Müalicəyə davamlı kolon-rektum xərçənginin 3-cü xətt müalicəsində mühüm inkişaf

4-cü mərhələli kolon-rektum (yoğun bağırsaq) xərçənginin müalicəsində mühüm inkişaf baş verdi. SUNLIGHT adlı klinik tədqiqat müalicəyə davamlı metastatik (4-cü mərhələli) kolorektal xərçəngin müalicəsində yeni standart kimi bevasizumabın trifluridine/tipiracilə əlavə edilməsinin sağqalımı artırdığını göstərdi.

Tədqiqat nəticələrinə görə bevasizumabın əlavə edilməsi yalnız trifluridine/tipiracil (Lonsurf) alan xəstələrlə müqayisədə median sağqalım müddətini 10,8 aya çatdırdı — yalnız Lonsurf alanlarda bu müddət 7,5 ay idi — və həyat itkisi riskini 49% azaltdı (təhlükə nisbəti, 0,61; P < 0,001). Həmçinin bevasizumabın əlavə edilməsinin ciddi yan təsirlər və ya müalicənin dayandırılmasına səbəb olan hadisələr riskini artırmadığı görüldü. Tədqiqat nəticələri onkologiya mütəxəssisləri tərəfindən kolorektal xərçəngə müalicə yanaşmasını dəyişdirəcək inkişaf kimi qiymətləndirilir.

Bu diqqətçəkən tədqiqat 21 yanvarda 2023 Mədə-bağırsaq Xərçəngləri Simpoziumunda (2023 ASCO GICS) təqdim edildi.

4-cü mərhələli kolorektal xərçəngi olan, daha əvvəl 2 xətt sistemik müalicə almış və xərçəngi irəliləmiş xəstələr bu tədqiqata daxil edildilər.

Bu tədqiqata qədər metastatik kolorektal xərçəng üçün standart 3-cü xətt müalicəsi tək dərman şəklində Lonsurf və ya Stivargadan (regorafenib) ibarət idi. Bu dərmanlara bevasizumab kimi başqa agentin əlavə edilməsinin genişmiqyaslı faza-III klinik tədqiqatda necə nəticələnəcəyini bilmirdik.

Bevasizumab vaskulyar endotelial böyümə faktorunu (VEGF) hədəfləyən və angiogenezi (yeni damar yaranmasını) zəiflədən yaxşı tanınmış xərçəngəleyhinə agentdir.

SUNLIGHT tədqiqatına 492 xəstə daxil edildi. Xəstələr təsadüfi qaydada iki qola ayrıldılar. Hər iki qolda xəstələrin çoxu (72%) əvvəllər bevasizumab müalicəsi almışdı.

Cədvəl 1. Başlanğıcdakı iştirakçı xüsusiyyətlərinin xülasəsi

6 ayda ümumi sağqalım göstəricisi kombinasiya müalicəsində 77%, nəzarət müalicəsində isə 61% idi; 12 ay sonra ümumi sağqalım göstəricisi 43% və 30% idi.

Median proqressiyasız (irəliləməsiz) sağqalım kombinasiya qolunda 5,6 ay, nəzarət qolunda isə 2,4 ay idi (HR, 0,44; P < 0,001). 6 ayda proqressiyasız sağqalım müvafiq olaraq 43% və 16%, 12 ayda isə 16% və 1% idi.

Cədvəl 2. Ümumi sağqalım və irəliləməsiz sağqalımın xülasəsi

Yan təsirlərə baxdıqda müalicəyə bağlı həyat itkisi bildirilmədi və ciddi yan təsir göstəriciləri hər iki qrupda oxşar idi. Ümumiyyətlə, bevasizumab və Lonsurf qolunda hipertoniya (10% və 2%), ürəkbulanma (37% və 27%) və neytropeniya (62% və 51%) üçün bir qədər yüksək göstəricilər istisna olmaqla yan təsirlər hər iki qrupda oxşardır.