როდის უნდა გამოვიყენოთ ანტრაციკლინები ადრეული სტადიის ძუძუს კიბოს დროს?

ადრეული სტადიის, ლიმფური კვანძების უარყოფითი, ჰორმონული რეცეპტორის (HR) დადებითი, ადამიანის ეპიდერმული ზრდის ფაქტორის რეცეპტორ 2-ის (HER2) უარყოფითი ძუძუს კიბოს მქონე პაციენტებში, როცა კიბოს განმეორების რისკი მაღალია, ადიუვანტური (ოპერაციის შემდგომი დამცავი) ანტრაციკლინების ტაქსანზე დაფუძნებულ ქიმიოთერაპიაზე დამატება უფრო მეტ სარგებელს იძლეოდა, ვიდრე მხოლოდ ტაქსანზე დაფუძნებული ქიმიოთერაპია. ეს შედეგი TAILORx კვლევის შემდგომ ქვეჯგუფურ ანალიზში მიიღეს.

Oncotype DX გენომური ტესტი, მოლეკულური დიაგნოსტიკური ტესტია, რომელიც დაავადების რეციდივის რისკის შესაფასებლად და ქიმიოთერაპიაზე პასუხის პროგნოზირებისთვის, კიბოს გარკვეული ტიპების, მაგალითად, ძუძუს კიბოს დროს 21 გენის ექსპრესიას აანალიზებს. ტესტი ქირურგიული ბიოფსიით მიღებულ ქსოვილზე ტარდება.

კერძოდ, პაციენტებს, რომელთა განმეორების ქულა Oncotype DX გენომური ტესტით ≥ 31 იყო, ტაქსანზე დაფუძნებულ ქიმიოთერაპიაზე ადიუვანტური ანტრაციკლინის დამატებით რეციდივის გარეშე გადარჩენისა და განმეორებამდე დროის უფრო ხანგრძლივი პერიოდები ჰქონდათ; ასევე გამოვლინდა 5-წლიანი საერთო ჯანმრთელობის გაუმჯობესების ტენდენცია.

Dr. Nan Chen-მა, რომელმაც ეს მიგნებები სან-ანტონიოს ძუძუს კიბოს სიმპოზიუმზე (SABCS) 2024 წელს წარადგინა, განაცხადა: „ანტრაციკლინები უნდა განიხილებოდეს მაღალი გენომური რისკის მქონე HR დადებით, HER2 უარყოფით, ლიმფური კვანძების უარყოფით პაციენტებში“.

ადიუვანტური ქიმიოთერაპიის განვითარება მაღალი რისკის პაციენტებში

ადიუვანტური ქიმიოთერაპიის როლი მაღალი რისკის, ადრეული HR დადებითი, HER2 უარყოფითი ძუძუს კიბოს დროს თანდათან იკვეთება. ასეთ პაციენტებს ჩვეულებრივ ტაქსანზე დაფუძნებული სქემით ან უფრო ინტენსიური, ტაქსანსა და ანტრაციკლინზე დაფუძნებული ქიმიოთერაპიით მკურნალობენ. თუმცა უფრო ინტენსიური სტრატეგიის გამოყენების წარმმართველი მონაცემები შეზღუდულია.

Dr. Chen-მა და მისმა გუნდმა TAILORx კვლევაში ტაქსანითა და ციკლოფოსფამიდით (TC) ან ანტრაციკლინ-ტაქსანის კომბინაციით (T-AC) ნამკურნალები პაციენტები გააანალიზეს. T-AC სქემა სხვადასხვა ფორმით გამოიყენებოდა: ციკლოფოსფამიდთან კომბინირებულ ანტრაციკლინებს ტაქსანი მოჰყვებოდა, ან ანტრაციკლინი, ციკლოფოსფამიდი და დოცეტაქსელი ერთდროულად გამოიყენებოდა.

