə bilərsiniz.

6. Düşüncəli hədiyyələr apara bilərsiniz

Xərçəngli dostunuza hədiyyə mövzusu bir qədər həssasdır. Çiçəklər immun sistemi zəif şəxslər üçün uyğun olmaya bilər. Ətir və ya qoxulu məhsullar çox narahat edə bilər. Lakin kitablar, jurnallar, filmlər, krossvordlar, rəsm dəftəri və rəngli qələmlər kimyaterapiya zamanı məşğul olmaq və fikri yayındırmaq üçün uyğun ola bilər.

Özünüz etmək əvəzinə ev təmizliyi xidməti sifariş edə bilərsiniz. Ortaq dostlarınızla xatirə dəftəri hazırlayıb hədiyyə edə bilərsiniz. Mənalı və gülməli xatirələrlə dolu bu hədiyyə dostunuzu çox sevindirəcəkdir.

7. Müşayiətçisini və digər ailə üzvlərini də dəstəkləyin

Adətən xəstəni düşünərkən ən azı onun qədər kədərlənən və çətin vaxt yaşayan yaxınlarını unuda bilirik. Qulluq göstərənlərin də məsuliyyət və yükünü xatırlayın. Onlara hər hansı dəstəyiniz birbaşa xəstə dostunuza dəstək deməkdir. Bu, birlikdə sadəcə bir fincan qəhvə içmək üçün çölə çıxarıb dincəltmək də ola bilər. 

-Əlaqəli mövzu: Xərçəng xəstələrinə qulluq edənlər unudulmamalı – müşayiətçilərə dəstək göstərməyin 4 yolu

8. Diaqnozdan sonra da dəstəyə davam edin

Xəstələrin yalnız xəstəliyin başlanğıcında deyil, bütün proses boyunca dəstəyə ehtiyacı vardır. Köməyin yalnız ilk diaqnoz zamanı və ya xəstəxanada lazım olmadığını xatırlamaq vacibdir. Dəstək verə biləcək dost qrupunuzla bunun yayılması üçün birgə ideyalar hazırlaya bilərsiniz. Mümkünsə hər həftə xatırlamalı və edə biləcəyiniz bir şeyin olub-olmadığını soruşmalısınız. Ən əsası dostunuzun şəxsiyyətini, necə rahat olduğunu, zövqlərini və ehtiyaclarını düşünüb uyğun yardım təklif edə, yaxud yaxşı tanıyırsınızsa və narahat olmayacağını düşünürsünüzsə, birbaşa edə bilərsiniz.

Əlaqəli mövzu:

- Xərçəngli qadın üçün ən gözəl hədiyyə fikirləri

- Onkologiya xəstələri və yaxınları yaxşı dinləyici olmalıdır

- Xəstə, xəstə yaxını və həkim ünsiyyəti necə olmalıdır?

- Xərçəngli şəxsin həyatının sonuna yaxınlaşmasının əlamətləri və xəstə yaxınları üçün tövsiyələr