სამედიცინო ონკოლოგი დოქტორი David Fajgenbaum გვიყვება, როგორ დაამარცხა კასტლემანის დაავადება
მსოფლიოს უმნიშვნელოვანესი ონკოლოგიური შეხვედრის, ASCO კონგრესისწლევანდელი გახსნის სიტყვა 35 წლის ექიმმა, სამედიცინო ონკოლოგმა დოქტორმა David Fajgenbaum-მა წარმოთქვა. რა ხდის მას ასეთ განსაკუთრებულ ადამიანად?
პენსილვანიის უნივერსიტეტის Parelman სამედიცინო სკოლის ასისტენტ-პროფესორი დოქტორი David Fajgenbaum ამერიკელი იმუნობიოლოგი და ავტორია, რომელმაც ცხოვრება მეცნიერებას მიუძღვნა. ის უფრო ცნობილია სამედიცინო ფაკულტეტის მესამე კურსზე კასტლემანის დაავადების განვითარების შემდეგ თავისი ბრძოლითა და ისტორიით. ეს ძალზე იშვიათი და სასიკვდილო დაავადება ორგანოთა უკმარისობას იწვევს, რადგან იმუნური სისტემა უცნობი მიზეზებით სხეულს ესხმის თავს. David Fajgenbaum ამბობს, რომ კვირების განმავლობაში რეანიმაციაში ყოფნისას გაიგო, მის დაავადებას მკურნალობა არ ჰქონდა, თითქმის 5-ჯერ სიკვდილს გადაურჩა და სიცოცხლე ქიმიოთერაპიამ შეუნარჩუნა. იმ დროს ბოლომდე გაუგებარი დაავადებისა და David-ის მიერ აღმოჩენილი საკუთარი მკურნალობის ისტორია ყველას აოცებს.
სკოლის საფეხბურთო გუნდში თამაშისას მან გაიგო, რომ დედას ტვინის კიბო (GBM) ჰქონდა. დედა 15 თვის შემდეგ ამ დაავადებით გარდაიცვალა. მას დაჰპირდა, რომ ექიმი გახდებოდა, კიბოს მსგავს დაავადებებს შეებრძოლებოდა და ადამიანებს დაეხმარებოდა. ამის შემდეგ David-მა წამოიწყო კამპანია „Actively Moving Forward“, რომლის ფარგლებში ახლობელდაკარგული სტუდენტები ერთმანეთს ფსიქოლოგიურ მხარდაჭერას უწევდნენ. პენსილვანიის უნივერსიტეტის სამედიცინო სკოლაში სწავლისას მან სისუსტე იგრძნო. მესამე კურსზე მუცლის ღრუში ძლიერი ტკივილებისა და კისრის შეშუპების გასარკვევად საავადმყოფოში მივიდა და ძალიან იშვიათი იდიოპათიური მულტიცენტრული კასტლემანის დაავადება დაუდგინდა. ექიმმა უთხრა, რომ ორგანოები უკმარისობის ზღვარზე იყო და სასწრაფოდ რეანიმაციაში უნდა გადაეყვანათ. რამდენიმე დღეში მდგომარეობა უფრო გაუარესდა. ბადურაში სისხლჩაქცევით მარცხენა თვალში მხედველობა დაკარგა, სხეულში 32 ლიტრი ზედმეტი სითხე დაუგროვდა და გადასარჩენად მუდმივად სისხლის გადასხმა სჭირდებოდა. ექიმები მის სიკვდილს ელოდნენ და ოჯახს დამშვიდობება ურჩიეს.
David Fajgenbaum და Caitlin Fajgenbaum დანიშნულები იყვნენ და ქორწილი 24 მაისს 2014 წელს ჰქონდათ დაგეგმილი. David-ს ქორწილის გამოტოვება არ სურდა და ოჯახის გასვლისთანავე ტელეფონი ამოიღო, რათა თავისი დაავადება გამოეკვლია. ძიებისას ძალიან შეშფოთდა: გაიგო, რომ ამ დაავადების მქონე პაციენტების 80 პროცენტი ორ წელზე მეტხანს ვერ ცოცხლობდა, სამედიცინო კვლევები არასაკმარისი იყო და დაავადების სამკურნალო პრეპარატი არ არსებობდა.
საავადმყოფოში მისვლის შემდეგ მაღალი დოზის ქიმიოთერაპიით სიცოცხლის შენარჩუნება შეძლო. ქორწილამდე მისასწრებად მიიღო მძიმე ქიმიოთერაპია, რომელიც 7 სხვადასხვა ქიმიოთერაპიული პრეპარატის კომბინაცია იყო. მკურნალობა David-ს ძალიან მძიმედ გადაჰქონდა, მაგრამ ამავე დროს სიცოცხლეს უნარჩუნებდა. მიხვდა, რომ გამოსავალი საკუთარი ძალისხმევით უნდა ეპოვა და ლაბორატორიაში სისხლის ანალიზებისა და კვლევების ჩატარება დაიწყო.
იმუნური სისტემა უცნობი მიზეზით ჯანმრთელ ორგანოებს ესხმოდა თავს. თავდასხმისთვის სასიგნალო გზების გააქტიურება იყო საჭირო. არსებობს 17 სხვადასხვა სასიგნალო გზა და შესაძლებელი იყო ერთის ან ყველას გააქტიურება. აქტიური გზის გასარკვევად ლიმფური კვანძების ქსოვილის გამოკვლევისას აღმოაჩინა, რომ mTOR სასიგნალო გზა ზედმეტად აქტიური იყო. იმედოვნებდა, რომ ამ გზების გამორთვით იმუნური სისტემა მოწესრიგდებოდა და ამისთვის mTOR ინჰიბიტორი სჭირდებოდა. ასეთი პრეპარატი არსებობდა, თუმცა კასტლემანის დაავადების სამკურნალოდ მანამდე არ გამოეყენებინათ. იმუნოსუპრესანტი სიროლიმუსი, რომელსაც თირკმლის გადანერგვისას იყენებდნენ, 1999 წელს FDA-მ დაამტკიცა. David-მა იცოდა, რომ კასტლემანის დაავადებაში მისი ეფექტიანობის გარანტია არ იყო, მაგრამ ამ წამალმა სიცოცხლე გადაარჩინა.
David Fajgenbaum-მა სექტემბერში 2019 წელს დაწერა წიგნი „Chasing My Cure“, რომელიც მის იმედისმომცემ ისტორიას მოგვითხრობს. David, რომელიც 5-ჯერ გადაურჩა სიკვდილს, ყოველ ჯერზე ქიმიოთერაპიით სიცოცხლეს ინარჩუნებდა და იმედს არ კარგავდა, ამბობს: „ცხოვრების ყველა სირთულეში იუმორის პოვნა ეცადეთ და ნუ მიატოვებთ იმას, რისი იმედიც გაქვთ. სიროლიმუსი, რომელიც არავის მოსვლია აზრად, სინამდვილეში იმ აფთიაქში იყო, რომელსაც ყოველდღე ჩავუვლიდი. ზოგჯერ ურთულესი პრობლემების გამოსავალი თვალწინ გვიდევს.“
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.