კიბოს პაციენტის სიცოცხლის ბოლო პერიოდის მოვლის შედარება აშშ-სა და კანადაში

Khaki-სა და კოლეგების მიერ 2019 წლის ASCO ხარისხიანი მოვლის სიმპოზიუმზე წარმოდგენილ კვლევაში მკვლევრებმა ქიმიოთერაპიისა და ინტენსიური თერაპიის განყოფილებაში მოთავსების ჩათვლით უფრო აგრესიული სიცოცხლის ბოლო პერიოდის მოვლის მიდგომები აშშ-ის ვაშინგტონის შტატსა და კანადის ალბერტაში შეადარეს.

რა არის სიცოცხლის ბოლო პერიოდის მოვლა (End Of Life Care)?

ეს არის სიცოცხლის დასასრულს მიახლოებულ ადამიანთა მოვლა, რომლებმაც დაავადების განკურნების ან კონტროლის სტანდარტული მკურნალობა შეწყვიტეს. იგი პაციენტებისა და ოჯახების ფიზიკურ, ემოციურ, სოციალურ და სულიერ მხარდაჭერას მოიცავს. მიზანია ტკივილისა და სხვა სიმპტომებისა თუ ჩივილების კონტროლი, რათა პაციენტი შეძლებისდაგვარად კომფორტულად იყოს. ამ მოვლაში შეიძლება შედიოდეს პალიატიური მოვლა, მხარდამჭერი მოვლა და ჰოსპისის მომსახურება.

კვლევის მეთოდი

მკვლევრები ვარაუდობდნენ, რომ მსგავსი საზოგადოებრივი სტრუქტურისა და მკურნალობაზე მსგავსი წვდომის მიუხედავად, კანადაში ყველა პაციენტის ერთიანი სოციალური ჯანდაცვის სისტემაში ყოფნა აშშ-ის მრავალარხიან სისტემასთან შედარებით სიცოცხლის ბოლო პერიოდის მოვლას შეცვლიდა და კანადაში იგი უფრო ინტენსიური შეიძლება ყოფილიყო.

კვლევაში შეისწავლეს 2014-2016 წლებში მე-2 - მე-4 სტადიის სოლიდური (მყარი, ორგანოს) კიბოს მქონე გარდაცვლილი პაციენტების ქიმიოთერაპიისა და ინტენსიური თერაპიის განყოფილებაში მიღების მონაცემები.

კანადის ალბერტაში დაახლოებით 11.200 პაციენტი და აშშ-ის ვაშინგტონში 7.900 აკმაყოფილებდა კრიტერიუმებს. ყველაზე ხშირი იყო ფილტვის (კანადელთა % 31, ამერიკელთა % 35), კოლორექტული (% 17, შედარებით % 9-თან), ძუძუს (% 10, შედარებით % 6-თან) და პროსტატის კიბო (% 11, შედარებით % 4-თან).

კვლევის შედეგები

• აშშ-სა და კანადაში სიცოცხლის ბოლო 30 დღის განმავლობაში „გადაუდებელ დახმარებაში მრავალჯერ მიმართვის“ სიხშირე მსგავსი იყო: ვაშინგტონი % 12.4, ალბერტა % 12.1.
• სიცოცხლის ბოლო 14 დღეში ქიმიოთერაპიის გამოყენება აშშ-ში კანადაზე მაღალი იყო: % 6,3, შედარებით % 2,7-თან.
• სიცოცხლის ბოლო 30 დღეში ქიმიოთერაპიის გამოყენება აშშ-ში კანადაზე მაღალი იყო: % 13.4, შედარებით % 6,6-თან.
• სიცოცხლის ბოლო 30 დღეში ინტენსიურ თერაპიაში მოთავსება აშშ-ში კანადაზე ხშირი იყო: % 19,9, შედარებით % 3,9-თან.

მკვლევრებმა „ქიმიოთერაპია და სიცოცხლის ბოლო 30 დღეში ინტენსიურ თერაპიაში მიღება ვაშინგტონში ალბერტაზე ხშირი იყო. ალბერტაში დაბალი სიხშირე შეიძლება მოვლის მიზნების განხილვის პრიორიტეტიზაციის ძალისხმევას უკავშირდებოდეს. შეუსაბამოდ აგრესიული ბოლო პერიოდის მოვლის მამოძრავებელი ფაქტორების გამოვლენისა და შედარების მომავალი კვლევები აშშ-სა და ალბერტაში კიბოს მოვლის გაუმჯობესებას შეიძლება დაეხმაროს“, ასეთი კომენტარი გააკეთეს.

კარგად დაგეგმილი და ამ საკითხში მომზადებული ჯანდაცვის მუშაკების მიერ მიწოდებული სიცოცხლის ბოლო პერიოდის მოვლა პაციენტებს მნიშვნელოვან სარგებელს აძლევს და სამედიცინო ხარჯებში მილიარდობით დოლარის დაზოგვას უზრუნველყოფს.