მნიშვნელოვანი წინსვლა მკურნალობისადმი რეზისტენტული კოლორექტალური კიბოს მე-3 ხაზის თერაპიაში

მე-4 სტადიის კოლორექტალური (მსხვილი ნაწლავის) კიბოს მკურნალობაში მნიშვნელოვანი წინსვლა მოხდა. კლინიკურმა კვლევამ SUNLIGHT აჩვენა, რომ მკურნალობისადმი რეზისტენტული მეტასტაზური (მე-4 სტადიის) კოლორექტალური კიბოს მკურნალობის ახალ სტანდარტად ბევაციზუმაბის დამატებამ trifluridine/tipiracil-თან გადარჩენა გაზარდა.

კვლევის შედეგების მიხედვით, ბევაციზუმაბის დამატებამ, მხოლოდ trifluridine/tipiracil (Lonsurf)-ის მიმღებ პაციენტებთან შედარებით, სიცოცხლის მედიანური ხანგრძლივობა 10,8 თვემდე გაზარდა, მაშინ როდესაც მხოლოდ Lonsurf-ის მიმღებებში ეს 7,5 თვე იყო; სიკვდილის რისკი 49%-ით შემცირდა (საფრთხეთა თანაფარდობა, 0,61; P < 0,001). ასევე აღმოჩნდა, რომ ბევაციზუმაბის დამატებას მძიმე გვერდითი მოვლენების ან მკურნალობის შეწყვეტის გამომწვევი მოვლენების რისკი არ გაუზრდია. ონკოლოგები კვლევის შედეგებს კოლორექტალური კიბოს მკურნალობის მიდგომის შემცვლელ წინსვლად აფასებენ.

ეს საყურადღებო კვლევა 21 იანვარს 2023 წლის კუჭ-ნაწლავის კიბოების სიმპოზიუმზე (2023 ASCO GICS) წარადგინეს.

კვლევაში ჩართეს მე-4 სტადიის კოლორექტალური კიბოს მქონე პაციენტები, რომლებსაც მანამდე სისტემური მკურნალობის 2 ხაზი ჰქონდათ მიღებული და კიბო პროგრესირებდა.

ამ კვლევამდე მეტასტაზური კოლორექტალური კიბოს მე-3 ხაზის სტანდარტულ მკურნალობას ცალკეული წამლების სახით Lonsurf-ი ან Stivarga (regorafenib) წარმოადგენდა. არ ვიცოდით, რა შედეგს გამოიღებდა მათთვის ბევაციზუმაბის მსგავსი სხვა პრეპარატის დამატება III ფაზის ფართომასშტაბიან კლინიკურ კვლევაში.

ბევაციზუმაბი კარგად ცნობილი კიბოს საწინააღმდეგო პრეპარატია, რომელიც სისხლძარღვთა ენდოთელურ ზრდის ფაქტორს (VEGF) მიზანში იღებს და ანგიოგენეზს (ახალი სისხლძარღვების წარმოქმნას) თრგუნავს.

SUNLIGHT-ის კვლევაში 492 პაციენტი ჩაერთო. ისინი შემთხვევითი პრინციპით ორ ჯგუფად დაყვეს. ორივე ჯგუფში პაციენტების უმეტესობას (72%) ადრე ბევაციზუმაბით მკურნალობა ჰქონდა ჩატარებული.

ცხრილი 1. მონაწილეთა საწყისი მახასიათებლების შეჯამება

6 თვეზე საერთო გადარჩენის მაჩვენებელი კომბინირებული მკურნალობით 77% იყო, საკონტროლო მკურნალობით კი 61%; 12 თვის შემდეგ ეს მაჩვენებლები 43% და 30% იყო.

პროგრესირების გარეშე გადარჩენის მედიანა კომბინირებულ ჯგუფში 5,6 თვე იყო, საკონტროლო ჯგუფში კი 2,4 თვე (HR, 0,44; P < ,001). 6 თვეზე პროგრესირების გარეშე გადარჩენა შესაბამისად 43% და 16% იყო, ხოლო 12 თვეზე — 16% და 1%.

ცხრილი 2. საერთო გადარჩენისა და პროგრესირების გარეშე გადარჩენის შეჯამება

გვერდითი მოვლენების მხრივ, მკურნალობასთან დაკავშირებული სიკვდილი არ დაფიქსირებულა და მძიმე გვერდითი მოვლენების სიხშირე ორივე ჯგუფში მსგავსი იყო. მთლიანობაში გვერდითი მოვლენებიც ორივე ჯგუფში მსგავსი იყო, გარდა Lonsurf-ისა და ბევაციზუმაბის ჯგუფში ჰიპერტენზიის (10% და 2%), გულისრევის (37% და 27%) და ნეიტროპენიის (62% და 51%) ოდნავ უფრო მაღალი სიხშირისა.