Alfa lipoik turşu nədir, ALA hansı xəstəliklərdə sınanır, yan təsirləri nələrdir?

Digər məlum adları

• ALA
• Tioktik turşu
• Lipoat
• Tioktan

Alfa lipoik turşu antioksidantdır və orqanizmin təbii istehsal etdiyi birləşmədir. Xərçəngi müalicə etmək və ondan qorunmaq, diabet, diabetik neyropatiyalar, HIV / AIDS və qaraciyər xəstəliklərini müalicə etmək məqsədilə alfa lipoik turşu əlavəsi qəbul edilə bilir. Enerji istehsalında çox mühüm rol oynayan alfa lipoik turşu güclü antioksidant kimi davranır və şiş hüceyrələrinə apoptotik (proqramlaşdırılmış hüceyrə ölümü) təsiri olduğu iddia edilir.

Alfa lipoik turşu nələrdə olur?

• Ət
• ispanaq
• brokoli
• pomidor
• yaşıl noxud
• Brüssel kələmi
• düyü kəpəyi

Alfa lipoik turşu əlavəsinin istifadə məqsədləri

Antioksidant kimi

Laboratoriya tədqiqatları alfa lipoik turşunun antioksidant təsirini təsdiqləyir. Canlılarda hüceyrə səviyyəsində gedən kimyəvi proseslər oksigen radikalları adlanan tullantı maddələrin yaranmasına səbəb olur. Həm orqanizmin istehsal etdiyi, həm də qidalardan aldığımız antioksidant xüsusiyyətli bəzi maddələr bu tullantıları uzaqlaşdırır, neytrallaşdırır və çevirir. Həyatın davamı üçün antioksidant maddələrin və sistemlərin zəruriliyi mübahisəsizdir. Lakin antioksidantlardan yalnız sağlam hüceyrələr istifadə etmir; hətta xərçəng hüceyrələri metabolik baxımdan daha aktiv olduğundan daha çox hüceyrə tullantısı yaradır və antioksidantlara daha çox ehtiyac duyur. Buna görə antioksidantları əlavə kimi qəbul etmək xərçəng xəstəliyi üçün riskli vəziyyətdir.

Xərçəngin qarşısını almaq və müalicə etmək üçün

Alfa lipoik turşu antioksidantdır və xərçəngin müalicəsində istifadə edilə biləcəyinə dair dəlil yoxdur.

Diabetə bağlı şikayətlərin / ağırlaşmaların müalicəsində

Diabetə bağlı əl və ayaq uclarında hissiyyat pozuntusu və sinir zədəsi demək olan diabetik neyropatiya kimi problemləri yüngülləşdirmək üçün alfa lipoik turşu sınanır. Bəzi tədqiqatlar bu məqsədlə effektiv ola biləcəyini düşündürür.

Dərmanlara bağlı eşitmə siniri zədəsini müalicə etmək üçün

Bu istifadəni qiymətləndirmək üçün heç bir klinik tədqiqat aparılmamışdır.

HIV və AIDS-i müalicə etmək üçün

Bu istifadəni heç bir elmi tədqiqat dəstəkləmir.

Hepatit / qaraciyər xəstəliyinin müalicəsində

Bir neçə tədqiqat alfa lipoik turşunun alkoqol mənşəli olmayan qaraciyər xəstəliyindən qoruya biləcəyini düşündürür. Qəti fikir bildirmək üçün daha çox araşdırma lazımdır.

Alfa lipoik turşunun yan təsirləri hansılardır?

Alfa lipoik turşu qanda şəkər səviyyəsini azalda bilər. Bundan başqa, güclü antioksidantların xərçəng müalicələrinin effektivliyini azaltma riski var. Buna görə xüsusilə xərçəng müalicəsində antioksidantların əlavə kimi qəbulundan çəkinmək lazımdır.

Nəticə

Alfa lipoik turşunun qəbulu ümumən təhlükəsiz görünsə də, tövsiyə edilən istifadələrin heç biri üçün faydası sübut olunmamışdır. Diabet xəstələri alfa lipoik turşudan əvvəl həkimləri ilə məsləhətləşməlidir. Diabet, HIV və ya qaraciyər xəstəliyini müalicə etmək üçün istifadəsini dəstəkləyən dəlil yoxdur. Xərçəng müalicəsində əlavə kimi qəbulunda güclü antioksidant tərkibinə görə risk var. Bu riskin “əlavə” istifadəsinə aid olduğunu qeyd etmək faydalıdır; alfa lipoik turşu olan qidalar rahatlıqla normal miqdarlarda yeyilə bilər.