მკურნალობა Oncotype DX-ისა და რისკის ქულების მიხედვით

TAILORx კვლევაში ჩართულ ყველა პაციენტს Oncotype DX 21-გენიანი განმეორების ქულის ტესტით ქულა მიენიჭა. ქულა 0-დან 100-მდე იცვლებოდა და მაღალი ქულა ქიმიოთერაპიის სარგებელს პროგნოზირებდა. 11-25 ქულის მქონე პაციენტები რანდომიზდნენ მხოლოდ ენდოკრინულ მკურნალობაზე ან ენდოკრინულ მკურნალობასა და ექიმის მიერ შერჩეულ ქიმიოთერაპიაზე. ≥ 26 ქულის მქონე პაციენტებმა კი ენდოკრინული მკურნალობა და ქიმიოთერაპია მიიღეს.

ქვეჯგუფურ ანალიზში ჩაერთო T-AC-ის მიმღები 438 და TC-ის მიმღები 2111 პაციენტი. T-AC-ის მიმღებები, როგორც წესი, უფრო ახალგაზრდები (საშუალო ასაკი 53 და 55), პრემენოპაუზური, უფრო მაღალი ხარისხის, პროგესტერონის რეცეპტორის უარყოფითი და უფრო დიდი სიმსივნეების მქონენი იყვნენ. მათი განმეორების საშუალო ქულაც უფრო მაღალი იყო (29,6 და 9,5).

ძირითადი მიგნებები

კვლევის ძირითადი საბოლოო მაჩვენებლის, 5-წლიანი შორეული მეტასტაზების გარეშე გადარჩენის ბოლოს 31-ზე ნაკლები ქულის მქონე პაციენტებში ანტრაციკლინის დამატებას სტატისტიკურად მნიშვნელოვანი სხვაობა არ მოუტანია (97,0% T-AC და 97,6% TC). თუმცა 31 ან მეტი ქულის მქონე პაციენტებში ეს მაჩვენებლები მნიშვნელოვნად განსხვავდებოდა: 96,1% (T-AC) და 91% (TC) (კორექტირებული საფრთხეთა თანაფარდობა [aHR], 0,32; P = 0,009).

ქვეჯგუფურ ანალიზებში 31 ან მეტი განმეორების ქულის მქონე პაციენტებში T-AC-ის სარგებელი ყველაზე მკაფიო იყო ≥ 2 cm სიმსივნის მქონეებში. მსგავსი სარგებელი აღინიშნა პრემენოპაუზურ და პოსტმენოპაუზურ პაციენტებში, რაც მიუთითებს, რომ ეფექტები ანტრაციკლინების საკვერცხის დამთრგუნველი მოქმედებით არ იყო გამოწვეული.

Chen-მა ხაზი გაუსვა, რომ განმეორების ქულის ზრდასთან ერთად ანტრაციკლინით მკურნალობის სარგებელიც იზრდებოდა. თუმცა TAILORx კვლევაში პაციენტების 5%-ზე ნაკლებს ჰქონდა განმეორების ქულა ≥ 31. „მიუხედავად იმისა, რომ ეს იშვიათი სცენარია, მნიშვნელოვანია HR დადებითი, HER2 უარყოფითი ძუძუს კიბოს მქონე იმ ქვეჯგუფის განსაზღვრა, რომელსაც ანტრაციკლინით მკურნალობა შეიძლება დაეხმაროს,“ — განაცხადა მან.

კომენტარი

ადრეული ძუძუს კიბოს დროს ოპერაციის შემდგომი ქიმიოთერაპიის საჭიროების განსაზღვრისას Oncotype DX ქულა ერთ-ერთ ყველაზე მნიშვნელოვან ორიენტირად იქცა როგორც პაციენტებისთვის, ისე ექიმებისთვის. ეს კვლევა მკაფიოდ აჩვენებს ანტრაციკლინის დამატების მნიშვნელოვან სარგებელს მაღალი განმეორების ქულის მქონე პაციენტებში, განსაკუთრებით 31 ან მეტი ქულის დროს. მიღებული მონაცემები ამ ჯგუფში მკურნალობის სტრატეგიის უფრო ზუსტად დაგეგმვის საშუალებას იძლევა, რაც არა მხოლოდ ეფექტიან მკურნალობაზე ორიენტირებას, არამედ არასაჭირო ტოქსიკურობის რისკის მინიმუმამდე შემცირებასაც უწყობს ხელს. ეს მიგნებები ღირებულია იმის საჩვენებლად, რომ ადიუვანტური ქიმიოთერაპია პერსონალიზებული მედიცინის მიდგომით ფორმირებას განაგრძობს.