კიბოს რისკი და ემოციური ჯანმრთელობა — ახალი ხედვა დეპრესიისა და შფოთვის როლზე
ამ სტატიაში
დეპრესიისა და შფოთვის (გადაჭარბებული წუხილის) შესახებ არსებობს ეჭვი, რომ მათ შეიძლება ადამიანის ჯანმრთელობასთან დაკავშირებულ ქცევებზე გავლენის მოხდენით ან კიბოს განვითარების ხელშემწყობი ბიოლოგიური ზემოქმედებით იმოქმედონ. თუმცა ახალმა მეტაანალიზმა აჩვენა, რომ დეპრესია და შფოთვა კიბოს უმეტეს ტიპთან დაკავშირებულ უფრო მაღალ რისკს არ უკავშირდება. ეს მონაცემები 7 აგვისტოს, 2023 წელს Cancer ჟურნალში გამოქვეყნდა.
მეტაანალიზი არის ფართომასშტაბიანი კვლევა, რომელიც კონკრეტულ საკითხზე ჩატარებული რამდენიმე ერთმანეთისგან დამოუკიდებელი კვლევის შედეგებს აერთიანებს და მიღებულ მონაცემებს სტატისტიკურად აანალიზებს. მეტაანალიზის შედეგები მეცნიერული თვალსაზრისით ყველაზე მტკიცე მტკიცებულებებია.
დეპრესიისა და შფოთვის კავშირი კიბოს რისკთან
კვლევის წამყვანმა ავტორმა Lonneke A. van Tuijl-მა და მისმა გუნდმა შეისწავლეს ნიდერლანდების, გაერთიანებული სამეფოს, ნორვეგიისა და კანადის 300 ათასზე მეტი მოზრდილის მონაცემები ფსიქოსოციალური ფაქტორებისა და კიბოს ინციდენტობის საერთაშორისო კონსორციუმიდან. ამ ფართომასშტაბიანმა კვლევამ 26 წლამდე დაკვირვების პერიოდის განმავლობაში ვერ გამოავლინა დეპრესიის ან შფოთვის კავშირი კიბოს საერთო ინციდენტობასთან, ძუძუს, პროსტატის, კოლორექტულ და ალკოჰოლთან დაკავშირებულ კიბოებთან.
ინციდენტობა ნიშნავს დროის გარკვეულ მონაკვეთში განსაზღვრულ ჯგუფში დაავადების ახალ შემთხვევათა რაოდენობას. სხვაგვარად, ინციდენტობის მაჩვენებელი განსაზღვრავს კონკრეტული დროის განმავლობაში დაავადების ახალი შემთხვევების რაოდენობას და ჩვეულებრივ გამოიხატება შემთხვევათა რიცხვით 100000 ადამიანზე.
დეპრესიის ან შფოთვის არსებობა ფილტვისა და მოწევასთან დაკავშირებული კიბოს განვითარების რისკს 6%-ით ზრდიდა. თუმცა ეს რისკი მნიშვნელოვნად მცირდებოდა, როდესაც გაითვალისწინებდნენ კიბოსთან დაკავშირებულ სხვა რისკფაქტორებს, მათ შორის მოწევას, ალკოჰოლის მოხმარებასა და სხეულის მასის ინდექსს. ეს აჩვენებს, რომ დეპრესიისა და შფოთვის გავლენა კიბოს რისკზე შეიძლება არაჯანსაღი ცხოვრების წესის არჩევანით იყოს განპირობებული.
დაკავშირებული თემა: კიბო სტრესს იწვევს, მაგრამ სტრესი კიბოს არ იწვევს!
ახალი ხედვა შფოთვისა და დეპრესიის კავშირზე კიბოსთან
ანალიზი ხაზს უსვამს თამბაქოს მოხმარებისა და შფოთვის ან დეპრესიის შედეგად განვითარებული სხვა არაჯანსაღი ქცევების განხილვის მნიშვნელობას. ექიმი van Tuijl ამბობს: „ჩვენი შედეგები შეიძლება შვება იყოს მრავალი კიბოს მქონე პაციენტისთვის, რომელიც ფიქრობს, რომ მისი დიაგნოზი წინა შფოთვას ან დეპრესიას უკავშირდება“ და ამატებს: „თუმცა დეპრესიას, შფოთვას, ჯანმრთელობასთან დაკავშირებულ ქცევებსა და ფილტვის კიბოს შორის სრული კავშირის გასაგებად მეტი კვლევაა საჭირო.“
ეს ანალიზი მნიშვნელოვანი კვლევაა, რომელიც ეჭვქვეშ აყენებს თეორიას, რომ დეპრესია და შფოთვა კიბოს რისკს ზრდის. ეს შეიძლება მნიშვნელოვანი ინფორმაცია იყოს როგორც ჯანდაცვის პროფესიონალებისთვის, ისე ფართო საზოგადოებისთვის, რადგან ამ მდგომარეობების მქონე ბევრ ადამიანს აწუხებს კითხვა, ზრდის თუ არა ისინი კიბოს რისკს. კვლევამ შეიძლება ეს შეშფოთება შეამსუბუქოს და ამავდროულად ჯანსაღი ცხოვრების წესის არჩევის მნიშვნელობას გაუსვას ხაზი.
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.